Nehemia

2 E TAE akera ki te marama ra ia Nisana, i te mataiti tai takau o te ariki ra o Aretekasaseta, te vai ra te wina ki mua i tona aroaro: kua rave iora au i taua wina ra, e kua tuku atura ki te ariki ra. Kare rai toku mata i kinokino ana i mua i tona aroaro.

2 Kua tuatua maira te ariki kiaku, Eaa te mea i kinokino ei to mata na, kare oki koe i maki? e aue ngakau tena. Mataku rava akera au i reira;

3 E kua karanga atura ki te ariki, Kia ora te ariki e tuatau ua atu: eaa te mea e kore ei e kinokino toku mata, te vai tanea ua ra te oire, te ngai menema o toku ai metua, e kua ka te au ngutupa i te ai?

4 Kua tuatua maira te ariki kiaku i reira, Eaa taau e pati mai? Pure atura au i te Atua no te rangi.

5 E kua karanga tura au ki te ariki, Kia tika i te ariki, e te aroa maira koe i to tavini nei, e tono koe iaku ki Iudea, ki te oire o te au menema o toku ai metua ra, kia patu au i te reira.

6 Kua tuatua maira te ariki kiaku, (te noo katoa ra te ariki vaine i vaitata,) Mei te aa ra te roa o taua tere noou ra? e aea koe e oki mai ei? Kua akakite atura au i toku roa, e kua tika i te ariki i te tono iaku ra.

7 Kua karanga atura oki au ki te ariki, Kia tika ia koe, e te ariki, ei leta te o mai kiaku nei na te au tutara i tera pae vai, kia tuku ratou iaku kia aere ua ana e tae ua atu au ki Iudea ra;

8 E tetai leta na Asapha i te tiaki i te ngai vaorakuu a te ariki ra, kia oronga mai aia i te rakau, ei rakau no te au ngutupa no nga paepae o te are, e no te patu o te oire, e no te are taku e tomo ki roto ra. Kua akatika maira te ariki i taku ra, no te rima takinga-meitaki o toku Atua i runga iaku ra.

9 E tae atura au ki te au tutara i tera pae vai, e kua tuku atura au i te au leta a te ariki ra. I tono ana te ariki i te aronga rangatira o te nuku, e te au tangata akaoro oroenua ei kave iaku.

10 Kite akerā Sanabalata te Horoni, e Tobia tavini ngati Amona e, tera maira tetai tangata i aere mai e kimi i te meitaki o te tamariki a Iseraela, ongoongo rava akera raua i te reira.

11 Tae atura au ki Ierusalema, e po toru akera au i reira.

12 Kua tu akera au ki runga i te po, ko au, e ko e tokotai tangata katoa; kare rai oki au i akakite ua atu i tetai tangata i ta toku Atua i tuku mai ki roto i toku ngakau kia rave i Ierusalema: e kare oki o reira e puaka mari ra ko te puaka i nooia e au ra.

13 Aere atura au ki vao i te po, na te ngutupa o te o ra, na mua atu rai i te ruavai o te taae ra, e tae ua atura ki te ngutupa repo ra, atoro akera au i te au patu ngaa ra i Ierusalema, e te au ngutupa i pou i te ai ra.

14 Aere ua atura au e tae ua atura ki te ngutupa o te punavai ra, e te vai a te ariki ra: kare ra e ara e o atu ei te puaka i raro iaku ra kia aere.

15 Kua aere iora au i taua pou ra na te pae kauvai, e kua akara iora i te patu, e kua oki maira au, e kua tomo na te ngutupa o te o ra, e kua oki atura.

16 Kare oki te au tutara i kite i taku i aere ra, e taku i rave; kare rai oki au i akakite ki te ngati Iuda, e te kau taunga, e te aronga mana, e te au tutara e te aronga e toe e akamaroiroi i te angaanga.

17 Kua karanga atura au kia ratou, Te kite ra kotou i to tatou tumatetenga, e te vai tanea ua ra Ierusalema, e kua ka te au ngutupa i te ai; ka aere tatou e tuki i te patu o Ierusalema, kia kore tatou e akakino akaouia.

18 Kua akakite atura au i te rima takinga-meitaki o taku Atua i runga iaku; e te tuatua oki ta te ariki i tuatua mai kiaku ra. Kua tuatua maira ratou, E tu tatou ki runga e patu. Kua akamaroiroi iora ratou i to ratou rima no taua angaanga meitaki ra.

19 Kite akerā Sanabalata te Horoni, e Tobia tavini ngati Amona, e ko Gesema te Arabia ra, kua taitoito maira ratou ia matou, e kua akavaavaa mai ia matou, e kua na ko maira, Eaa tena mea ta kotou i rave na? e kaitamaki ainei kotou i te ariki?

20 Kua karanga atura au kia ratou, na ko atura kia ratou, Na te Atua o te rangi e akamanuia i ta matou nei; e teianei, ka tu matou ko tona au tavini e patu: kare rai a kotou tuanga, kare a kotou puapinga, kare oki e manakoanga, i Ierusalema nei.