Salamo

30 KA akateitei au ia koe, e Iehova; kua akatu oki koe iaku ki runga, e kare koe i vaoo ua atu i toku au enemi kia rekareka ua ana iaku.

2 E taku Atua, e Iehova, i kapiki ua ana au kia koe; e kua akaora koe iaku.

3 Kua akaoki mai koe, e Iehova, i toku vaerua mei ade mairai: kua akaora koe iaku, kia kore au e tae ki raro i te vaarua ra.

4 E imene ia Iehova, e te aronga tapu nona e; e akapaapaa i tona tapu, ei manakonga.

5 Mei te kamoanga mata nei tona riri i te poto; ka vai ra tona akaperepere ra e mutu ua atu te aʼo; kia tapae ua mai te aue i te aiai, ka riro ra i te rekareka kia popongi.

6 I te meitaki anga noku ra, kua tuatua rai oki au e, Kare au nei e ngaueue e tuatau ua atu.

7 No to akaperepere anga mai, e Iehova, i akatinamou tikaʼi koe i toku maunga: kua uuna iora koe i to mata, tumatetenga akera au.

8 Kua kapiki iora au kia koe, e Iehova: e kua pati akatenga atura au kia Iehova.

9 Eaa te puapinga kia rave mate roaia au; kia riro roa au ki raro i te vaarua? e akameitaki ainei te one ia koe? e akakite ainei i te tuatua-mou naau ra?

10 E akarongo mai, e Iehova, e aroa mai koe iaku: e Iehova, ei tauturu koe noku.

11 Kua akariro koe i te aue noku ra ei rekareka: naau i tatara i te kakau paoa noku ra, e kua akakakau mai koe iaku ki te rekareka;

12 E teianei, e akameitakiia koe e taku kakā; e kare rava e muteka: e Iehova, e taku Atua, e akameiaki rai au ia koe e tuatau ua atu.