Salamo

119 E AO to te aronga apa kore i te arataa, ko tei aaere na te ture a Iehova. 2 E ao to tei akono i tana au tuatua-akakite, ko tei kimi iaia ma te ngakau katoa. 3 Kare oki ratou i rave i te ara: kua aere ratou na tona ra au arataa. 4 Kua akaue mai koe, kia akono tikai matou i taau au ikuiku anga. 5 Naringa i tano tikai toku nei au aerenga i te akono marie anga i taau au akonoanga! 6 Ei reira au kare e akamaʼi, kia akono au i taau ra au akauenga katoa. 7 E akameitaki au ia koe ma te ngakau tiratiratu, kia kite au i taau ra akatauanga tuatua-tika. 8 Ka akono au i taau ra au akonoanga; auraka e akaruke takiri mai iaku. 9 E akapeea te tangata ou i te tamā anga i tona arataa? i te akono marie anga kia tau ki taau ra tuatua. 10 Kua kimi au ia koe ma toku ngakau katoa: auraka au kia tatipake i taau ra au akauenga. 11 Kua uuna au i taau tuatua ki roto i toku ngakau, kia kore au e ara ia koe ra. 12 Kua akameitakiia koe, e Iehova! e apii mai koe iaku i taau ra au akonoanga. 13 Te akakite nei toku ngutu i te au tuatua-tau katoa no roto i toou ra vaa. 14 Te rekareka nei au i te arataa o taau au tuatua-akakite, e iti rava to te apinga tini ravarai: 15 Ka akamaara rai au i taau ra au ikuiku anga, e akono rai au i taau ra au arataa. 16 Ka rekareka au i taau ra au akonoanga; kare rava e ngaropoina iaku taau tuatua. 17 Kite meitaki mai koe i to tavini nei, kia ora au, e kia akono au i taau tuatua. 18 E akapuera mai koe i oku nei mata, kia kite au i te au mea taka ke i roto i taau ra ture. 19 E tangata ke au i te enua nei, auraka e uuna i taau ra au akauenga iaku nei. 20 Kua taravai toku vaerua i te inangaro anga i taau ra au tuatua-tau kare e rā e tukua. 21 Kua akamura koe i te aronga nengonengo i tei taumaaia ra, ko tei akaruke i taau au akauenga. 22 E akataka ke koe i te akakino e te akavaavaa iaku nei; kua akono oki au i taau au tuatua-akakite. 23 Kia noo te ui ariki e tuatua kino iaku ra, ka akamaara rai to tavini i taau ra au akonoanga. 24 Ko taau au tuatua-akakite, ko taku ïa e mataora, ko taku ia au tumu-korero. 25 Te piri nei toku vaerua ki te one; e akamaroiroi mai koe iaku i taau i tuatua maira. 26 Kua akakite au i toku au aerenga, e kua akarongo mai koe iaku; e apii mairai koe iaku i taau ra akonoanga. 27 E akakite mai koe kiaku i te arataa i ikuikuia e koe ra, kia tuatua au i te au angaanga taka ke naau ra. 28 Kua taravai toku ngakau i te aue: e akamaroiroi mai koe iaku i taau i tuatua maira. 29 E akamamao ke atu i te arataa pikikaa iaku, tuku aroa mai koe iaku i taau ra ture. 30 Kua anoano au i te arataa tuatua mou: taau ra au tuatua-tau, kua tukuia ïa ki mua iaku. 31 Kua piriakita au ki taau au tuatua-akakite: e Iehova, auraka au kia taakamaia. 32 Ka oro au na te arataa taau i akaue maira, kia akamaoraoraia e koe toku nei ngakau. 33 E apii mai koe iaku, e Iehova, i te arataa ra o taau au akonoanga, e ka akonoia e au e tae ua atu ki te openga ra. 34 E apii mai koe iaku kia akono au i taau ture, ka akono rai au i te reira ma te ngakau katoa ra. 35 E arataki koe iaku na te arataa ra o taau au akauenga; e mea mataora oki naku te reira. 36 E akaariu i toku ngakau ki taau au tuatua-akakite, e auraka ki te noinoi apinga. 37 E akaariu ke i toku mata kia kore e akara i te mea puapinga kore; akamaroiroi koe iaku i toou ra arataa. 