1 Ariki

19 KUA akakite akerā Ahaba kia Iezebela i ta Elia i rave; e kua ope te au peroveta i te taia e ia ki te koke.

2 Kua tono akerā Iezebela i te karere kia Elia ra, tuatua maira, Kia pera mai te au atua kiaku, e kia maata mairai, kia kore koe e riro mei tetai o ratou penei apopo.

3 E kite akera aia, kua tu akera aia, aere atura kia ora, e tae atura ki Bereseba ki o Iuda ra, vaoo iora i tona tavini i reira.

4 Aere atura aia uaorai na te medebara e okotai akera rā i te aerenga; aere atura e kua noo iora ki raro ake i tetai rotema: kua pati atura i te mate; e tuatua akera, Kua oti ua; e teianei, e Iehova, ka rave mai koe iaku; kare oki oku e meitaki maata i toku ai metua ra.

5 Te akāvai ua ra aia e kua moe ki raro ake i taua rotema ra, e i na, kua akatukia ua maira tetai angela iaia, kua na ko maira kiaia, Ka tu, ka kai.

6 Kua akara iora aia, e i na, te vai maira tetai areto, tei te pae urunga nona ra, kua tunuia ki runga i te ngauru, e tetai āriki vai. Kua kai iora aia, e kua inu, e kua moe akaou atura ki raro.

7 Kua oki akaou maira te Angela a Iehova kua akatukia akaou maira, ko te tu rua ïa, e kua tuatua maira, Ka tu, ka kai; no te mea e ngai mamao roa tei akonoia naau ra.

8 Kua tu akera aia, kua kai, e kua inu, e kua aere atura i te maroiroi o taua kai ra e rua takau akera rā, e e rua takau oki po, e tae atura ki Horeba ki te maunga o te Atua ra.

9 Tae atura aia ki reira ki roto i tetai ana, e kua noo iora aia i reira; e i na, kua tae maira te tuatua a Iehova kiaia, na ko maira kiaia, Te akapeea ua na koe i ko na, e Elia?

10 Kua karanga atura aia, Maroiroi ua na au i te Atua Sabaota ia Iehova: kua akaruke te tamariki a Iseraela i taau ra koreromotu, kua uri i taau atarau ki raro, kua ta i te au peroveta naau ki te koke; e ko au nei, ko au anake nei tei toe; e te kimi mai nei ratou iaku nei kia mate.

11 Kua tuatua maira aia, E aere, ei runga i te maunga tu uaʼi ki mua i te aroaro o Iehova. E i na, kua aere a Iehova na reirao, ko te matangi maata iora, e te uriia, i te akangaangaa anga i te au maunga, e te vavaʼi anga i te au mato, ki mua i te aroaro o Iehova; kare rā Iehova i roto i taua matangi ra: e muri akera i te matangi, ko te ngaueue enua iora; kare rā Iehova i roto i taua ngaueue enua ra:

12 E oti akera te ngaueue enua, e ai; kare akerā Iehova i roto i taua ai ra: e oti akera te ai, e reo iti poepoe maira.

13 E kite akerā Elia i taua tuatua nei, kua puroku aia i tona mata ki tona kakau, aere atura ki vao, tu ua iora i te tomoanga ki roto i te ana ra. E i na, tetai reo maira kiaia, na ko maira, Te akapeea ua na koe i ko na, e Elia?

14 Kua karanga atura aia, Maroiroi ua na au i te Atua Sabaota ia Iehova: no te mea kua akaruke te tamariki a Iseraela i taau ra koreromotu, kua uri i taau au atarau ki raro, e kua ta i te au peroveta naau ki te koke; e ko au nei, ko au anake ra tei toe; e te kimi mai nei ratou iaku nei kia mate.

15 Kua tuatua mairā Iehova kiaia, E aere, ka oki, mei te medebara atu nei ko Damaseko: e kia tae koe ki reira, e akatainu koe ia Hazaela ei ariki no Arama:

16 E akatainu oki koe ia Iehu te tamaiti a Nimesi, ei ariki no Iseraela: e akatainu oki koe ia Elisaia te tamaiti a Saphata no Abela-mehola, ei peroveta ei tupau ia koe ra.

17 E ko tei ora i te koke a Hazaela ra, na Iehu ïa e ta; ko tei ora i te koke a Iehu ra, na Elisaia ïa e ta.

18 E vaoo iora au i e itu tausani tangata o Iseraela noku uaorai, ko tei kore i tuku i te turi ki raro kia Baala, ko tei kore i ongi atu te vaa iaia.

19 Aere atura aia, e kite atura ia Elisaia te tamaiti a Saphata, rokoia atu te arote ra i nga zugo puakatoro okotai ngauru ma rua: tei iaia oki te ma rua: aere ua aturā Elia na vaitatao iaia ra, e kua titiri akera i tona kakau ki rungao iaia.

20 Kua akaruke iora aia i taua au puakatoro ra, e kua oro atura na muri ia Elia, e kua karanga atura. E aere ana au e ongi i toku metua tane e toku metua vaine, ka aru atu ei ia koe. Kua tuatua mairā aia kiaia, E aere, e oki: i aa atu oki au ia koe?

21 Kua oki atura aia, kua rave iora, i te rua puakatoro kua ta iora, e kua tao iora, no runga te puakatoro te rakau ei vaie, e kua apai na te au tangata, e kai iora ratou. Kua tu akera aia i reira, kua aru atura ia Elia, piri atura kiaia.