Ezekiela

37 TEI runga maira te rima o Iehova iaku, e kua apaiia au i te Vaerua o Iehova ra, e kua tuku iora iaku ki raro i rotopu i tetai o i ki i te ivi.

2 E kua arataki aia iaku na vaitatao i te reira e pini rava ake: e i na, e manganui ua atu i taua o atea ka ua ra; e i na, kua marō takiri.

3 E kua tuatua maira aia kiaku, E te tamaiti a te tangata na, e ora ainei teianei au ivi? E kua karanga atura au, E te Atu ra e Iehova, ko koe oki te kite.

4 E kua tuatua maira aia kiaku, Ka totou ki runga i teianei au ivi, ka karanga atu ei kia ratou, E teianei au ivi marō, e akarongo mai i te tuatua a Iehova.

5 Te na ko maira te Atu ra ko Iehova ki teianei au ivi; I na, e tuku au i te aʼo ki roto ia kotou, e e ora ïa kotou:

6 E naku e tuku i te uaua ki runga ia kotou, e naku e akatupu i te kiko ki runga ia kotou, e e tapoki ia kotou ki te kiri, e tuku oki i te aʼo ki roto ia kotou, e e ora ïa kotou: e kite oki kotou e ko Iehova au.

7 Kua totou atura au mei tei akaueia mai au ra: e te totou ua ra au ra, ko te aruru maira, e i na, e keukeu anga, e te momoko ra te au ivi, te ivi ki tona ivi.

8 E i taua akara ua anga noku ra, i na, te tupu ua maira te uaua, e te kiko, ki runga ia ratou, e kua tapoki maira te kiri na rungao ia ratou: kare ra e aʼo o roto ia ratou.

9 Kua tuatua maira aia kiaku i reira, Ka totou koe ki te aʼo, ka totou, e te tamaiti a te tangata na, ka karanga atu koe ki te aʼo ra, Te na ko maira te Atu ra ko Iehova; Ka aere mai, e te aʼo e, mei nga matangi mai e a ra, e akapuangi mai ki runga i te aronga i mate nei, kia ora ratou.

10 Kua totou atura au i tana i akaue mai kiaku ra, e kua aere maira te aʼo ki roto ia ratou ra, e kua ora iora ratou, e kua tu maira ki runga i to ratou vaevae e nuku maata rava atura.

11 Kua tuatua maira aia kiaku i reira, E te tamaiti a te tangata na, ko teianei aronga ivi, ko te ngutuare katoatoa ïa o Iseraela: te tuatua nei ratou, I na, kua marō to tatou au ivi, e kua kore to tatou manakonako anga; ko tatou nei oki, kua tipu keia ïa.

12 E teianei, ka totou koe, e karanga atu kia ratou, Te na ko maira te Atu ra ko Iehova; I na, e taku au tangata e, e eeu au i to kotou au vaarua, e e arataki mai au ia kotou mei raro mai i to kotou au vaarua, e e arataki au ia kotou ki te enua o Iseraela.

13 E kite oki kotou e ko Iehova au, kia eeu au i to kotou au vaarua, e taku au tangata e, e kia arataki mai au ia kotou mei raro mai i to kotou au vaarua ra;

14 E naku e tuku i taku Vaerua ki roto ia kotou, e e ora ïa kotou, e naku e akamou ia kotou ki to kotou uaorai enua: ei reira kotou e kite ei e, naku na Iehova i tuatua, e naku oki i rave, te tuatua mairā Iehova.

15 Kua tae maira oki te tuatua a Iehova kiaku nei, na ko maira,

16 Ko koe oki, e te tamaiti a te tangata na, ka rave koe i tetai rakau naau, ka tataʼi ki rungao, Na Iuda, e na te au tamariki a Iseraela, tona aronga oa: e ka rave oki i tetai rakau ke, ka tataʼi ki rungao, Na Iosepha, te rakau na Epheraima, e te ngutuare ravarai o Iseraela, te au oa nona ra:

17 Ka paʼu atu ei tetai ki tetai kia okotai rai rakau; e ka riro raua ei okotai i roto i to rima na.

18 E kia tuatua mai te au tamariki a toou au tangata ra kia koe, kia na ko mai, Kare ainei koe e akakite mai kia matou, eaa tena kia koe na?

19 E karanga atu koe kia ratou, Te na ko maira te Atu ra ko Iehova; I na, e rave au i te rakau a Iosepha i roto i te rima o Epharaima, e nga kopu o Iseraela, i tona au oa, ka tuku atu ei ia ratou kiaia, ki te rakau a Iuda, ka akariro atu ei ia ratou ei rakau okotai, ka riro oki ei okotai i toku nei rima.

20 E aua nga rakau i tataia e koe ki rungao ra, ei roto ïa i to rima ki mua i to ratou mata,

21 Ka karanga atu ei kia ratou, Te na ko maira te Atu ra ko Iehova; I na, e rave mai au i te au tamariki a Iseraela mei roto mai i te au etene i riro atu ei ratou ra, e naku ratou e akaputuputu mai i te au ngai katoa ra, e ka arataki ia ratou ki to ratou uaorai enua:

22 E naku e akariro ia ratou ei vaka tangata okotai ki runga i te enua nei, ki runga i te au maunga i Iseraela nei; e ka okotai oki ariki ei ariki no ratou ravarai: e kare oki e riro akaou e kia rua vaka tangata, e kare e vee akaouia kia rua basileia.

23 Kare ratou e akaviivii akaou ia ratou uaorai ki to ratou au idolo, e ta ratou au mea viivii, e ta ratou au ara katoa ra: naku ra e akaora ia ratou i roto i te au ngai i noo ei ratou ra, i ara ai ratou ra, e naku e tamā ia ratou: e ei tangata ratou noku, e ei Atua oki au no ratou.

24 E ko taku tavini ko Davida, ei ariki ïa ki runga ia ratou: e okotai rai tiaki ki runga ia ratou ravarai: e aaere oki ratou na taku ra au tuatua-tau, e ka akono ratou i taku ra au akonoanga, ka rave oki i te reira.

25 E noo oki ratou ki te enua i orongaia e au no taku tavini no Iakoba, tei nooia e to kotou ai metua ra; ka noo ratou ki reira, ko ratou e ta ratou au tamariki, e te tamariki a ta ratou ra au tamariki, e tuatau ua atu: e taku tavini ko Davida, ko to ratou ïa ariki e tuatau ua atu.

26 E papau oki au i tetai koreromotu au ia ratou, ka riro ïa ei koreromotu mutu kore ia ratou: e naku ratou e akanoo, e naku ratou e akamaata, e naku e tuku i taku ngai-tapu i rotopu ia ratou e tuatau ua atu.

27 Ei i o ratou taku puakapa vai ei: e ei Atua au no ratou, e ei tangata ratou noku.

28 E kite oki te au etene e, naku na Iehova, e akatapu ia Iseraela, kia vai marie taku ngai-tapu i rotopu ia ratou e tuatau ua atu.