38 E akatinamou koe i taau tuatua ki to tavini nei, tei mataku ia koe ra. 39 E akaoki ke atu koe i te akakino taku e mataku nei; te meitaki nei oki taau tuatua-tau iaku nei. 40 I na! te anoano nei au i taau ra au ikuiku anga; e akamaroiroi mai iaku i te tuatua-tika naau ra. 41 E akatae mai to aroa kiaku nei, e Iehova: i te ora naau, i taau oki i tuatua maira. 42 Ei reira au nei e tikaʼi kia patoi atu i tei akakino mai iaku nei: no te mea te irinaki nei au i taau tuatua. 43 Auraka e kiriti takiriia te tuatua-mou i toku nei vaa; te irinaki nei au i te au tuatua-tau naau ra. 44 Ka akono tamou rai au i taau ra ture, e tuatau, e tuatau ua atu. 45 Ei reira au e aere mateatea uaʼi, kia kimi au i taau au ikuikuanga. 46 Ka tuatua katoa oki au i taau au tuatua-akakite ki mua i te aroaro o te ui ariki, kare oki au e akama. 47 Ka mataora rai au i taau ra au akauenga, tei inangaroia e au nei. 48 E akatika atu au i oku puke rima ki taau au akauenga, taku i inangaro nei; ka akamaara rai au i taau ra au akonoanga. 49 E akamanako i taau tuatua ki to tavini nei, i taau i akariro ei irinaki anga noku ra. 50 Ko toku teia pumaana kia mate au ra; na taau tuatua oki i akamaroiroi iaku. 51 E taitoito maata to te aronga nengonengo iaku ra; kare ra au i ariu ke mai i taau ra ture. 52 Te manako nei au i taau ra au tuatua-tau taito, e Iehova, e kua akapumaana au iaku uaorai. 53 Kua rokoia au e te koiriria i te aronga kino, ko tei akaruke i taau ture. 54 Ko taau ra au akonoanga, ko taku ïa imene, i te are o toku tuitarere anga nei. 55 Te manako nei au i toou ra ingoa, e Iehova, i te po; e kua akono au i taau ra ture. 56 Ko toku ïa maru ko au i akono i taau ra au ikuiku anga. 57 Ko koe taku nei tuanga, e Iehova; kua akakoro au e akono i taau tuatua. 58 Te umuumu nei au i to mata ma te ngakau katoa nei; e aroa mai iaku i taau i tuatua maira. 59 Kua manako au i toku au aerenga, e kua akaoki i oku puke vaevae ki taau au tuatua-akakite. 60 Te ngakoikoi nei au, kare i tavare, i te akono anga i taau ra au akauenga. 61 Kua akapiniia au e te ereere a te aronga kino kare rai i ngaropoina taau ture iaku nei. 62 Ei te turuaipo au e tu ei ki runga e akameitaki ia koe, no taau au akatauanga tuatua-tika. 63 E tangata tau oki au ki te aronga ravarai e mataku ia koe ra; e te aronga e akono i taau ra au ikuikuanga. 64 Kua ki te enua nei, e Iehova, i te takinga-meitaki oou na: e apii mai koe iaku i taau ra au akonoanga. 65 Te takinga-meitaki nei koe i to tavini, e Iehova, i taau oki i tuatua maira. 66 E akakite mai koe kiaku i te akono meitaki e te karape: te irinaki nei oki au i taau ra au akauenga. 67 Kare au i maki ra, kua aere ke au; i teianei ra te akono nei au i taau tuatua. 68 E meitaki toou, e te takinga-meitaki; e apii mai iaku i taau ra au akonoanga. 69 Kua akatupu te aronga nengonengo i te tuatua pikikaa iaku: te akono nei ra au ma te ngakau katoa i taau ra au ikuiku anga. 70 Kua matu to ratou ngakau mei te tongaua: te pingapingareka nei ra au i taau ture. 71 Meitaki akera au ko au i maki ra, no te mea kua kite akera au i taau ra au akonoanga. 72 Meitaki maata to te ture a to vaa ra iaku, i te auro e te ario e kia tausani ua atu. 73 Na to rima au i anga e kua akaaite i toku tu: e apii mai koe iaku kia kite au i taau ra au akauenga. 