Salamo

48 E MAATĀ Iehova, e kia maata tonha akapaapaa angaia, i te oire o to tatou Atua, i tona ra maunga tapu.

2 Manea to te turanga, e rekareka anga no te enua katoa, taua maunga ra ko Ziona, tei te pae i apatokerau ra, te oire o te ariki maata:

3 I roto i tona ra au punanga, ko te Atua te akapuanga i kitea.

4 I na oki, kua uipa te ui ariki; kua na reira anake i te aere.

5 Kia akara ra ratou, kua va ua iora; kua tumatetenga iora, riro viviki atura.

6 Rokoia iora ratou e te rutetetete i reira; te mamae maata, mei to te anau tamariki ra.

7 I te matangi ra e maoake e akangaangaaʼi koe i te au pai Taresisa ra.

8 Mei ta tatou i akarongo akenei, koia rai ta tatou i kite, i te oire o Iehova Sabaota ra, i te oire o to tatou Atua: na te Atua ïa e akatinamou e tuatau ua atu. Sela.

9 Kua akamaara matou i aroa takinga-meitaki, e te Atua e, i rotopu i toou uaorai nao.

10 Mei toou katoa ra ingoa, e te Atua, koia katoa te akameitaki ia koe e tae ua atu ki te openga o te enua ra: kua ki oki to rima katau i te tuatua-tika ra.

11 Kia mareka te maunga ra ko Ziona, kia pingapingareka te au tamaine i Iuda, i te au tuatua-tau naau ra.

12 E akapini ana ia Ziona, ka takako iaia e pini ua ake, ka tatau i to reira au are teitei.

13 Ka akara meitaki ana i te au patu akaketaketa, e akamaara i tona au punanga: ei tuatua anga na kotou i tera atu uki.

14 Ko te Atua nei rai oki to tatou Atua e tuatau e tuatau ua atu: e arataki rai oki aia ia tatou e mate ua atu.