Maseli

21 E AU matāvai te ngakau o te ariki i te rima o Iehova, te akaariu ra aia ki tana ngai i inangaro.

2 E mea tika anake rai te au aerenga o te tangata nei i tona uaorai mata: te kimi matatio rā Iehova i te ngakau.

3 Tei te akono i te tuatua-tika, e te tuatua-tau, ko te mea meitaki maata ïa ia Iehova i to te atinga.

4 Te mata teitei, e te ngakau parau, e te lamepa o te aronga kino, e ara anake ïa.

5 Te kimianga o te aronga maroiroi ra, tei runga ïa i te apinga maata: kareka ta te aronga rapurapu ua ra, tei te putaua ïa.

6 Te apinga i rauka i te arero pikikaa, e mea puapinga kore i akapueu keia na te aronga e kimi i te mate.

7 Na tei āruia e te aronga kino ratou e akamataku; no te mea, kare e tika ia ratou kia rave i te tuatua-tau.

8 Te aerenga o te tangata ra, e mea mingimingi ïa e te tu ke: kareka te tangata viivii kore, te tika ra tana tuatua.

9 E mea meitaki te noo i te ākapi-tara ki runga i te taua are ra, i te noo i te are maata ma te vaine kavauvau.

10 Te inangaro ra te ngakau o te tangata kino i te mea kino; kare oki tona tangata tupu e kiteia mai e ia.

11 Kia akautungaia te akavaavaa, te pakari ra te aronga manako kore; e kia akoia atu te tangata pakari ra, te rauka ra iaia te kite.

12 Te akamaara marie ra te tangata tuatua-tika i te are o te tangata kino, te tairipoti anga o te aronga kino no te tuatua kino.

13 Ko tei popani i tona taringa i te aue o te ao ra, e aue katoa aia uaorai, e kare e akarongoia mai.

14 E anga te riri i te apinga apai poiri uaia, e te tutaki kave poiri ua ra, e anga ïa te riri maata.

15 E mea rekareka na te aronga tuatua-tika kia rave i te tuatua-tau; ko te mate ra to te aronga rave ara ra:

16 Ko te tangata kia akaruke i te arataa o te kite ra, ei te uipa anga aia o te aronga mate ra noo ei.

17 Ko tei aruaru i te mea navenave ra, ka riro ei tangata apinga kore; ko tei inangaro i te wina, e te inu ra, kare aia e apingaia.

18 E riro te tangata kino ei oko no te aronga tuatua-tika; e te rave ara no te aronga tiratiratu.

19 E mea meitaki kia noo ua ki te enua motutaa, i te noo ki o te vaine tamaki e te rotoriri.

20 Ko te apinga meitaki roa ra, e te manongi, tei te nooanga o te aronga pakari ra: kareka te tangata neneva ra, e pou rava ïa iaia.

21 Ko tei aruaru i te tuatua-tika e te aroa, e rauka iaia te ora, te tuatua-tika, e te ngateitei.

22 E taea te oire o te aronga ririnui e te tangata pakari, e kua uri i tona paruru ketaketa ki raro.

23 Ko tei tapapa marie i tona vaa e tona arero, kua tapapa aia i tona uaorai ngakau kia kore e rokoia e te tumatetenga.

24 Ko te parau, e te akavaavaa māro tona ingoa, to tei otooto ua mai tona riri ngakau parau.

25 E mate te akatau i tona uaorai inangaro; no te mea kare tona rima e tika kia rave i te angaanga.

26 Te noinoi ua ra aia e po ua atu; e oronga ra te tangata tuatua-tika e kare e tāpu.

27 Te atinga a te aronga kino, e mea viivii ïa; ka tanga atu ei kia apaiia mai ma te manako kino?

28 E mate te kite pikikaa ra; na te tangata akarongo ua oki e akakite i te tuatua-tika.

29 E akaketaketa te tangata kino i tona mata: kareka te tiratiratu ra, e akonokono aia i tona aerenga.

30 Kare e pakari, kare e kite, kare e tuatua kimiia, e tupu ei ia Iehova.

31 Kua akonoia te oroenua no te rā tamaki: ko te re ra, no ko ïa ia Iehova ra.