74 Ko te aronga i mataku ïa koe ra, ka rekareka ïa kia akara mai iaku, no te mea kua irinaki au i taau tuatua. 75 Kua kite au, e Iehova, e tuatua-tika taau ra au tuatua-tau, e no te tuatua-mou naau ra i akatumatetenga mai ei koe iaku ra. 76 E teianei kia riro toou aroa ei akamaru mai iaku, i taau oki i tuatua mai ki to tavini nei. 77 Kia riro mai oki to aroa maata ra iaku, kia ora au; kua mataora oki au i taau ture. 78 Kia akama atu te aronga nengonengo; kua takinga-kino ua mai ratou iaku; te akaeatu nei ra au i taau ra au ikuiku anga. 79 Ko te aronga i mataku ia koe ra tei ariu mai kiaku nei; e tei kite i taau au tuatua-akakite. 80 Kia apa kore toku ngakau i taau ra au akonoanga, kia kore rava au e akama. 81 Kua ngaeva ua toku vaerua i te ora naau; te irinaki nei ra au i taau tuatua. 82 Te poepoe nei toku mata i taau tuatua; i te na ko anga e, Aea koe e akamaru mai ei iaku? 83 Mei te ue kiri i roto i te auai ra au; kare rai i ngaropoina taau ra au akonoanga iaku. 84 Takiia o to tavini nei au rā? aea ra koe e akautunga mai ei i tei takinga-kino mai iaku? 85 Kua ko te aronga nengonengo i te vaarua iaku: ko tei kore e akono i taau ra ture. 86 E tuatua-mou anake taau ra au akauenga; kua takinga-kino tumu kore ua mai ratou iaku; turu mai koe iaku. 87 Me pou takiriia au e ratou i te ao nei, kare ra au i akaruke i taau ra au ikuiku anga. 88 E akamaroiroi mai koe iaku i te aroa noou ra: kia akono au i te tuatua-akakite a to vaa na. 89 Te akatinamouia ra e Iehova taau tuatua e rimua i te au rangi ra. 90 E vai rai te tuatua-mou naau i tera uki i tera uki: kua akatinamou koe i te enua, e te vai marie nei. 91 Taau i akono ra, te vai ua nei ra ïa e tae rava akenei ki teianei rā; e tavini anake te au mea i angaia ra noou. 92 Auraka au i pingapingareka i taau ra ture, kua mate ïa au i toku tumatetenga anga ra. 93 Kare takiri e ngaropoina iaku taau au ikuiku anga; kua akamaroiroiia au e koe i te reira. 94 Noou au nei; akaora iaku, te kimi nei oki au i taau ra au ikuiku anga. 95 Te tapapa maira te aronga kino kia mate au ia ratou: te akamaara nei ra au i taau au tuatua-akakite. 96 Kua kitea e au te openga o te au mea memeitaki katoa nei; ko taau ra akauenga, te pararauare maata roa ra ïa. 97 Te maata rava nei toku inangaro i taau ra ture! ko toku ïa maaraara anga i te au rā katoa nei. 98 E kite maata toku ia koe i te au akauenga naau ra, i to toku au enemi ra; e tika oki i te vai marie anga i vaitata iaku. 99 E kite maata toku i to taku au orometua katoa ra: no te mea te akaeatu nei au i taau au tuatua-akakite. 100 E kite maata toku i to te aronga taito ra; no te mea te akono nei au i taau ra au ikuiku anga. 101 Ta tāpu nei au i oku puke vaevae i te au arataa kikino ravarai, kia akono au i taau tuatua. 102 Kare au i akaruke i taau ra au tuatua-tau: no te mea kua apii mai koe iaku. 103 Ko te vene o taau nei tuatua i toku nei tongi anga e! e venereka ïa to te reira i to te meli i toku nei vaa. 104 No taau ra au ikuiku anga i raukaʼi iaku te kite; i rikarikaʼi au i te au arataa pikikaa ravarai. 105 E lamepa taau tuatua i toku nei vaevae, e turama no toku nei arataa. 106 Kua taputou au, e e akono au i te reira ra, e akono rai au i te au akatauanga tuatua-tika naau ra. 107 E tumatetenga maata toku: e akamaroiroi mai koe iaku, e Iehova, i taau i tuatua maira. 