1 Samuela

2 KUA pure aturā Hana, kua karanga atura, Te rekareka nei toku ngakau ia Iehova: kua teitei toku tara ia Iehova; kua akaamamaia toku vaa ki runga i toku au enemi; no te mea te rekareka nei au i te ora naau.

2 Kare rava o Iehova e aite i te tapu; kare rava oki ko koe anake ra: kare tetai mato e arite ki to tatou Atua.

3 Kua oti ua te tuatua akatietie maata; auraka te nengonengo kino kia mama mai no roto mai i to kotou vaa: e Atua kite oki a Iehova, e koia tei akaaite i te au mea e raveia nei.

4 Kua aatiia te ana a te aronga toa, e te aronga kopē ra kua tatuaia ïa ki te maroiroi.

5 Ko tei ki ra, kua oronga ia ratou uaorai ei ou kai; e tei mate i te pongi ra, kua noo mareka ua ïa: kua anau ta te pa e toko itu; e te vaine tamariki maata ra, kua paruparu ïa.

6 Ko Iehova tei ta, e koia tei akaora; ko tei apai ki raro i te vaarua, e tei akatu mai ki runga.

7 Ko Iehova tei akaao, e koia oki tei akataoiau: koia tei taakaaka, e koia tei akateitei.

8 Koia tei apai i tei akaaka ki runga mei raro mai i te one ra, e tei putaua mei raro mai i te tiringa teita ra, koia tei akateitei; kia akanoo aia ia ratou i roto i te aronga mamaata, e kia rauka ia ratou te nooanga akangateitei ra: na Iehova oki te au tumu o te enua, e kua tuku aia i teianei ao ki rungao ra.

9 Te vaevae o te aronga tapu nona ra, nana ïa e tiaki, kareka te aronga kino ra, ei roto ïa i te poiri mate atu ei; kare rava ta te tangata nei e tupu i te maroiroi ua.

10 Ka akaparuparu ravaia te au enemi o Iehova; ka uri mai aia i te mangungu no runga i te rangi ki runga ia ratou; na Iehova e akava mai i te enua e tae ua atu ki te openga; e oronga maira aia i te maroiroi ki to Ariki, e akateitei aia i te tara o tana e Akamainu ra.

11 Aere mairā Elikana ki Rama ki tona uaorai ngutuare i reira; kareka taua tamaiti ra, rave atura ïa i te angaanga a Iehova ki mua i te aroaro o te taunga ra o Eli.

12 E puke tangata kanga nga tamariki a Eli; kare raua i kite ia Iehova.

13 E ta te kau taunga ra peu i te au tangata ra, kia apai te tangata i te atinga ra, tei te tunu anga taua puaka ra, kua aere maira te tavini o te taunga ma te kokai e toru manga i te rima;

14 Kua ko iora i taua kokai ra ki roto i te āriki, e pani ra, ko tei reira ïa, e kapu, ko te reira ïa, e tetai apinga ke iora, ko te reira ïa, e ko tei mou i taua kokai ra, ko ta te taunga ïa i rave nana uaorai. Ko ta ratou ïa i rave i Silo i to Iseraela ravarai i aere mai ki reira ra.

15 E kare rai i tungia e ratou te tongaua e tae mai ei te tavini o te taunga ra, e kua tuatua mai ki te tangata i apai mai i taua atinga ra e, O mai i tetai manga puaka e tunu paka na te taunga; kare oki aia e rave i taau puaka tunu vai, ei mea maata ra.

16 E kia tuatua ua atu tetai tangata kiaia, e E timata ana i te tongaua i te tutungi e kia pou, mei tei muatangana mairai, ka rave ei koe i taau ra vaʼi e inangaro; e tuatua mai aia i reira e, Auraka; ei tenana koe ka o mai ei, e kare ra, ka aō ua ïa au.

17 E ara maata ua atura a aua nga tangata ou ra ki mua i te aroaro o Iehova; no reira oki i akakino ei te tangata i te atinga kia a Iehova ra.

18 Kareka te tamaiti iti ra ko Samuela, te rave ua ra aia i te angaanga ki mua i te aroaro o Iehova, ma te tiputa orongā i te kakau anga.

19 Kua tui oki tona metua vaine i tetai pona roroa iti nona i te au mataiti katoa ra, e kua apai oki kiaia ra, kia aere aia ki runga ma tana tane katoa, e apai i te atinga mataiti ra.

