1 Korinetia

10 KARE oki au i inangaro, e te au taeake e, kia kore kotou e kite e, i raro ake to tatou ui metua ravarai i te tumurangi, e kua aere katoatoa na raro i te tai;

2 E i bapetizo anakeia ia Mose ki roto i te tumurangi, e roto oki i te tai;

3 E kua kai katoatoa i te manga vaerua ra;

4 E kua inu katoatoa i te vai vaerua ra: (kua inu oki ratou i te vai no roto i taua mato vaerua i aru ia ratou ra; e taua mato ra, ko te Mesia ïa.)

5 Kare ra te Atua i mareka i te rai o ratou: mate iora ratou i te medebara.

6 Kua riro oki taua au mea ra ei akaraanga na tatou, kia kore tatou e noinoi i te au mea kikino ra, mei ia ratou i noinoi ra.

7 Auraka katoa kotou ei araara idolo, mei tetai papaki o ratou ra; koia oki tei tataia ra e, “Kua noo te au tangata ki raro e kai e e inu oki, e kua tu akera ki runga e ura.”

8 Auraka katoa tatou e akaturi, mei tetai papaki o ratou i akaturi ra, e mate iora e rua ngauru e toru ara i te tausani i te rā okotai ra.

9 Auraka katoa tatou e timata atu i te Mesia, mei tetai papaki o ratou i tamata ra, e mate iora i te ovi.

10 Auraka katoa kotou e urutoe, mei tetai papaki o ratou i urutoe ra, e pou iora ratou i te akapou ra.

11 Rokoia iora ratou e taua au mea katoa ra, ei akaraanga: e ei ako mai oki ia tatou, i te aronga i rokoia mai i te openga o te au tuatau nei, i tataiaʼi.

12 E teianei, ko te manako ra e te tu ra aia, kia matakite aia ko te inga aea.

13 Kare kotou i rokoia e te timataanga, mari ra mei ta te tangata nei rai: e tuatua-mou ra ta te Atua, e kare aia e vaoo ia kotou kia timataia, mari ra ko te tika ia kotou kia akakoromaki ra; e akatupu katoa aia i te akapuanga i taua timataanga ra, kia tika ia kotou kia akakoromaki.

14 E teianei, e aku au akaperepere e, e rere ke atu i te araara idolo.

15 Te karanga atu nei au ki te tangata pakari: e akamaara ana kotou i taku nei tuatua.

16 Te kapu no te meitaki ta tatou e akameitaki nei, kare aina i te kapiti katoa anga i te toto o te Mesia nei? Te manga ta tatou e atiati nei, kare aina i te kapiti anga i te kopapa o te Mesia nei?

17 No te mea okotai rai manga, ko tatou ravarai e manganui, okotai rai ïa kopapa: te kai katoatoa nei oki tatou i taua manga okotai ra.

18 I na oki Iseraela i te akonoanga i te kopapa nei: kare aina te aronga i kai i te atinga, i te aronga i rave katoa i to te atarau ra?

19 E teianei, te karanga nei aina au e, e mea tika te idolo? e e mea mou te atinga a te idolo ra?

20 Kare, teia ra taku tuatua, ta te etene i akaatinga ra, i akaatinga ïa na te au demoni, kare na te Atua: kare oki au i inangaro e kia kapiti katoa kotou i te akamori demoni.

21 Kare e tika ia kotou kia inu i te kapu a te Atu, e te kapu a te au demoni: kare e tika ia kotou kia kai i te kaingakai a te Atu ra, e te kaingakai a te au demoni.

22 Te akakoko nei tatou i te Atu kia riri? e maata aina to tatou maroiroi i tona?

23 E tika te au mea katoa iaku, kare ra e tau katoatoa kia rave: e tika te au mea katoa iaku, kare ra te au mea katoa e tamaata i te meitaki.

24 Auraka rava e tangata e kimi i tona uaorai meitaki, e kimi ra te tangata ravarai i to etai ke ra.

25 Ko tei okoia i te okoanga ra, e kai ïa, auraka e uiui i te akava-ngakau ra:

26 “No Iehova oki te enua, e tona ki katoa ra.”

27 E kia tuatua mai tetai o te aronga akarongo kore kia kotou, e inangaro kotou i te aere; e kai i tei tukuia mai ki mua i to kotou aroaro ra, eiaa e uiui i te akava-ngakau ra.

28 I tuatua maira tetai tangata kia kotou e, E atinga apai teia na te idolo; eiaa e kai, no taua tangata oki i akakite maira, e no te akava-ngakau oki:

29 Kare toou akava-ngakau taku e karanga nei, to tetai ke ra: eaa te mea i tika iaku nei kia akaapaiaʼi e to etai ke ra akava-ngakau?

30 No te aroa ua i kai ei au ra, eaa oki au i akakinoiaʼi i te mea taku i akameitaki i te Atua nei?

31 E teianei, te kai ra e te inu ra oki, e te au mea ravarai ta kotou e rave na, e rave anake ïa ma te akakakā i te Atua.

32 Auraka kotou kia riro ei turorianga, i te ngati Iuda, e te Eleni, e te ekalesia katoa a te Atua:

33 Mei iaku katoa e akarekareka i te tangata ravarai i te au mea katoa nei, kare au i kimi i te meitaki noku uaorai, no te tangata katoa ra e manganui, kia ora ratou.