Exodo

21 TEIA oki te au tuatua-tau taau e tuku ki mua ia ratou.

2 Kia oko koe i te tavini Ebera ra, kia ono ona mataiti i te tavini anga: kia tae ra ki te itu ra, ka aere ua ïa aia i reira, auraka e oko.

3 E takaua aia i te aerenga mai, ei takaua oki aia kia aere ra: e noo vaine aia i te aerenga mai, ka aere ïa aia ma te vaine katoa kia aere ra.

4 Na tona ra pu i oronga i te vaine nana, e e tamariki tamaroa tana i anau nana, e kare ra, e tamariki tamaine; na te pu taua vaine ra ma tana au tamariki, ka aere ua ra aia koia anake ra.

5 Kia tuatua pu ua maira taua tavini ra, E anoano au i taku pu, taku vaine, e taku au tamariki; kare au e aere ua:

6 Ei reira tona pu e arataki ei iaia ki te au akava ra; e nana oki aia e arataki ki te ngutupa are, e kare ra, ki te kopa ta; e na tona pu e ko i tona taringa e puta atu ki tetai ko; ka tavini tamou atu ei aia kiaia ra.

7 E kia oko ua atu te tangata i tana uaorai tamaine ei tavini vaine ra, auraka tona aerenga kia aere ra e aite ki to te au tavini tane ra.

8 Kia kore tona pu e tau iaia, tei momoko iaia, e tuku ua aia iaia kia oko uaia mai i reira: kare aia e tika kia oko atu iaia ki te tangata ke ke, no te mea kua pikikaa oki aia iaia.

9 E kua momoko atu aia iaia na tana tamaiti, mei ta te metua ra akono anga i te tamaine ra, ko tana ïa akono anga iaia.

10 Kia rave ra aia i tetai vaine ke nana, auraka aia e akaiti i tana kai, tona kakau, e tei tau iaia i te vaine akaipoipoia ra:

11 E kia kore aia e rave i te reira nga mea e toru ra nana, ka aere ua ïa aia auraka ei moni.

12 Ko tei ta i te tangata ra, kia mate aia ra, ka tamate takiri roaia ïa.

13 Kia kore aia i moetapapa iaia, na te Atua ra i tuku mai iaia ki tona rima; ka akakite atu au kia koe i te ngai oro anga nona.

14 Ko te tangata ra, kia rave i tetai e tamate roa ma te akakoro, e te pikikaa, mei taku atarau rava ka rave atu ei koe iaia kia mate roa.

15 Ko tei ta i tona metua tane, e tona metua vaine e tamate takiri roaia ïa.

16 Ko tei keia i tetai tangata, e kua oko atu iaia, e kare ra, tei tona rima aia i te rokoia anga atu, e tamate takiri roaia ïa.

17 Ko tei akakino i tona metua tane, e tona metua vaine, e tamate takiri roaia ïa.

18 Kia karo nga tangata toko rua, e kia peî mai tetai i tetai ki te toka, e kia moto ua ki te rima, kare ra i mate roa, kua akavai ra ki runga i te roi;

19 Kia tu ra aia ki runga, e kua aere ma te tokotoko aere ua, auraka tei moto iaia ra kia mate; e tutaki ra aia i to tetai ra noo ua anga, e te vaira kau oki iaia e kia ora takiri roa.

20 E kia ta te tangata i tona tavini tane, e kare ra, i tona tavini vaine, i te rakau pāpā ra, e mate iora aia i roto i tona rima; e akautungaia ïa aia.

21 Kia po okotai ra e kia rua kare i mate taua tavini ra, kare ïa e akautungaia; e moni oki aia nana.

22 Kia tupu te karo i te tangata ra, e tukia atura tetai vaine nui, e maemo iora tana tamaiti, kare ra e kino ke: e akautungaia ïa aia, kia tau i ta te tane a taua vaine ra e akaaiteite mai kiaia ra; ei mua i te aroaro o te aronga akava aia e tutaki mai ei.

23 E e kino ke rai tei tupu, mei te mate ra, ei mate ïa te utunga, 24 E mata ra, ei mata ïa te utunga, e nio ra, ei nio ïa te utunga, e rima ra, ei rima ïa te utunga, e vaevae ra, ei vaevae ïa te utunga,

25 E pakapaka ai ra, ei pakapaka ai ïa te utunga, e motu ra, ei motu ïa te utunga, e paruparu ra, ei paruparu ïa te utunga.

26 Kia moto te tangata i te mata o tona tavini tane, e kare ra, te mata o tona tavini vaine, e po atura; e tuku ïa aia iaia kia aere ua ana ei tutaki i tona mata.

27 E kia moto oki i te nio o tona tavini tane, e kare ra, te nio o tona tavini vaine, e topa iora; ka tuku ïa aia iaia kia aere ua ana ei tutaki i tona nio.

28 Kia ko mai te puakatoro i tetai tangata, e kare ra, i tetai vaine, e mate iora; e peîia taua puakatoro ra ki te toka, e auraka taua puaka ra e kaingaia; ko te tangata ra nana taua puakatoro ra auraka ïa e akaapaia.

29 Kua mātau ra taua puakatoro i te ko i muatangana ra, e kua akakiteia te tangata puakatoro ra, e kare i tapekaia, e kua mate te tangata iaia, te tane, e kare ra, i te vaine; ka peîia taua puakatoro ra ki te toka, e ka tamate katoaia te pu.

30 Kia akaaiteiteia te utunga moni nana, ka o mai ïa aia i tei akaaiteia atu, ei oko kia ora aia ra.

31 E tamaroa tei koia e taua puakatoro ra, e kare ra, e tamaine, e akaperaia atu rai aia, teianei rai te tuatua-tau iaia.

32 E tavini tane tei koia e taua puakatoro ra, e kare ra, e tavini vaine; ka apai ïa aia e toru ngauru sekela ario na tona ra pu, e kia peîia te puakatoro ki te toka.

33 E kia eeu tetai tangata i te rua, e kare ra, kia ko ua tetai tangata i te rua, e kare i tapoki, e topa iora tetai puakatoro ki roto, e kare ra, e asini;

34 Ka apai ïa te tangata rua ra i te moni na te tangata rua ra i te moni na te tangata puaka ei tutaki; e nana taua puaka i mate ra.

35 E kia paruparu ra ta tetai tangata puakatoro i ta tetai, e mate atura; ka oko raua i te puakatoro i ora, ka tuaʼi i te moni; ka tua katoa oki raua i te puakatoro i mate ra.

36 Kia kitea meitakiia ra kua mātau ïa puakatoro i te ko i muatangana ra, e kare te pu i tapeka; ka oko ïa aia ki tetai puakatoro; ko te puakatoro mate ra nana ïa.