20 Kua akaora mairā Eli ia Elikana, e tana vaine, e kua tuatua maira, Kia oronga mai a Iehova i te tamariki naau i teianei vaine no tana i oronga mai no Iehova ra. Kua aere anake iora ratou ki tona uaorai ngai.

21 Kua takinga meitaki mairā Iehova ia Hana, e kua to iora aia, e anau akera ana puke tamaroa toko toru, e nga tamaine oki toko rua. Tupu akera oki taua tamaiti ra ko Samuela ki mua i te aroaro o Iehova ra.

22 Kua ruaine ravā Eli, e kua kite aia i te au mea katoa i raveia e ana puke tamariki kia Iseraela katoa ra; e to raua moe anga i te au vaine i uipa i te ngutupa o te Are uipaanga ra.

23 E kua karanga atura aia kia raua, Eaa korua i peraʼi? Kua aakiia mai au e te tangata katoa nei i ta korua na ravenga kino.

24 Eiaa, e aku puke tamariki e; kare te rongo meitaki taku i akarongo nei: te ara nei te au tangata o Iehova ia korua na.

25 Kia ara tetai tangata i tetai e tika te au akava kia akava i te reira; kareka kia ara te tangata ia Iehova ra, koai te akatika iaia i reira? Kareka ra raua i akarongo i te reo o to raua metua, no te mea kua akakoro a Iehova e ta ia raua.

26 Tupu atura taua tamaiti ra ko Samuela, e i akaperepereia mai e Iehova e te tangata katoa.

27 Kua aere maira tetai tangata no te Atua kia Eli ra, e kua tuatua maira kiaia, Te na ko mairā Iehova, Kua akakite pu tikai au iaku uaorai ki te ngutuare o to metua ra, ia ratou i Aiphiti ra, i te ngutuare o Pharao ra;

28 E kua iki au iaia no roto i te au kopu o Iseraela katoa ra, ei taunga naku, ei apai i te atinga ki runga i taku atarau, ei tutungi atinga kakara, e ei kakau i te tiputa ki mua iaku nei; e kua oronga au i te au atinga ai katoa a te tamariki a Iseraela ki te ngutuare o to metua ra.

29 Eaa kotou i akatokā uaʼi i taku atinga, e taku atinga kai i akaueia e au i toku nooanga ra: e maata oki toou akangateitei anga i to nga tamariki iaku nei, akamatu uaʼi kotou i te au atinga kai memeitaki ravarai a toku au tangata a Iseraela nei?

30 E teianei, te tuatua maira te Atua o Iseraela ra ko Iehova, I tuatua rai oki au e, e na mua iaku toou ngutuare, e te ngutuare o toou metua, i te aere e tuatua ua atu: i teianei ra, te tuatua mairā Iehova e, Auraka rava ïa; ko tei akangateitei mai iaku ra, ko taku ïa e akangateitei atu, kareka tei akavaavaa mai iaku ra, ka akavaavaaia ïa ratou.

31 I na, te vaitata maira te tuatau, ka tipu ke au i toou rima, e te rima o te ngutuare o to metua na, e kare rava tetai tangata i ruaineia i roto i toou ra ngutuare.

32 Ka kite oki koe i te tumatetenga i roto i toku ra puakapa i te au mea katoa e meitaki ei Iseraela nei: kare rava tetai tangata i to ngutuare e tae ki te ruaine anga e tuatau ua atu.

33 E toou ra tangata e toe i te tipu keia e au i taku atarau ra, e toe ïa ei akapou i to mata, e ei akamamae i to ngakau: e ope takiri oki toou ngutuare katoa i te mate i to ratou mapu anga ra.

34 E te mea ka rokoia tika mai ei aau nga tamariki ra ko Hophini raua ko Phinehaza ra, ko taau ïa akairo, ka mate katoa raua i te rā okotai ra.

35 E akatupu au i tetai taunga pikikaa kore naku ra, e ka rave aia i tei tau i toku nei ngakau, e toku nei manako: e naku e patu i te are mou nona ra; e na mua aia i taku e akamainu ra i te aere e tuatau ua atu.

36 E ko tei toe i toou ngutuare, ka aere akaopuku mai ïa ki mua iaia ra, i te manga ario, e te manga kai, ka tuatua mai ei e, Teia taku tuatua kia koe, e tuku ana koe iaku i tetai taoonga a te kau taunga na, kia kai au i tetai manga kai ra.