Koheleta

6 TE vai nei tetai kino i kitea e au i raro ake i teianei rā; e apinga maata oki i te tangata nei:

2 I te tangata, ta te Atua i oronga mai i te apinga nui, e te meitaki, e te ngateitei, e kua ope rava ta tona vaerua i inangaro, kare e toe: kare ra te Atua i oronga mai i te meitaki nona e tikaʼi kia kai i taua mea ra, kua nanave ra te tangata ke i te kai i te reira. E mea puapinga kore katoa te reira, e te maki mamae.

3 Kia anere ua atu ta te reira tangata tamariki, e roa ua atu ona mataiti i te ao nei; maata oti ona puke rā i te ora anga nei, e kare rai tona ngakau e mareka i te meitaki, e kare ona e tanumanga; teia taku tuatua, ko te maemo nei, e ngari ake ïa i te reira tangata.

4 Aere puapinga kore ua mai oki aia, e riro atura na te poiri, e kua tapokiia tona ingoa i te poiri;

5 Kare rai oki i kite i te rā, e kare e mea i kitea: e akaea anga ake tona i to tetai.

6 E kia rua ua atu ona tausani i te mataiti, kare rava ona e rekareka: kare ainei te tangata katoa nei e aere ki te ngai okotai?

7 No te vaa ta te tangata katoa nei angaanga; kare rave ra e pangia tona kaki.

8 Eaa iora ta te tangata pakari puapinga i tu ke i ta te neneva ra? e ta te ao, i kite i te akono i tona aerenga ki rotopu i te aronga e ora nei?

9 E ngari ake tei rauka ua mai, i te apeape ke anga o te manako; e mea puapinga kore katoa te reira, e te kai i te matangi.

10 Te au mea i vai nei kua tapa takereia te ingoa, e kua kitea oki te tu o te tangata nei: auraka oki aia e taumāro mai ki tei maata tona ririnui i tona.

11 E manganui te au mea, e maataʼi te puapinga kore, eaa ta te tangata nei puapinga e rauka?

12 Koai oki te kite i te mea e meitaki ei te tangata i te ora anga, i nga rā katoa i tona ora anga puapinga kore nei, tei peke ke ua mei te ata ra? e tika oki iaai kia akakite atu ki te tangata i te ka tupu i muri ake iaia, i raro ake i te rā nei?