Luka

6 E TOPA akera te sabati mua, ei te rua ra, aere atura aia na roto i te au koro sitona; kua uuti akera tana au pipi i te ua sitona. kua mirimiri iora ki te rima, kua kai iora.

2 Kua tuatua maira e tokotai puke Pharisea kia ratou, Eaa kotou i rave ei i tei kore i tau i te ture kia rave i te sabati?

3 Kua karanga aturā Iesu kia ratou, na ko atura, Kare aina kotou i tatau i teia i ta Davida i rave, e tei kapiti katoa iaia, ka pongi ei ratou ra;

4 E i tomo aia ki roto i te are o te Atua, e rave atura e kua kai i te manga o te aroaro, e kua apai oki na tei kapiti katoa iaia ra; ko tei kore e tau i te ture kia kai, mari ra na te kau taunga anake ra?

5 Kua na ko atura oki aia kia ratou, Ko te Tamaiti a te tangata nei, ko te Atu katoa ïa o te sabati.

6 E tae akera ki tetai sabati, tomo atura aia ki roto i te sunago, apii atura: tei reira oki tetai tangata, kua marō tona rima katau.

7 Te akara matariki maira te au tata tuatua e te au Pharisea iaia, ko te akaora oki aia i taua tangata ra i te rā sabati; kia rauka ta ratou tapepe anga mai iaia.

8 Kua kite ra aia i to ratou manako, e kua karanga atura ki te tangata nona te rima marō ra, Ka tu ki runga i rotopu nei tu ei: kua tu akera aia ki runga, tu iora.

9 Kua karanga aturā Iesu kia ratou, Ka ui atu na au kia kotou i tetai mea; Eaa te tau i te ture kia rave i te rā sabati, ko te meitaki aina, e ko te kino? ko te akaora ainei, e ko te ta?

10 Kua akarau aere atura tona mata kia ratou ravarai e pini ua ake, kua karanga atura aia ki taua tangata ra, Ka akatika mai ana i to rima. Tei te pera anga ra, ora takiri akera tona rima mei tetai katoa ra.

11 Ki rava akera ratou i te riri; kua tuatua iora ratou ratou uaorai i ta ratou ravenga ia Iesu.

12 I te reira puke rā tona aere anga ki runga i tetai maunga e pure, e ao ua iora te po iaia i te pure anga ki te Atua.

13 E ao akera kua karanga atura aia ki tana au pipi e aere mai kiaia ra: kua iki iora aia tino ngauru ma rua o ratou, ko tana ïa i tapa i te ingoa e aposetolo:

14 Ko Simona tana i tapa katoa ia Petero, e ko Anederea tona taeake, ko Iakobo e ko Ioane, ko Philipa e ko Baratolomea,

15 Ko Mataio e ko Toma, ko Iakobo a Alephaia, e ko Simona tei tuatuaia i te Maroiroi,

16 Ko Iuda Ikariota, ko tei riro ei pikikaa ra.

17 Kua eke maira aia ki raro e ratou katoa, tu iora i te ngai maniania; e te aronga pipi ana, e tetai urupu tangata maata no Iudea katoatoa, e no Ierusalema ra, e no te pae taatai i Turia e Sidona, i aere mai e akarongo iaia, kia akaoraia ratou i to ratou au maki;

18 E te aronga i tamanamanataia e te vaerua viivii ra: akaoraia iora ratou.

19 Kua umuumu katoa maira taua aronga maata ra i te akatukia mai iaia: te pupu atura oki te mana no roto iaia, e ora rava akera ratou katoatoa.

20 Kua akara atura oki tona mata i tana au pipi, e kua karanga atura, E ao to kotou, e tei akaaka; no kotou oki te basileia o te Atua ra.

21 E ao to kotou, e tei pongi i teianei: e akakiia oki kotou. E ao to kotou, e tei aue i teianei; e kata oki kotou.

22 E ao to kotou, kia makitakita mai te tangata ia kotou, e kia akataka ke mai ratou ia kotou, kia akakino mai, e kia akaruke akakinoia to kotou ingoa, no te Tamaiti a te tangata nei.

23 E rekareka kotou i te reira rā, e rererere aere ua i te rekareka: i na oki, tei te ao ta kotou tutaki maata; i pera mai oki to ratou ai tupuna ki te au peroveta ra.

24 E ae oki kotou, e te aronga apinga nui! kua rauka to kotou rekareka anga.

25 E ae oki kotou, e tei ki na! e pongi oki kotou. E ae oki kotou, e te aronga e kata i teianei! e mii oki kotou e ka aue.

26 E ae oki kotou kia akameitaki mai te tangata ravarai ia kotou! i pera oki to ratou ai tupuna i te au peroveta pikikaa ra.

