Maseli

25 TEIA katoa nga maseli a Solomona i akaputuia e te au tangata no te ariki o Iuda ra ko Hezekia.

2 E kakā te Atua kia uuna i te tuatua: e kakā ra te ariki kia kimi matatio i te tuatua ra.

3 I te teitei ra, tei te rangi ïa, e te oonu ra, tei te enua ïa, e te ngakau o te ui ariki ra, e mea taea kore katoa ïa.

4 E akataka ke ana i te ota i te ario ra, rauka iora te ario tikai i te tangata i akataka ra:

5 E akataka ke ana i te tangata kino i te aroaro o te ariki ra, e ka tinamouia iora tona terono e te tuatua-tika.

6 Auraka e akapaapaa ia koe uaorai ki mua i te aroaro o te ariki ra, auraka koe e tu ki to te aronga nunui ra turanga:

7 E mea meitaki oki kia karangaia mai koe, Ka aere mai ana ki runga nei; i te tukuia koe ki raro ki mua i te aroaro o te ariki ra, ta to mata e akara ra.

8 Auraka e rapurapu ana i te akatupu i te taumāro ra: e akapeea oki koe kia tae ki te openga ra, me taakamaia koe e to tangata tupu ra?

9 E akataka marie ua atu koe i taau tuatua ki to tangata tupu ra, auraka koe e aaki i tana ra tuatua muna ki tetai ke:

10 Ko te taakama mai aea tei akarongo ra ia koe, e kare atura e ngaro te akakino ia koe ra.

11 Mei te lemoni auro i roto i te vairanga ario ra, ko te tuatua ïa me tuatuaia i te tuatau tikai ra.

12 Mei te poe auro ra, e te apinga manea auro meitaki ra, koia te ako tangata pakari ki te taringa akarongo ra.

13 Mei te anuanu kiona i te tuatau akaū ra, koia te karere meitaki i te tangata i tono iaia ra; meitaki akera te ngakau o tona pu iaia.

14 Mei te tumurangi, e te matangi kare e ua ra, koia tei akatietie puapinga kore ua i tana i karanga e ka oronga.

15 E maru mai te tutara i te akakoromaki roa; e e atiati te ivi i te arero maru.

16 Kua kitea ainei te meli ia koe? ko te pangia nei rai te pangia kia kai, ko te ki rava aea to kopu, ko te ruaki aea ki vao.

17 Auraka e aere putuputu ki te ngutuare o to tangata tupu ra, ko te iu aea aia ia koe, e kua riri iora ia koe.

18 E rupo ïa, e koke ïa, e ana keokeo ïa, tei riro ei kite pikikaa i tona ra tangata tupu.

19 E tu a nio ati, e te vaevae ngaoi, te irinaki ki te kite pikikaa i te tuatau e tumatetengaʼi ra.

20 Mei tei kiriti i te kakau i te rā anu ra; e mei te vinega i riringiia ki runga i te ngaika ra, koia te tumu i te amu i te tangata ngakau tumatetenga ra.

21 Te pongi ra to enemi, e akaangai atu ki te kai; te kaki ra oki aia, akainu atu ki te vai;

22 Kua akaputu oki koe i te ngarau ka ki runga i tona upoko i reira; e na Iehova e tutaki mai ia koe ra.

23 Mei te matangi ra e akarua, e topaʼi te ua ra, koia katoa te arero koumuumu ra, e tupu ei te mata riri ra.

24 E mea meitaki te noo i te ākapi-tara ki runga i te taua are ra, i te noo i te are maata ma te vaine kavauvau.

25 Mei te vai anu i te tangata i kaki ra, koia te tuatua meitaki mei te enua mamao mai.

26 Mei te punavai i taveuia ra, e mei te vai pupui e tarepoa ra, kota te tangata tuatua tika kia inga ki mua te aroaro o te tangata kino ra.

27 Kare te mea meitaki kia kai maata i te meli; koia katoa, te kimi i tona uaorai kakā, kare ïa i te kakā.

28 Mei te oire koro kore e te ngaangaa ra, koia katoa te tangata kare i akavi i tona uaorai vaerua.