Salamo

104 E AKAMEITAKI ia Iehova, e taku vaerua. E taku Atua, e Iehova, ko koe tei maata roa; kua vaîia koe ki te kakā e te mana. 2 I te akakakau anga ia koe uaorai ki te mārama mei te kakau ra: i te oora anga i te au rangi ra mei te paruru. 3 I te rangorango anga i tona ra au pia ki te vai: i te rave anga i te au tumurangi ei kariota nona: i te aaere anga na runga i te peau ra o te matangi: 4 I te akariro anga i te au angela nana ra mei te matangi, e te au tavini nona mei te ai mura. 5 Nana i akamou i te tumu o te enua, kia kore roa e ngaueue e tuatau ua atu. 6 Kua tapoki oki koe i te reira ki te moana mei te kakau ra: tu iora te au vai i runga atu i te au maunga. 7 Kia akamuraia e koe ra, rere atura; i te kokina o to mangungu ra, kua ngakoikoi atura i te aere. 8 Kua kake ratou i te au maunga, kua eke ratou i te au o, ki te ngai i akonoia e koe no ratou ra. 9 E kotinga tei akonoia e koe, kare ïa e topa ia ratou: kare e oki akaou mai e akanina i te enua. 10 Kua tuku mai koe i te au vai pupui ei vai peka, ko tei taʼe aere na roto i te va o te au maunga ra: 11 I reira te au puaka o te enua nei i te inu manga; te au asini momoavao i te akapangia anga i to ratou kaki. 12 I vaitatao te au manu o te reva i te noo anga, ko tei tangi i roto i te au rara ra. 13 Te akamauu nei koe i te au tuaivi no roto i toou ra au pia; te ki nei te enua i taau i akaua mai. 14 Te akatupu nei koe i te ngangaere na te au puaka, e te rakau rikiriki na te tangata: te rauka nei te kai no roto i te enua; 15 E te wina, e rekarekaʼi te ngakau o te tangata nei, te manongi, e inuinu ei tona mata, e te manga e maroiroi ei te ngakau tangata nei. 16 Te au rakau o Iehova ra, kua pakari ïa; te au arezi i Lebanona ra, tana i tanu ra; 17 Tei koangaia e te au manu ra: te au berusi ra, to te kasida ra are; 18 Te au maunga teitei ra, no te puaka-nio momoavao ïa; te au mato ra, e akapuanga ïa no te saphana. 19 Kua anga aia i te marama no te tuatau i akonoia ra: kua kite oki te rā i tona topa anga. 20 Naau i apai mai i te poiri, e kua po iora; ei reira te au puaka katoa o te vaorakau ra e aaere ua mai ei: 21 Te au liona ou i te ngunguru aere anga i te kai, e te kimi anga i ta ratou kai i te Atua. 22 Kua iti maira te rā, kua oki ratou, e kua moe i roto i to ratou au vaarua: 23 Kua aere iora te tangata ki te angaanga nana, e tana e rave ra, e aiai atu. 24 Tumatatini taau ra angaanga, e Iehova e! e au ravenga pakari anake rai taau: kua ki te enua nei i taau ra apinga. 25 E tenana oki tai maata e te pararauare, tei reira te au mea totoro aere ua ra, kare e ope kia tatau ra; te au mea rikiriki ra, e te mamaata katoa ra. 26 Tei reira te au pai i te tere aere anga: e taua Leviatana ra taau i anga i te tarekareka aere anga. 27 Te tiaki anake ra te reira ia koe ra, kia rauka ta ratou kai i te tuatau tikai ra. 28 Ko taau i oronga ra, ko ta ratou ïa i rave: kua eeu koe i to rima ra, kua ki ïa ratou i te meitaki: 29 Kua puroku koe i to mata ra, tumatetenga ïa to ratou: kua rave mai koe i to ratou aʼo, kua mate ratou, e kua oki akaou ki to ratou ra one. 30 Kua tono maira koe i to Vaerua, kua angaia ratou: e kua rave akaou koe i te aro o te enua. 31 E vai rai te kakā o Iehova e tuatau ua atu; te rekareka nei a Iehova i tana uaorai ra angaanga. 32 Kua akara ua aia ki te enua, kua rutetetete ïa; kua akatukia ua aia i te au maunga ra, kua peke te auai ki runga. 33 Te ora nei au ra, ka imene rai au kia Iehova; te vai nei au ra, ka imene akameitaki au i taku Atua. 34 Kia pereperekavana aia i toku maaraara anga; ka rekareka oki au ia Iehova. 35 Te aronga rave ara ra, ka pou ïa i te enua nei; e te aronga kikino ra, kare rava ïa: e akapaapaa ia Iehova, e taku vaerua e. Alelu Ia.