2 Korinetia

10 E TEIANEI, ko au teia ko Paulo, e ako atu kia kotou, i te maru e te aroa o te Mesia, e tu akaaka toku i vao ake i roto ia kotou na, te maroiroi nei ra au ia kotou, iaku i taka ke nei:

2 Teia ra taku tuatua, eiaa au e maroiroi kia tae atu au i vaitatao ia kotou, i te maroiroi taku e manako nei i tetai papaki na, ko tei manako ia matou e te tau nei to matou aerenga i ta te kopapa ra.

3 Tei roto rai oki to matou aerenga i te kopapa, kare ra matou i tamaki mei ta te kopapa ra:

4 Kare oki ta matou taoonga tamaki i ta te kopapa, e mea mana ra i te Atua, i te uri anga i te au punanga ketaketa ki raro:

5 I te uri anga atu i te au eumiumianga ra ki raro, e te au mea teitei katoa ko tei akateitei kia kore e rauka te kite i te Atua, e te akatuikaa anga atu i te au manako ravarai i te akarongo i te Mesia ra;

6 Te vave nei matou i te tutaki atu i te au akarongo kore katoa, kia tika rava to kotou akarongo.

7 TE akara na kotou i te tu i vao ake? te manako ra tetai tangata i roto iaia uaorai e no te Mesia aia, e maara katoa aia i roto iaia uaorai e, mei iaia no te Mesia ra, no te Mesia katoa matou.

8 Kia maata ua atu rai taku akapaatu i to matou mana i orongaia mai e te Atu kia meitaki kotou, kare ra kia mate kotou, kare rai au e akama.

9 Auraka ra au e na reira, ko te riro aea au mei te mea e anoano akamataku toku ia kotou i taku nei au episetole.

10 Te karanga na oki ratou e, e mea teimaa tana leta e te maroiroi, kareka te tu o tona kopapa, e mea apikepike, e te reo tarevakaua.

11 E akamanako ra tei pera ra e, to matou tu i te tuatua i te leta kia taka ke matou ra, ko to matou katoa ïa tu tikai kia tae i vaitatao.

12 Kare oki matou e tika kia akaarite, e kia akatau katoa ia matou uaorai i te aronga i akameitaki ia ratou uaorai: ko ratou ra i te akaaite anga ratou ia ratou uaorai, e te akatau anga ratou ia ratou uaorai, kare ïa i kite.

13 Kare ra matou e akapaatu i to vao mai i ta matou akairo; ko tei tau ra i te aite i akairoia e te Atua no matou nei, e kia tae rava atu ïa aite ia kotou na.

14 Kare matou i akaneke atu i vao i te akairo mei te mea kare i tae atu ia kotou na, kua tae katoa atura matou ia kotou i te tuatua anga i te evangelia o te Mesia.

15 Kare oki matou i akatietie i to vao mai i ta matou akairo, koia oki ta etai ke ra angaanga; te tiaki nei ra matou e kia rai to kotou akarongo, e kia akamaataia mai ïa matou e kotou i reira i ta matou akairo, e kia maata atu rai,

16 Kia tuatua aere rai i te evangelia i te pa enua i ko rava atu ia kotou na, eiaa e akatietie i ta tetai tangata ke ra akairo, i tei manea takere ana.

17 “Ko tei akatietie ra, kia akatietie aia i te Atu.”

18 Kare oki ko tei akameitaki iaia uaorai tei kiteia mai, ko ta te Atu ra i akameitaki.