27 Teia ra taku tuatua kia kotou, e akarongo mai ra, E aroa atu i to kotou au enemi; e takinga-meitaki atu i te aronga i makitakita mai ia kotou;

28 E akaora i te aronga i tao mai ia kotou, e pure oki i te aronga i takinga-kino mai ia kotou.

29 Tei moto maira i to paparinga na, e ariu katoa atu i tetai; e tei rave i to kakau pu na, auraka katoa e tāpu i to pereue.

30 E oronga atu na tei pati mai ia koe na, e ko tei rave i toou apinga, auraka e pati akaou atu.

31 E ta kotou e inangaro ia etai ke ra, ka akapera katoa atu kotou kia ratou.

32 Ko tei aroa mai ia kotou, ko ta kotou rai ïa e aroa atu, eaa te akameitaki anga ia kotou i reira? te aroa katoa nei oki te aronga rave ara i te aronga e aroa mai ia ratou.

33 E kia takinga-meitaki atu kotou i te aronga e takinga-meitaki mai ia kotou, eaa te akameitaki anga ia kotou i reira? te pera katoa nei oki te aronga rave ara.

34 E te aronga ta kotou e manako e rauka ta kotou i reira, ta kotou rai ïa e oronga atu kia pati, eaa te akameitaki anga ia kotou i reira? te oronga nei oki te rave ara ki te aronga rave ara, kia arite marie ta ratou kia rauka mai.

35 E aroa ra kotou i to kotou au enemi, e e takinga-meitaki, e oronga atu, auraka ua atu ei manako okooko; e tutaki maata ta kotou i reira, e ka riro oki kotou ei tamariki na Tei Teitei: e takinga-meitaki oki tona ki te aronga mareka kore e te tangata kikino.

36 E aroa oki to kotou, mei to kotou Metua e aroa maira.

37 Auraka e akakino atu, e kare kotou e akakinoia mai: auraka e akaapa atu, e kare kotou e akaapaia mai: e akakore atu i te ara, e ka akakoreia mai ta kotou.

38 Ka oronga, e ka rauka ta kotou; e ki te aite, e taomiia, e ruruia, e maringi ua atu, na te tangata e riringi mai ki roto i to kotou kakau. Ko te aite ta kotou e aite atu, ko ta kotou rai ïa kia akaaiteia mai.

39 Kua karanga atura aia i te parabole kia ratou, E tika aina te matapo kia arataki i te matapo? kare aina e inga kapipiti ki roto i te vaarua?

40 Kare te pipi i maata atu i tona orometua: te pipi ra i karape i te kite, ka riro i te arite katoa i tona orometua.

41 Eaa oki koe i akaraʼi i te tanga iti i roto i te mata o to taeake, kare oki koe i kite e tei roto i toou uaorai mata te rakau maata?

42 Eaa koe i takaʼi kia tuatua ki to taeake, E taku taeake, o mai naku e kiriti i te tanga iti i roto i to mata na, kare oki koe i kite e, e rakau maata tei roto i toou uaorai mata? E tera ra pikikaa e! e akamata ana i te kiriti i te rakau maata i roto i toou uaorai mata, ei reira koe e kite meitaki ei, kia kiriti i te tanga iti i roto i te mata o to taeake.

43 Kare te rakau meitaki ra tei ua mai i te ua kino, kare oki te rakau kino ra e ua mai i te ua meitaki.

44 Te kitea nei te au rakau katoa i tona uaorai ua tikai: kare oki to runga i te rakau taratara te suke kia rauka mai; e te vine oki, kare ïa mei runga i te tataramoa.

45 E tuku mai te tangata meitaki i te mea meitaki no roto i te putunga meitaki i roto i tona ngakau; e tuku mai te tangata kino te mea kino, no roto i te putunga kino i roto i tona ngakau: no te ki oki o te ngakau i tuatuaʼi te vaa.

46 Eaa kotou i tuatua mai ei kiaku nei e, E te Atu, e te Atu, e kare kotou i akarongo i taku tuatua?

47 Ko te aere mai kiaku nei e akarongo ei i taku au tuatua, e akono tikai iora, e akakite atu au kia kotou i tona tu:

48 E tau aia ki te tangata i patu i te are, e ko atura ki raro roa, tamou iora te pange ki rungao i te papa; e vai pukeia iora, viviki rava atura taua vai ra i te taʼe anga mai ki taua are ra, kare ra te are i keukeu i te reira, kua tamouia oki ki runga i te papa.

49 Kareka te akarongo ua, e kare i akono, e tau ïa ki te tangata i patu i te are ki runga i te one, kare i tamou ki te pange, e viviki maira te vai puke i te taʼe anga mai, topa iora, e ngaangaa maata to taua are ra.