1 Ioane

2 E AKU au tamariki ra, te tata nei au i teianei au tuatua kia kotou, kia kore kotou e rave i te ara. Kia rokoia atura tetai tangata i te ara, e Tika to tatou tei ko i te Metua ra, ko Iesu Mesia tuatua-tika ra:

2 Koia oki te tarangaara i ta tatou nei ara; kare oki i ta tatou anake ra, i ta to te ao katoa nei ra.

3 E ko teia te mea e kite ei tatou e kua kite tatou iaia, kia akono tatou i tana au akauenga.

4 Ko tei karanga e, kua kite au iaia, e kare aia i akono i tana au akauenga, e pikikaa aia, kare te tuatua-mou i roto iaia.

5 Ko tei akono ra i tana ra tuatua, kua meitaki tikai te anoano i te Atua i roto iaia: ko te mea i kite ei tatou e, tei roto tatou iaia ra.

6 Ko tei karanga e te piri ra aia kiaia, e akaarite i tona uaorai aerenga mei tona katoa ra aerenga e tikaʼi.

7 E aku au akaperepere e, kare i te akauenga ou taku e tata atu kia kotou na, ko te akauenga taito ra, ta kotou i kite mei muatangana mairai. Ko te tuatua ta kotou i akarongo mei muatangana maira, ko te akauenga taito ïa.

8 Te tata atu nei oki au i te akauenga ou kia kotou, e e tuatua-mou taua tuatua nei iaia e ia kotou katoa oki: no te mea kua peke ke te poiri, e te kakā maira te mārama mou i teianei.

9 Ko tei karanga e tei roto aia i te mārama, e kua makitakita i tona taeake, tei roto rai aia i te poiri i teianei rai.

10 Ko tei aroa i tona taeake, te noo ra ïa i roto i te mārama, e kare e turorianga i roto iaia.

11 Ko tei makitakita ra i tona taeake, tei roto ïa i te poiri, e te aere ua ra na roto i te poiri, e kare aia i kite i taua ngai tana e aere ra, no te mea kua akapoia tona mata i te poiri.

12 Te tata atu nei au i te tuatua kia kotou, e te au tamariki ra, no te mea kua akakoreia ta kotou au ara i tona ingoa.

13 E te au metua ra, te tata atu nei au i te tuatua kia kotou, no te mea kua kite kotou iaia tei mei muatangana mairai. E te au tangata ou ra, te tata atu nei au i te tuatua kia kotou, no te mea kua vi taua vaerua kino ra ia kotou. E te au tamariki ra, te tata atu nei au i te tuatua kia kotou, no te mea kua kite kotou i te Metua ra.

14 I tata atu na au i te tuatua kia kotou, e te au metua ra, no te mea kua kite kotou iaia tei mei muatangana mai. I tata atu na au kia kotou, e te au tangata ou ra, no te mea te maroiroi na kotou, e te vai ra te tuatua a te Atua i roto ia kotou na, e kua vi taua vaerua kino ra ia kotou.

15 Auraka e anoano i teianei ao, e te au mea ravarai o teianei ao. Ko te tangata i anoano i teianei ao ra, kare te anoano o te Metua i roto iaia ra.

16 Ko te au mea ravarai oki o teianei ao, ko te anoano tika kore o te kopapa nei, e te anoano tika kore o te mata nei, e te akatietie o te ora anga nei, kare ïa i to ko mai i te Metua ra, no teianei ao anake ïa.

17 Te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.

18 E aku au tamariki ra, ko te tuatau openga ra teia: e ta kotou i akarongo ra e, te aere maira taua Akakakore Mesia ra, koia katoa i teianei, e manganui te Akakakore Mesia e vai nei; i kite ei tatou e, ko taua tuatau openga ra teia. 19 Aere atura ratou mei roto atu ia tatou nei, kare ra ratou i to tatou; naringa oki ratou no tatou ra, kua noo ra ïa ki o tatou nei: aere atura ra ratou, kia kitea meitakiia ratou e, kare ratou katoa i to tatou.

20 Kareka ko kotou, e akatainuanga tei rauka ia kotou, no ko mai i te Vaerua Tapu; e kua kite kotou i te au mea katoa ra.

21 Kare i to te mea kare kotou i kite i te tuatua-mou i tata atu ei au kia kotou, no te mea ra kua kite, e kare te tuatua pikikaa to roto i te tuatua-mou.

22 Koai te pikikaa mari ra ko tei karanga e kare a Iesu i te Mesia? Koia taua Akakakore Mesia ra, ko tei akakore ïa i te Metua e te Tamaiti katoa oki.

23 Ko tei akakore i te Tamaiti ra, kua ngere katoa ïa i te Mesia: kareka ko tei aaki i te Tamaiti ra, tei iaia katoa te Metua.

24 E tenana, kia vai marie rai ta kotou i akarongo i muatangana ra i roto ia kotou. Kia vai marie rai ta kotou i akarongo i muatangana i roto ia kotou na, e tika katoa oki to kotou kapiti anga atu i te Tamaiti e te Metua katoa oki.

25 E teia oki taua meitaki tana i tuatua mai no tatou ra, ko te ora mutu kore.

26 No te aronga e pikikaa mai ia kotou na teianei taku e tata atu au kia kotou na.

27 Kareka kotou, ko taua akatainu i rauka ia kotou iaia ra, te vai ra ïa ki roto ia kotou, eiaa atu kotou e apiiia mai e etai ke: mei ta tau akatainu ra e apii mai ia kotou i te au mea ravarai, e e mea mou oki te reira, kare i te pikikaa, mei te reira i apii mai ia kotou na, ka topiri atu rai kotou iaia.

28 E teianei, e aku au tamariki ra, ka topiri atu rai kotou iaia; kia maroiroi tatou kia mama mai aia ra, kia kore tatou e rokoia e te akama ki mua i tona aroaro kia tae mai aia ra.

29 Te kite ra kotou e, e tuatua-tika tana, kua kite katoa oki kotou e, ko te aronga katoa i rave i te tuatua-tika ra, e mea anau anake ïa nana.