Iobu

37 TE ruketekete nei oki taku ngakau i te reira, e te ngaueue nei e taka ke i tona vairanga.

2 Ka akarongo marie ana i te kokokina anga o tona reo, e te aruru i riro mai no roto i tona vaa.

3 Tei raro ake i te rangi katoa nei te koraparapa anga, tana uira oki ki te au openga o te enua ra.

4 E muri akera i te reira, kua katakatata iora te reo: e reo mana tona i te mangungu; kare ra aia e tāpu i te uriia ka akarongoiaʼi tona reo.

5 E mangungu umereia te reo o te Atua; e au mea mamaata tana e rave nei, kare e kitea e tatou.

6 Kua tuatua oki aia ki te kiona, Ei runga koe i te enua nei; e te ua taa oki, e te ua kutukututu o tona ra ririnui.

7 Kua topiri aia i te rima o te tangata ravarai; kia kite te tangata ravarai i tana ra angaanga:

8 Ei reira te au puaka e aere ei ki roto i te au vaarua, e kua noo marie i to ratou ra au ana.

9 No te pae i apatonga te puaioio i te tae anga mai; e te anu no te pae i apatokerau.

10 I te aʼo o te Atua i tokaʼi te vai: e te vai pararauare i ketaketaʼi.

11 Te peke katoa nei oki te tumurangi kerekere i te rangi marie; te pueurikiriki nei te tumurangi pararauare i te mārama nona:

12 Te pera nei ra aia i te tioi i to ratou aerenga i tana tuatua: kia rave ratou i tana i akaue atu ia ratou ra ki runga i te enua i nooia nei.

13 Ei ako anga atu, e kare ra, no tona enua, e kare ra, no tona aroa, i apai mai ei aia i te reira.

14 E akarongo mai koe i teia, e Iobu; ka noo marie ana, e akamaaraara i te au angaanga taka ke a te Atua.

15 Kua kite ainei koe i ta te Atua akataka anga i te reira, e tana akakakā anga i tana tumurangi ki te uira?

16 Kua kite ainei koe i te aiteite anga i te au tumurangi, te au angaanga taka ke a te Kite katoatoa ra?

17 I te mea i maanaanaʼi to kakau, kia akanoo marie aia i te enua i te matangi e tonga?

18 Ko koe katoa ainei ma ia i te oora anga i te rangi, tei māro mei te akaata akatoia ra?

19 E apii mai koe ia matou i ta matou e karanga atu kiaia; kare oki e taka ia matou no te poiri.

20 E akakiteia atu ainei aia e te tuatua nei au? kia tuatua te tangata kiaia ra, e riro aia i te apuku rava ïa.

21 I teianei oki, kare i tika i te tangata kia akara i te mārama kakā i roto i te au tumurangi: kia arara maira te matangi ra, mā atura ïa.

22 No ko i te pae i apatokerau te kakā mei te auro: tei te Atua ra te mekameka matakutaku.

23 I te Mana katoatoa ra, kare i kitea e tatou kia kimi: tei maata i te mana, e te tuatua-tau, te maata ua atura te tuatua-tika nana: kare aia e takingakino.

24 E teianei, kia mataku te tangata iaia e tikaʼi kare anake oki aia e akono mai i tei pakari te ngakau ra.