2 Paraleipomeno
17 TUPAUIA akera aia i te au e tana tamaiti ra e Iehosaphata, e kua akamaroiroi iora iaia uaorai ia Iseraela.
2 Kua tuku iora aia i te aronga toa i roto i te au oire katoa i akaketaketaia i Iuda ra, e kua akanoo oki i te au vaeau i taua enua ra i Iuda, e te au oire i Epheraima, i tei rauka i tona metua ia Asa ra.
3 Tei vaitatao a Iehova ia Iehosaphata, no te mea kua akono aia i te aerenga mua o tona metua ra o Davida, e kare i kimi i te au Baala.
4 Kimi atura ra i te Atua o tona metua, e kua aere i tana au akauenga, kare i te au ravenga a to Iseraela.
5 Kua akatinamou mairā Iehova i te au i tona rima; e kua oronga mai to Iuda ravarai i te apinga na Iehosaphata; e apinga maata rava tana, e kua akangateitei ravaia.
6 Maroiroi akera tona ngakau i te arataa a Iehova: e kua apai keia e ia te au ngai teitei e te au Asetoreta i Iuda ra.
7 E tae akera ki te toru o te mataiti o tona ra au, kua tono akera aia ki te aronga mamaata i ona ra, kia Benehaila, e kia Obadia, e kia Zekaria, e kia Netaneela, e kia Mikaia, kia apii i te au oire o Iuda:
8 Ko ratou e te ngati Levi, ko Semaia, e ko Netania, e ko Zebadia, e ko Asaela, e ko Semiramota, e ko Iehonatana, e ko Adonia, e ko Tobiia, e ko Tobaadonia, ngati Levi ïa; ratou katoa ko Elisama, e ko Iehorama, nga taunga.
9 E kua apii atura ratou i Iuda, e tei ia ratou te buka ture a Iehova: e kua aere ua iora ratou na roto i te au oire ravarai i Iuda, e kua apii i te tangata.
10 Rokoia iora te au basileia i te pa enua katoa e pini ua ake Iuda e te mataku ia Iehova, e kare akerai ratou i tamaki mai ia Iehosaphata.
11 Kua apai maira tetai pae Philiseti i te apinga kia Iehosaphata, e te ario uipa, e kua apai maira to Arabia i te mamoe kiaia, e itu tausani, e itu anere i te mamoe toa, e itu oki tausani e itu anere i te puaka-nio toa.
12 Tupu rava aturā Iehosaphata i te maata, e kua patu aia i te au punanga, e te au oire vairanga apinga, i Iuda ra.
13 E angaanga maata oki tana i te au oire i Iuda ra: kareka te aronga tamaki, te aronga toa uritumu, tei Ierusalema ïa.
14 Teia oki to ratou rainga kia tatau i te ngutuare o to ratou ai metua: To te au rangatira no runga i te au tausani o Iuda ra, ko Adana te rangatira; e toru oki anere i te tausani anga i te aronga toa uritumu i te kapiti katoa anga kiaia.
15 E te rangatira i muri ake iaia ra ko Iehohanana ïa, e tei iaia e rua anere e varu ngauru i te tausani.
16 E muri ake iaia ko Amasia ïa te tamaiti a Zikeri, ko tei oronga ua iaia uaorai no Iehova; e tei iaia oki te au tangata e rua anere i te tausani anga, aronga toa uritumu.
17 E to Beniamina, ko Eliada ïa, e toa uritumu, e tei iaia te au tangata e rua anere anga i te tausani ma te ana e te paruru.
18 E muri ake iaia ra ko Iehozabada ïa, e tei iaia okotai anere e varu ngauru i te tausani i te aronga i akamātauia i te tamaki.
19 E tu teianei aronga i vaitata i te ariki, te taka atura tei tukuia e te ariki ki roto i te au oire i akaketaketaia ra e pini ua ake Iuda katoa ra.