Luka

24 E TAE akera ki te rā mua o te ebedoma ra, aere atura ratou e, ko e tokotai puke vaine ke oki, ki te tanumanga ra, i te akirata, ma te rakau kakara ta ratou i tangaakaputu ra.

2 Rokoia atu e ratou, kua uri keia te toka i te tanumanga ra.

3 E tei to ratou tomo anga ki roto ra, kare ua te kopapa o te Atu ra o Iesu.

4 E te eumiumi ua ra ratou i taua mea ra, i na, te tu ua maira e toko rua puke tangata i vaitata ia ratou ma te kakau kakā.

5 E te mataku ua ra taua au vaine ra, piko iora to ratou mata ki raro i te one, kua tuatua maira raua kia ratou, Eaa kotou i kimi ei i tei ora, i te vairanga o tei mate?

6 Kare aia i ko nei, kua tu akenei ki runga: e akamaara i tana i tuatua mai kia kotou ra, iaia i noo i Galilea ra,

7 Ka na ko mai ei ra e, E tukuia atu te Tamaiti a te tangata nei ki te rima o te aronga rave ara e tikaʼi, e e akasatauroia, e ka tu akaou ki te po toru ra.

8 Kua manako iora ratou i taua au tuatua nana ra.

9 E oki maira ratou mei te tanumanga maira, akakite maira i taua au tuatua katoa ra ki te tino ngauru ma tai ra, e tetai pae tangata katoa oki.

10 Ko Maria i Magadala, e ko Ioana, e ko Maria te metua vaine no Iakobo, e aua puke vaine ke katoa ra, ko tei akakite mai ïa ki te au aposetolo i taua au tuatua ra.

11 Kare ra ratou i akarongo mai, mei te tuatua taeke ua ra te reira tuatua, i to ratou manako anga.

12 Kua tu akerā Petero, e oro atura ki te tanumanga ra; e piko iora aia ki raro, kite atura i te kakau i te vai ua anga; oki maira ma te akaeatu i roto iaia uaorai i taua mea i tupu ra.

13 E i na, aere atura e toko rua o ratou i taua rā ra ki tetai vila, ko Emausa te ingoa, e ono ngauru setadia te roa mei Ierusalema.

14 Tuatua ua iora raua i taua au mea katoa i kitea ra.

15 E te tuatua ua ra raua ma te akaeatu raua raua uaorai, kua kapiti ua mairā Iesu i reirao, e aere katoa atura ratou.

16 Kua akakoreia ra te kite i to raua mata, kare atura raua i kite iaia.

17 Kua tuatua maira aia kia raua, Eaa tenana tuatua ta korua e tuatua aere ua ana, ma te iriea?

18 Kua karanga atura tetai, ko Keleopa te ingoa, na ko atura kiaia, Ko koe anake ana paa te tangata ke i Ierusalema nei, kare i kite i te au mea i tupu i reira i eianei puke rā?

19 Kua tuatua maira aia kia raua, Eaa ïa au mea? Kua karanga atura raua kiaia, Ia Iesu i Nazareta ra, e peroveta mana ïa, i te tuatua e te ravenga, i mua i te aroaro o te Atua e te tangata katoa oki:

20 E to tatou kau taunga nunui ra, e te au akava, i te tuku anga atu iaia kia akautungaia kia mate, e kua akasatauro oki iaia.

21 Kareka ko matou nei, i manako oki matou e, ko te tangata teia e oraʼi Iseraela nei: kare ra te reira anake ra, ko te toru oki teia o te rā i raveiaʼi taua mea ra.

22 I poitirere ra matou i etai puke vaine i o matou nei, ko tei aere ïa i te akirata ki te tanumanga ra:

23 E akara atura kare ra te kopapa o te Atu, kua oki maira ratou, tuatua maira e, e puke angela ta ratou i kite, e na ratou i akakite mai kia ratou e, kua ora akenei aia.

24 Aere atura e tokotai puke tangata no matou rai ki te tanumanga ra, rokoia atura, koia tika rai tei tuatuaia mai e te au vaine: kare ra i kite iaia.

