Mareko

7 KUA uipa maira te au Pharisea i reira, e tetai aronga tata tuatua, mei Ierusalema mai, kiaia ra.

2 E kia akara ratou i e tokotai puke pipi ana ra i te kai anga i te kai ma te rima viivii, koia oki te rima orei koreia ra, kua akakino maira.

3 E akono rai oki te au Pharisea, e te ngati Iuda katoa, i te peu i tukua mai e te aronga taito ra, kare e kai ua i te manga, e na mua ra i te orei marie i te rima.

4 E kia oki mai ratou mei te okoanga ra kia kore ratou e orei, kare ua e kaikai. E manganui katoa oki te peu, ta ratou e akono, i te orei anga i te au kapu, e te au pani, e te au kapu veo ra, e te au roi oki.

5 Kua ui maira te au Pharisea, e te au tata tuatua, kiaia, Eaa taau au pipi nei i kore ei i akono i tei tukuia mai e te aronga taito ra, te kai nei i te kai ma te rima orei koreia ra?

6 Kua karanga atura aia kia ratou, na ko atura, E te au pikikaa, te tau tikai nei kotou i ta Isaia i tuatua ia kotou, i tei tataia ra e, “Ko te vaa o teianei aronga te akameitaki mai iaku; tei te atea ke ra to ratou ngakau iaku.

7 E akamori anga puapinga kore ra ta ratou iaku, ka apii ei i tei tukuia mai e te tangata anake ra.”

8 Kua kopae oki kotou i ta te Atua ra akauenga, e kua mou piri atura i tei tukuia mai e te tangata nei, i te orei anga pani e te au kapu nei; e e manganui oki te ravenga mei te reira te tu, ta kotou e akono nei:

9 E kua na ko atura aia kia ratou, E meitaki mari ta kotou akakore anga i ta te Atua ra akauenga, kia akonoia ta kotou tuatua tukuia maira.

10 I tuatua mai oki a Mose, “E akangateitei atu i to metua tane e to metua vaine;” e, “Ko tei taumaa i te metua tane e te metua vaine ra, e tamate takiri roaia.”

11 Te tuatua nei ra kotou, Te tangata e karanga atu ki tona metua tane, e te metua vaine ra, Kia tapu, koia oki kia orongaia na te Atua taku apinga katoa e puapingaiaʼi koe nei;

12 Auraka e takinga-meitaki atu i tona metua tane, e tona metua vaine, i ta kotou;

13 Te pera nei oki kotou i te akakore anga i ta te Atua ra tuatua i ta kotou tuatua tukuia mai, ta kotou e mou nei; e mei te reira ta kotou e rave nei e manganui.

14 Kua karanga atura aia ki taua au tangata ravarai ra, na ko atura kia ratou. Ka akarongo mai ana iaku nei, ko kotou ravarai, kia kite:

15 Kare rava to vao nei e viivii ei te tangata kia o ki roto: te au mea ra no roto maira, ko te mea ïa e viivii ei te tangata.

16 E te tangata e taringa tona ei akarongo anga ra, e akarongo aia.

17 E kia aere maira aia ki rotou i te are, kia vaio atu i te tangata tini ra, kua ui maira tana au pipi kiaia i taua parabole ra.

18 Kua karanga atura aia kia ratou, Te vai kite kore nei rai kotou? Kare kotou i kite, i te au mea no vao nei, kia o ki roto i te tangata, kare aia e viivii i te reira:

19 No te mea kare ïa i o ki roto i tona ngakau, ki roto ra i te kopu, i te ngai e taka ke ei te kino o te kai, e akarukeia atura ki vao?

20 Kua na ko atura aia, To roto mai i te tangata, ko te mea ïa e viivii ei te tangata.

21 No roto mai oki no roto i te ngakau tangata, te manako kikino, te moeaana te akaturi, te ta tangata,

22 Te keia, te noinoi apinga, te vareae, te pikikaa, te kanga, te manava kino, te akakino Atua, te nengonengo, e te auouo:

23 No roto anake te reira au mea kikino, ko te mea ïa e viivii ei te tangata.

24 Kua tu akera aia ki runga, aere atura ki te kotinga i Turia e Sidona ra, tomo atura ki roto i tetai are, i inangaro aia auraka tetai tangata kia kite, kare ra aia e ngaro.

25 Tetai vaine oki, i uruia tana tamaine iti i tetai vaerua viivii, kite akera aia, kua aere maira, kua akatopa maira ki tona pae vaevae:

26 (e Eleni oki taua vaine ra, no Phenia Suria,) kua tuatua meitaki maira aia kiaia, kia tuaru aia i te demoni i roto i tana tamaine ra.

27 Kua karanga aturā Iesu kiaia. Kia pangia na te tamariki e tikaʼi: kare e tika kia apai atu i te kai a te tamariki, e akaruke atu ei na te puakaaoa.

28 Kua tuatua maira aia kiaia, na ko maira, E tika rai, e te Atu; e kai ra te puakaaoa i te ungaungā kai a te tamariki i raro ake i te kaingakai ra.

29 Kua na ko atura aia kiaia, Ka aere i te kainga; kua riro te demoni i roto i to tamaine ra ki vao, ko koe i pera mai na.

30 Aere atura aia ki te ngutuare i reira, rokoia atu tana tamaine ra, te takoto ua ra ki runga i te roi, kua riro te demoni ki vao.

31 Akaruke atura aia i te kotinga i Turia e Sidona, aere atura i te pae roto i Galilea ra, na rotopu i te enua ra i Dekapoli.

32 Kua arataki maira ratou i tetai tangata taringa turi e te murare iaia ra; kua tuatua meitaki maira kiaia, kia tuku atu i tona rima ki rungao.

33 Kua arataki ke atura aia iaia i taua urupu tangata ra, kua tuku iora i tona rima ki roto i ona taringa, tutua akera i te uavare, e kua akatukia atura i tona arero.

34 Kua nānā akera ki runga i te rangi, ngunguru iora, e kua na ko atura kiaia, Ephata, koia oki, Kia puata.

35 Puata iora ona taringa, matara akera oki tona arero, meitaki maira tana tuatua i reira ra.

36 Kua ako atura aia ia ratou, Auraka rava e akakite ki te tangata: kia maata ra aia i te ako anga ia ratou e, Eiaa, maata rava atura to ratou akakite aere anga:

37 Na ko akera, ma te umere maata, E mea tika rava te au mea katoa tana e rave nei; te akapuata nei aia i te turi, e te tuatua nei te murare iaia.