Kolosa

3 E TENANA kua akatuia akenei kotou ki runga e te Mesia katoa ra, ka kimi i te au mea ki runga, i te ngai i nooia e te Mesia i te rima katau o te Atua ra.

2 E akamou i to kotou ngakau i te au mea ki runga ra, auraka i to teianei ao.

3 Kua mate oki kotou, e tei ko i te Mesia ra to kotou ora i te uuna angaia, tei te Atua.

4 E kia mama mai te Mesia, tei iaia to kotou ora i te vai ranga, ei reira katoa kotou e kitea katoaia ma ia katoa i te ao ra.

5 E tenana ka tamate i to kotou au melo i te au mea o teianei ao; te akaturi, te tuatua viivii, te anoano viivii ra, te inangaro tika kore, e te noinoi apinga, e akamori idolo oki te reira:

6 No taua au mea ra i rokoia mai ei te tamariki akarongo kore i te riri o te Atua:

7 Ko ta kotou ïa au mea i akono i muatangana, i to kotou noo anga i roto ia ratou ra.

8 I teianei ra, e kopae atu kotou i taua au mea katoa nei, te riri, te makitakita, te vareae, te akakino, te tuatua viivii ra, i to kotou vaa.

9 Auraka e pikikaa tetai ki tetai, kua kopae oki kotou i te tangata taito ra e tana katoa au ravenga;

10 E kua akatangata ou, ko tei akaouia i te kite mei te tu katoa o Tei anga iaia ra:

11 Kare oki e Eleni e te ngati Iuda, kare e peritome e te peritome kore, kare e tangata maori, e te Sekuti, kare e tuikaa e te rangatira; tei te Mesia anake ra, e tei roto aia i te aronga katoa e akarongo ra.

12 E tenana, ka akangakau aroa ua e te takinga-meitaki, te akaaka, te maru, te akakoromaki maata, mei te aronga tapu e te akaperepereia, e te ikiia e te Atua ra:

13 E tauturu atu tetai ki tetai, e akakore tetai i ta tetai ara, e tapepeanga ta tetai ki tetai ra; mei te Mesia i akakore i ta kotou na, e akapera katoa kotou.

14 E ei runga ravao i taua au mea katoa nei e kakau na i te aroa, ko taua tatua apa kore ua ra ïa.

15 E te au o te Atua, ei mana ïa i roto i to kotou ngakau, i kapikiiaʼi oki kotou i te kopapa okotai; e kia mareka oki kotou.

16 Kia noo tika rai te tuatua a te Mesia i roto ia kotou e kia maata, ma te pakari; i te apii anga e te ako anga tetai ki tetai ma te salamo e te imene e te peʼe a te Vaerua, i te imene anga ma te aroa ua i roto i to kotou ngakau i te Atu.

17 E te au mea katoa ta kotou e rave ra i te angaanga e te tuatua, ka rave anake ïa ma te ingoa o te Atu ra o Iesu, ma te akameitaki i te Atua Metua iaia ra.

18 E te au vaine ra, e moraro marie kotou i ta kotou uaorai au tane, mei tei tau ïa i te Atu nei.

19 E te au tane ra, e aroa kotou i ta kotou au vaine ra, auraka e rotoriri atu ia ratou.

20 E te au tamariki e, e akarongo i to kotou au metua i te au mea katoa nei, e mea mareka te reira na te Atu.

21 E te au metua ra, auraka e akariri atu i ta kotou tamariki, ko te taitaia aea ratou.

22 E te au tavini ra, e akamako atu i to kotou au pu i te kopapa nei i te au mea ravarai; auraka ei akarongo mata mei te tarekareka tangata ra; ma te ngakau tika ra, i te mataku anga i te Atua ra:

23 E ta kotou au mea e rave ra, e rave ïa ma te ngakau katoa, mei te mea e na te Atu, eiaa e na te tangata;

24 Kua kitea oki e, e rauka mai ta kotou tutaki i te tuanga i te Atu; te tavini nei oki kotou i te Atu ra i te Mesia:

25 Ko tei rave i te tuatua-tika kore ra, e tutakiia mai ïa no taua tuatua-tika kore tana i rave ra; kare oki te tu o te tangata e akonoia.