1 Ariki

21 E I MURI ake i te reira au mea, kua tupu iora teia: E kainga vine to Nabota i Iezereela, tei Iezereela, i vaitata i te are o te ariki o Samaria ra o Ahaba.

2 Kua karanga aturā Ahaba kia Nabota, na ko atura, O mai ana i te kainga vine noou ra ei kainga rakau rikiriki noku, no te mea te vaitata nei ki toku ra are: e naku e o atu i tetai kainga vine meitaki maata noou ei tutaki; e te tau ra ia koe te moni, naku e oko atu e kia oko na marie.

3 Kua tuatua mairā Nabota hia Ahaba, Kia tāpu mai a Iehova iaku, auraka au e oronga atu i te kainga ipukarea o toku ai metua noou.

4 Kua aere iorā Ahaba ki te ngutuare ma te ongoongo e te riri, no te tuatua ta Nabota i Iezereela i tuatua mai kiaia; kua karanga mai oki aia e, Kare au e pa i te kainga ipukarea no toku ai metua noou. Kua moe iora aia ki runga i tona roi, e kua anga ke tona mata, e kare akera e kai i te kai.

5 Kua aere maira tana vaine ko Iezebela kiaia ra, kua tuatua maira kiaia, Eaa ra te mea i tumatetengaʼi toou ngakau e kare koe e kai i te kai?

6 Kua karanga atura aia kiaia, No te mea kua tuatua au kia Nabota i Iezereela, kua karanga atura au kiaia, O mai ana i te kainga vine oou e oko ki te moni; e kare ra, kia inangaro koe, naku e apai atu i tetai kainga vine noou.

7 Kua tuatua maira tana vaine ko Iezebela kiaia, Ko koe ainei te ariki ki rungao ia Iseraela? ka tu, ka kai i te kai, e kia rekareka to ngakau: naku ïa e apai atu i taua kainga vine o Nabota i Iezereela ra noou.

8 Kua tata iora aia i te leta i te ingoa o Ahaba, e kua topiri i te topiri nona; e kua akau akera i taua leta ra ki te aronga pakari, e te aronga mamaata, no te oire i nooia e Nabota ra.

9 Kua na ko akera aia i te tata i roto i taua leta ra, E tutu ana i te akakoreanga kai, ka tuku ei ia Nabota ki runga ravao i te au tangata ra:

10 Ka arataki mai ei i te toko rua puke tangata kanga ki mua i tona aroaro, e na raua e tapepe mai iaia, ka na ko ei e, Kia akakino koe i te Atua ma te ariki ra. Ka rave ei ka apai ki vao, ka peî ki te toka, kia mate.

11 Kua akapera oki te au tangata no tona oire, te aronga pakari, e te aronga mamaata i noo i tona oire ra, i ta Iezebela i akau mai kia ratou, mei tei tataia i te leta tana i akau kia ratou ra.

12 Kua tutu aere ratou i te akakoreanga kai, e kua tuku atura ia Nabota ki runga ravao i taua au tangata ra.

13 Kua aere maira e toko rua puke tangata kanga, e kua noo ki mua iaia; kua tuatua akera aua puke tangata kanga ra ia Nabota, i te tapepe anga mai iaia ki mua i te aroaro o te au tangata, na ko maira, Kua akakino a Nabota i te Atua ma te ariki ra. Kua apai iora ratou iaia ki vao mai i taua oire ra, e kua peî iaia ki te toka, e mate rava akera.

14 Kua tono akera ratou i te veka kia Iezebela, karanga atura, Kua peîiā Nabota ki te toka, e kua mate rava.

15 E kite akerā Iezebela e, kua peîiā Nabota, e kua mate rava, kua karanga aturā Iezebela kia Ahaba, Ka tu, ka rave i te kainga vine o Nabota i Iezereela, tei kore i orongaia mai e ia kia koe i te moni ra: kare oki a Nabota i ora, kua mate ïa.

16 E kite akerā Ahaba, e kua mate a Nabota, kua tu akerā Ahaba ki runga, e aere ki raro e rave i te kainga vine o Nabota i Iezereela ra.

17 Kua tae maira te tuatua a Iehova kia Elia i Tisibi ra, na ko maira,

18 Ka tu, ka aere e aravei atu i te ariki o Iseraela ia Ahaba i Samaria: i na, tei roto aia i te kainga vine o Nabota ra, kua aere oki aia ki reira e rave i taua kainga ra.

19 E naau e karanga atu kiaia, na ko atu, Te na ko mairā Iehova, Kua ta oki koe, e kua rave oki? E karanga atu rai koe kiaia, e na ko atu, Te na ko mairā Iehova, I te ngai i mitimitiiaʼi te toto o Nabota e te puaka aoa ra, e mitimiti katoaʼi te puaka aoa i toou toto, i toou tikai.

20 Kua karanga aturā Ahaba kia Elia, Kua kitea au e koe, e toku enemi? Kua tuatua maira aia, Kua kitea rai koe e au: no te mea kua oronga koe ia koe uaorai ei rave i te kino i mua i te aroaro o Iehova.

21 I na, ka apai mai au i te kino ki runga ia koe na, e ka raveia e au toou ra uanga, e te au tane katoa na Ahaba ka tipu keia e au, mopani uaiaʼi aia ra e ngaro ua atu i roto ia Iseraela;

22 E ka akariro au i toou ra ngutuare mei te ngutuare o Ieroboama te tamaiti a Nebata ra, e mei te ngutuare o Baasa te tamaiti a Ahia ra, i te akakoko oki taau i akakoko mai iaku kia riri, i ara ai oki Iseraela ia koe ra.

23 Ia Iezebela, kua tuatua mai oki a Iehova iaia, na ko maira, Ka kaiiā Iezebela e te puaka aoa i raro ake i te patu i Iezereela.

24 To Ahaba kia mate i roto i te oire ra, na te puaka aoa ïa e kai; e tei mate i te kainga ra, na te manu o te reva e kai.

25 Kare oki a Ahaba e aite, ko tei oronga iaia uaorai ei rave i te kino i mua i te aroaro o Iehova, i ta te vaine nana i ta Iezebela i tomatoma ra.

26 E mea rikarika maata rava tana i rave, i te aru anga i te au idolo ra, mei te au mea katoa ta te ngati Amori i rave ra, tei tuaruia e Iehova i mua i te aroaro o te tamariki a Iseraela ra.

27 Tei te akarongo anga mai a Ahaba i teianei au tuatua, kua aae iora aia i ona kakau, kua tuku akera i te kakau paoa ki runga iaia, e kua akakore iora i te kai, moe iora ki roto i taua kakau paoa ra, e kua aere marie iora.

28 Kua tae maira te tuatua a Iehova kia Elia i Tisibi, na ko maira,

29 Te kite ra koe i ta Ahaba taakaaka anga mai ki mua iaku nei? no te mea kua taakaaka mai aia ki mua iaku nei, kare au e apai mai i taua kino nei i tona tuatau; kia tae ra ki to te tamaiti ra tuatau, ka apai mai ei au i taua kino nei ki runga i tona ngutuare.