25 Kua na ko maira aia kia raua, Aue ïa puke tangata manako kore e, e te ngakau akarongo ngata i te au mea katoa ta te au peroveta i tuatua maira:

26 Kare aina kia peraia to te Mesia mate e tikaʼi, ka aere atu ei aia ki tona basileia?

27 Akakite maira aia kia raua i te au tuatua katoa nona, i tataia ra, mei ia Mose e tae rava akera ki te au peroveta katoa.

28 E vaitata atura ratou ki te vila ta ratou i aere ra, kua akaaere ke atura aia.

29 Kua māro atura raua iaia, na ko atura, E noo anake tatou; kua aiai oki, kua parepare te rā. Tapae atura aia i te are, noo katoa iora ratou.

30 E taua noo anga no ratou ra i te kaingakai, kua rave akera aia i te manga, akameitaki iora, vavaʼi iora, e tuku atura kia raua ra.

31 Akapueraia akera to raua mata, kite atura raua iaia; e ngaro ke atura aia ia raua.

32 Kua tuatua iora raua raua uaorai, Kare aina i maana rava to taua ngakau, ka tuatua mai ei aia kia taua i te arataa ra, ka akataka mai ei aia i te tuatua i tataia ra?

33 Kua tu akera raua ki runga i reira, oki atura ki Ierusalema, rokoia atu te ngauru ma tai ra, te putuputu ra, e to ratou katoa,

34 E te tuatua anake ra, Kua ora tika rai te Atu, e kua akakite mai kia Simona.

35 Akakite katoa atura raua i te tuatua ta raua i kite i te arataa ra, e to raua kite anga iaia i te vavaʼi anga i te manga ra.

36 E te akatika ua ra raua i taua tuatua ra, ko Iesu katoa iora i rotopu ia ratou, kua tuatua maira, Kia ora na kotou.

37 Poitirere rikarika atura ratou e maranga atura te ii, manako akera, e vaerua tei kitea e ratou.

38 Kua tuatua maira aia kia ratou, Eaa kotou i mataku ei? eaa tena manako i akatupuiaʼi i to kotou ngakau?

39 Ka akara mai ana i toku rima e toku vaevae, ko au uaorai oki teia: ka aa ua mai ana, kia kite kotou; kare ïa o te vaerua e ivi, e kare oki e kiko, mei ta kotou i kite iaku nei.

40 Pera atura aia i te tuatua anga ra, e kua akakite atura kia ratou i tona rima e tona vaevae.

41 E kare rai oki ratou i akarongo tikai i te rekareka ma te umere, kua tuatua maira aia kia ratou, E manga kai ainei ta kotou e vai nei?

42 Tuku atura ratou i te manga ika tunu nana, e tetai manga melikerio.

43 Rave iora aia, kai iora i mua ia ratou ra.

44 Kua tuatua maira aia kia ratou, Taku teia i karanga atu kia kotou, ka noo katoaʼi tatou ra e, e tupu rai noku nei te au tuatua i tataia ki roto i te ture a Mose ra, e te au peroveta ra, e i te Salamo ra.

45 Akamārama atura aia i to ratou ngakau, kia kite ratou i te tuatua i tataia ra.

46 Kua tuatua maira aia kia ratou, I peraia te tata anga i taua tuatua ra, e kia peraia to te Mesia mate e tikaʼi, e kia tu akaou mai aia i te po toru ra mei te mate mai:

47 E kia tutu aereia te tuatua no te tataraara, e no te akakore anga i te ara, i tona ingoa, mei Ierusalema atu nei, e kia pini te pa enua ravarai.

48 Ko kotou anake oki te kite i teianei tuatua.

49 E i na, naku oki e tono mai kia kotou ta taku Metua i tuatua maira; e noo ra kotou i te oire i Ierusalema nei, e kia rauka to kotou maroiroi no runga mai.

50 Kua arataki atura aia ia ratou ki vao ra e tae ua atura ki Betania; apai akera aia i tona rima ki runga, kua akaora maira ia ratou.

51 Iaia i akaora mai ia ratou ra, i raveia mai ei aia e apaiia atura ki runga i te rangi.

52 Akamori atura ratou iaia, oki anake atura ki Ierusalema, ma te rekareka maata;

53 E tika anake rai ki roto i te iero ra, kare e rā e tukua, i te akameitaki anga, e te akapaapaa anga, i te Atua. Amene.