108 Te pure atu nei au ia koe, e Iehova, e āriki mai koe i ta toku vaa e oronga ua atu nei, e apii mai koe iaku i taau ra au tuatua-tau. 109 Tei toku rima nei toku vaerua, kare i tukumoe: kare rai i ngaropoina iaku taau ture. 110 Kua tuku te aronga kino i te ereere iaku; kare rai au i tatipake i taau ra au ikuiku anga. 111 Te inangaro nei au i taau au tuatua-akakite ei tuanga naku e tuatau ua atu; ko ta toku ngakau oki ïa rekareka anga. 112 Te akaariu nei au i toku ngakau kia rave tamou i taau ra au akonoanga, e tae ua atu ki te openga. 113 Te rikarika nei au i te au manako puapinga kore ra, te inangaro nei ra au i taau ture. 114 Ko toku akapuanga koe e toku paruru; te irinaki nei au i taau tuatua. 115 Kia atea ke atu kotou iaku nei, e te aronga ravenga kino ra, ka akono rai au i te au akauenga a taku Atua. 116 E mou mai koe iaku i taau i tuatua maira, kia ora au; e auraka au kia akama i taku e irinaki nei. 117 E tāpu mai koe iaku, ka ora ïa au i reira; ei reira au e akono tamou ei i taau au akonoanga. 118 Te aronga ravarai i akaruke i taau ra au akonoanga, kua takatakaiia e koe ki raro: e mea pikikaa oki to ratou pakari. 119 Kua akakoreia e koe te aronga kino katoa o te enua nei mei te ota: i inangaro atu ei au i taau ra au tuatua-akakite. 120 Te rutetetete nei toku kopapa i te mataku ia koe, e te mataku nei au i taau ra au tuatua-tau. 121 Kua akatupu au i te tuatua-tau e te tika; auraka e akaruke ua iaku ki te aronga takinga-kino mai. 122 Ei tupae koe no to tavini kia meitaki aia; auraka te nengonengo e takinga-kino mai iaku. 123 Kua poepoe toku mata i te ora naau e i te tuatua o taau ra tuatua-tika. 124 Ko taau e rave i to tavini nei, kia tau ïa ki toou ra aroa; e apii mai oki iaku i taau ra au akonoanga. 125 Ko to tavini oki au; e apii mai iaku, kia kite au i taau ra au tuatua-akakite. 126 Ko te tuatau tika teia, e Iehova, kia angaanga koe: kua akakore oki ratou i taau ture. 127 I maataʼi toku inangaro i taau au akauenga, i to te auro, i te auro i mā meitaki ra. 128 I manako ei au i taau ra au ikuiku anga katoa, e mea tika anake; te rikarika nei ra au i te au arataa pikikaa ravarai. 129 E mea vavaria taau ra au tuatua-akakite; i akono ei oki toku vaerua i te reira. 130 Tei te eeu anga o taau ra tuatua e māramaʼi, e kite ei te tangata kamakura ra. 131 Kua amama au i toku vaa e nga akera; kua anoano oki au i taau au akauenga. 132 E akara mai koe iaku, e aroa mai oki iaku mei taau ra oki i mātau i te aronga i inangaro mai i toou ra ingoa. 133 E akaaiteite ana koe i toku aerenga ki taau ra tuatua; e auraka rava e kino kia akaapo mai ki runga iaku. 134 E akaora koe iaku i te takinga-kino o te tangata nei; ei reira au e akono ei i taau ra au ikuiku anga. 135 E akakakā mai i to mata ki runga i to tavini nei; e apii mai oki i taau ra au akonoanga. 136 Te maringi a vai ua nei toku roimata, no te mea kare ratou i akono i taau ra ture. 137 E tuatua tika taau, e Iehova, e te tiratiratu oki taau ra au tuatua-tau. 138 E tuatua-tika taau au tuatua-akakite taau i akaue maira, e e tuatua-mou anake ïa. 139 Kua pou roa au i toku nei maroiroi, no te mea kua akapoina toku au enemi i taau tuatua. 140 E tuatua mā meitaki roa taau tuatua; i inangaro ei oki to tavini i te reira. 