Ebera

8 E TEIANEI, teia taua tuatua i karangaia nei: E taunga maata to tatou, te noo ra i te pae katau i te terono o Tei Maata i runga i te rangi;

2 E taunga no te ngai-tapu, i roto i te puakapa mou, ta te Atu i patia, kare ta te tangata.

3 I akatakaia oki te kau taunga nunui katoa ra, e apai i te atinga e te tarangaara ra; ei apinga katoa oki ta teianei taunga, kia apai e tikaʼi.

4 Naringa tei teianei ao aia, kare aia e riro ei taunga no te mea te vai nei te aronga taunga ko tei apai i te atinga e tau i te ture ra:

5 Ko tei rave i te taoonga i roto i te ngai-tapu ra, ko te tutu ïa e te ata o te au mea o te rangi ra, i tei apiiia mai e te Atua ia Mose ra, ka vaitataʼi aia i te anga i te Are ra, kua na ko maira oki aia, Ka akono meitaki na, e anga koe i te au mea katoa kia tau tikai i te tu i akakiteia atu ia koe i runga i te maunga ra.

6 Kareka i teianei e taoonga meitaki rava tei rauka i to tatou taunga maata, mei iaia katoa i riro ei Arai i te koreromotu meitaki maata ra, ko tei tinamouia i te tuatua meitaki maata i tuatuaia maira.

7 Naringa oki kare ua e mea toe i taua koreromotu mua ra, kare e akaoia mai te rua ra.

8 Kua na ko oki aia i te akaapa anga ia ratou ra, “I na, e tae maira te au rā, te tuatua mairā Iehova, e papau ei au, i te ngutuare o Iseraela e te ngutuare o Iuda, i tetai koreromotu ou:

9 Auraka ra mei te koreromotu taku i papau i to ratou ra au metua, i te rā i rave ei au i to ratou rima, e arataki mai ia ratou mei te enua maira mei Aiphiti; no te mea kare ratou i mou meitaki i taua koreromotu naku ra, e kare atura au i kite atu ia ratou ra, te tuatua mairā Iehova.

10 Teia te koreromotu, taku e papau i te ngutuare o Iseraela, i muri ake i te reira au rā, te tuatua mairā Iehova, E tuku au i taku au ture ki roto ia ratou, e e tataia e au ki runga i to ratou ngakau; e e riro au ei Atua no ratou, e e riro oki ratou ei tangata noku:

11 E kore oki ratou e apii, ko te tangata ko tona tangata tupu e ko te tangata ko tona taeake, i te na ko anga atu e, Kia kite ia Iehova: e ope akea ïa i te kite iaku, mei tei iti, e tae ua atu ki tei maata ra.

12 E aroa oki au ia ratou i ta ratou tuatua-tika kore, e to ratou kino e ta ratou au ara kare rava au e maara akaou atu.”

13 E teianei koia i tuatua e, E koreromotu ou, kua akariro aia i tei muatangana ra ei mea taito. Ko tei riro oki ei mea taito e kua piro ra, kua vaitata ïa i te ngaro ke.