Salamo

141 E IEHOVA, te kapiki atu nei au ia koe; e ngakoikoi mai koe iaku nei; kia kapiki au ia koe ra, e akarongo mai koe i toku reo. 2 Kia ana atu taku pure ki mua ia koe mei te atinga kakara ra; te apai anga o toku rima ki runga mei te atinga kai aiai ra. 3 E tuku mai koe, e Iehova, i te tiaki i toku nei vaa, ei tiaki i te ngutupa o toku nei ngutu. 4 Auraka toku ngakau kia tae ki te mea kino ra, ka rave ei i te angaanga kikino, ma te au tangata i rave i te mea kino ra; e ta ratou au kai memeitaki ra, auraka rava au e kai ua atu. 5 Ka pāpā mai te tangata tuatua-tika ra iaku, e mea takinga-meitaki ra ïa; ka akamura mai oki aia iaku ra, ka riro ïa mei te manongi meitaki ra, kare toku mimiti e paruparu i te reira: ka pure rai oki au me rokoia ratou e te tumatetenga ra. 6 Kia uriia to ratou au akava na runga i te ngai tokatoka ra, ei reira ratou e akarongo mai ei i taku nei tuatua, e mea meitaki oki te reira. 7 Mei te tangata kia tipu e kia pāpā i te vaie ki runga i te enua nei, kua pueurikiriki ke to matou au ivi i te nia o te rua nei. 8 Tei ia koe ra, e te Atu, e Iehova, toku mata; te irinaki nei au ia koe; auraka toku vaerua kia akaruke takiriia. 9 Kia ora au i te ereere ta ratou i tuku mai iaku ra; e te au ere a te aronga i rave i te kino ra. 10 Kia inga katoa atu te aronga kino ra i roto i ta ratou uaorai au kupenga; kareka au nei, kia aere ua atu ïa ma te ora.