141 Iti ua rai au, e te akavaavaaia, kare rai i ngaropoina iaku taau au ikuiku anga. 142 Ko taau ra tuatua-tika, e tuatua-tika mutu kore ïa; e taau ra ture, ko te tuatua mou ïa. 143 Kua rokoia au e te tumatetenga e te mamae: te mataora nei ra au i taau ra au akauenga. 144 Te tikaanga o taau ra au tuatua-akakite, e mea mutu kore ïa; e apii mai iaku i te reira kia ora au. 145 Te kapiki nei au ma te ngakau katoa ra; e akarongo mai, e Iehova: e akono au i taau ra au akonoanga. 146 Te kapiki nei au ia koe: e akaora koe iaku; e e akono ïa au i taau ra au tuatua-akakite. 147 Kua tu au ki runga kare rai i ao, e kua kapiki atu: te irinaki nei au i taau tuatua. 148 Kua ara ana toku mata i te au araanga po ra, kia akamaara au i taau ra tuatua. 149 E akarongo mai i toku reo, i toou ra oki aroa; e Iehova, e akamaroiroi mai koe iaku i taau ra au tuatua-tau. 150 Te vaitata mai nei te aronga e aru i te kino ra; te aronga i mamao ke i taau ra ture. 151 Te vaitata maira oki koe, e Iehova, e te au akauenga katoa naau ra, e tuatua-mou ïa. 152 Kua kite takere ana au i taau ra au tuatua-akakite, e kua akatinamouia e koe e tuatau ua atu. 153 E akara ma koe i toku nei tumatetenga e e akaora iaku; kare oki taau ture i ngaropoina iaku. 154 E akatika mai koe i taku nei tuatua, e e akaora iaku; e akamaroiroi mai koe iaku i taau tuatua. 155 E mea mamao te ora i te aronga kino ra; kare oki ratou e kimi i taau ra au akonoanga. 156 Te maata nei toou aroa, e Iehova: e akamaroiroi mai koe iaku i taau ra au tuatua-tau. 157 E manganui te takinga kino iaku, e e akaenemi mai; kare ra au i akaruke i taau au tuatua-akakite. 158 Kua akara au i te aronga taitoito, e kua ongoongo oki au; no te mea kare ratou i akono i taau tuatua. 159 E akamaara mai i toku nei anoano i taau ra au ikuiku anga: e akamaroiroi mai koe iaku i toou ra aroa, e Iehova. 160 E tuatua-mou taau mei muatangana mai, e taau ra au akatauanga tuatua-tika katoa, e vai rai ïa e tuatau ua atu. 161 Kua takinga-kino tumu kore ua mai te ui ariki iaku; te mataku nei ra toku ngakau i taau tuatua. 162 Te rekareka nei au i taau tuatua, mei te tangata i kitea e ia te apinga maata. 163 E rikarika toku e te makitakita i te tuatua pikikaa; kareka taau ture, ko taku ïa i inangaro. 164 Taki itu aku akameitaki anga ia koe i te rā okotai, i taau ra tuatua-tika i akatauia ra. 165 E au maata to te aronga i inangaro i taau ture; kare o ratou e turorianga. 166 I tiaki ua ana au i te ora naau, e Iehova; e kua akono au i taau ra au akauenga. 167 Te akono nei toku vaerua i taau au tuatua-akakite: inangaro maata toku i te reira. 168 Ko taau ra au ikuiku anga, e taau ra au tuatua-akakite, kua akonoia e au; ko toku nei au aerenga katoa oki, tei mua ïa ia koe ra. 169 Kia tae atu toku reo kia koe, e Iehova, e apii mai koe iaku i taau ra tuatua. 170 Kia tae oki taku pati anga i mua ia koe; kia ora oki au i taau i tuatua maira. 171 E akameitaki ua atu toku vaa, kia apiiia au e koe i taau ra au akonoanga. 172 Ka tuatua nui toku arero i taau ra tuatua; e mea tika oki te au akauenga katoa naau ra. 173 E tauturu to rima iaku; e mea ikiia e au taau ra au ikuiku anga. 174 Te anoano nei au i te ora naau, e Iehova; e taau ra ture, e mea mataora ïa naku. 175 Kia ora taku vaerua, kia akameitaki ia koe ra; e na taau ra au tuatua-tau e tauturu mai iaku. 176 Kua aere ke au mei te mamoe i ngaro ra; e kimi koe i to tavini; kare oki i ngaropoina iaku taau ra au akauenga.