2 Petero

2 E PEROVETA pikikaa oki to roto i te tangata i muatangana, e ka riro katoa oki i te orometua pikikaa to roto ia kotou na, ko te ka akatupu poiri ua i te tuatua pikikaa mate ra, e te akaruke anga i te Atu tei oko ia ratou ra, i te apai anga mai i te mate viviki ki runga ia ratou uaorai.

2 E e manganui te ka aru i ta ratou tuatua mate; e no ratou e akakinoiaʼi te arataa tuatua-mou ra.

3 E no te noinoi apinga ra, e apingaia ta ratou ia kotou, i ta ratou tuatua pikikaa; kare ra ta ratou utunga i akakiteia i taito ra i tavare, e to ratou mate, kare ïa i varea e te moe.

4 Kare te Atua i akaperepere i te au angela i rave i te ara ra, tapeka atura ra ia ratou i te pirianganaoa ra o te poiri i te po, kia vaioia e kia tae ki te akava anga;

5 E kare i akaperepere i to te ao taito ra, akaora iora ra ia Noa i te tangata i ako i te tuatua-tika ra, ma etai e tokoitu ra, ka apai mai ei aia i te nina-anga ki teianei ao akono kore i te Atua ra;

6 E akariro atura i nga oire ra ko Sodoma e Gomora, ei reu ai, uripu takiri atura ia ratou i te akaapa anga atu, akariro atura oki ei akaraanga na te aronga e tāpu i te akono kore i te Atua a muri ake;

7 E akaora atura ia Lota tuatua-tika ra, ko tei mamae i te tuatua viivii a te aronga kino ra:

8 (Mamae atura oki te ngakau o taua tangata tuatua-tika ra, i te noo anga i roto ia ratou, i te akara anga, e te akarongo anga atu, i tera rā, e tera rā, i ta ratou tuatua-tika kore;)

9 Kua kite mari te Atu i te akaora i te aronga akono i te Atua i roto i te timataanga ra, e te tāpu i te aronga tuatua-tika kore e, kia tae ki te rā akava anga, kia mate:

10 E e maata atu rai i tei akono ua i ta te kopapa ra, i te anoano viivii ra, ko tei akavaavaa i te aronga tutara ra; e mataku kore, e te māro i to ratou uaorai anoano, kare i mataku kia akakino mai i te aronga teitei ra.

11 Kareka te au angela, ko tei maata ua atu to ratou mana e te maroiroi, kare rava ïa i tapepe akakino ia ratou ki mua i te aroaro o te Atu ra.

12 Kareka teianei aronga, mei te au puaka manako kore, i angaia no te āru, e no te mate, i te akakino anga i te au mea kitea kore ia ratou ra, ka ope takiri ïa i te mate i to ratou uaorai kino,

13 I te rauka anga te utunga o te tuatua-tika kore ra, i te aronga e manako e mea meitaki kia kanga i te ao ra.

14 Kua ki to ratou mata i te akaturi, kare oki e tivata i te rave i te ara, e i te taē anga i te aronga tinamou kore; e ngakau mātau ua to ratou i te noinoi apinga; e tamariki taumaaia:

15 Kua akaruke ratou i te ara mou, tatipake atura, i te aru anga i te arataa o Balaama a Beora, ko tei anoano i te tutaki o te tuatua-tika kore ra;

16 I akoia maira aia i tana ra ara, na te asini tuatua kore i tuatua tangata mai, kua akakore i te aerenga neneva o taua peroveta ra.

17 E rua vai kore ïa ratou; e tumurangi peke aere ua i te uriia ra: no ratou te poiri kerekere i vaooiaʼi e tuatau ua atu.

18 Kia tuatua oki ratou i te tuatua maata marikonga kore e te akatietie ra, te vare ra ia ratou, no te kanga e te anoano o te kopapa ra, i tei ora takiri mai ana no roto i te aronga e noo i roto i te apa ra.

19 Te tuatua akarangatira ra ia ratou, e e tuikaa oki ratou uaorai na te kino; ko ta te tangata oki i vi ra, kua tuikaa aia kiaia.

20 Kua ora oki ratou i te viivii o teianei ao, i te kite i te Atu ra, i te Ora ia Iesu Mesia, ka ii akaou atu ei, e kua vi rai ratou i te reira, e kino maata ua atu tei to ratou openga i tei muatangana.

21 E meitaki ake ia ratou naringa kare rava i kite i te arataa tuatua-tika ra, eiaa e kite ra ka ariu ke atu ei i te tuatua tapu i tukuia mai ia ratou ra.

22 Kua tupu io nei ra ia ratou te potonga tuatua tika ra e, “Kua oki te kuri ki tona uaorai ruaki, e te tinana i mā ki te takaviri anga i te vari.”