Ebera

11 E TEIANEI, ko te akarongo nei, ko te tumu tikai ïa i te au mea i tatariia nei, e te kite ïa i te au mea kare i akaraia nei.

2 No te reira oki i raukaʼi te rongo meitaki i te aronga taito ra.

3 No te akarongo i kite ei tatou e no te tuatua a te Atua nga ao nei; kare oki te au mea i akaraia nei i angaia i tetai au mea i kitea ra.

4 No te akarongo i meitaki rava’i ta Abela atinga i apai i te Atua i ta Kaina, i tuatuaia mai ei aia e e tangata tuatua-tika aia, ko te Atua i akatika mai i taua apinga oronga nana ra; e teianei, mate ua rai aia, te tuatua ua mai nei rai, i te reira.

5 No te akarongo i akaumuiaʼi a Enoka kia kore aia e kite i te mate; e “kare atura aia i kitea, no te mea kua akaumuia aia e te Atua:” ou oki aia i akaumuiaʼi i kite ei aia e, kua pereperekavana te Atua iaia.

6 Kare ra e akarongo ra kare rava aia e mareka: ko te akamori i te Atua ra, kia akarongo aia e, e Atua e tikaʼi, e koia tei tutaki mai i te aronga i kimi tikai iaia.

7 No te akarongo oki to Noa, ka akakiteia mai ei aia e te Atua i te au mea kare rai i kitea maira, e rokoia iora e te mataku, i tarai ei i te pai, kia ora tona ngutuare; akaapa iora i to te ao, e riro atura oki aia ei atu i te tuatua-tika e rauka i te akarongo ra.

8 No te akarongo i akono ei Aberahama, ka tuatuaia mai ei aia e, e aere ki tetai enua e rauka mai iaia a muri atu ei tuanga; e aere atura aia ma te kite kore i taua enua i aereia e ia ra.

9 No te akarongo i tuitarere ei aia i taua enua i tuatuaia maira, mei te mea e, e enua ke ra, i te noo ua anga i roto i te puakapa, ratou katoa ko Isaaka e Iakoba, ko nga tangata tuanga ïa ma ia katoa i tei tuatuaia maira:

10 Te maara ra aia e e rauka te oire tumu mou, ko te akatu e te tutara o taua oire ra, ko te Atua ïa.

11 No te akarongo i raukaʼi ia Sara te maroiroi i to ei ra, e anau maira tana tamaiti, ope uaʼi tona tuatau tikai, no te mea i manako aia e, e tuatua-mou tana ta tei tuatua maira.

12 I anau mai ei ta te tangata okotai ra, e mei te tangata mate ra aia te tu, mei te etu o te rangi ra te maata, e mei te one taatai kare e ope kia tatau.

13 I mate anake atura taua aronga ra ma te akarongo, kare rai i rauka tei tuatuaia maira, kua akara ra i taua au mea ra i te atea ke, e kua akarongo tikai, e kua āriki marie, kua aaki ua e, e tangata ke ke ratou e te tuitarere ua i teianei ao.

14 Ko te aronga oki i pera maira, kua akakite ua e, te kimi ra ratou i te enua o to ratou metua.

15 Naringa ratou i anoano maata i taua enua no reira mai ratou ra, e tika ua ia ratou kia oki.

16 Kua anoano ra ratou i te enua meitaki rava ra, koia oki te ao ra: i kore ei te Atua i akama ia ratou kia karangaia aia e e Atua no ratou; kua akono oki aia i tetai oire no ratou.

17 No te akarongo i apai ei a Aberahama ia Isaaka, ka timataiaʼi aia ra; ko te tangata i rauka iaia te tuatua i tuatuaia maira, kua apai ïa i tana tamaiti anau tai,

18 Nona te tuatua i karangaia ra e, “Na roto i ta Isaaka te uanga i karangaia:”

19 I karanga oki aia e, e tika i te Atua kia akatu mai iaia mei te mate maira: e kua rauka akaou maira iaia mei reira mai ei aiteanga.

20 No te akarongo i akaoraʼi a Isaaka ia Iakoba raua ko Esau i te au mea e tupu a muri atu.

21 No te akarongo i akaoraʼi a Iakoba i nga tamariki a Iosepha ka mate ei aia ra, piko iora ki raro i rungao i te tokotoko nona ra ma te akamori i te Atua.

22 No te akarongo i akakite ei a Iosepha i te riro anga o te tamariki a Iseraela mei Aiphiti atu, ka mate ei aia ra; e ikuiku maira oki i te tuatua i tona ivi.

23 No te akarongo i uunaiaʼi a Mose e nga metua nona, ka anau mai ei ra e, e toru akera marama, no te mea i akara iora raua e e tamaiti purotu; e kare raua i mataku i te akaue a te ariki ra.

24 No te akarongo i kore ei i tika ia Mose, ka pakari ei aia ra, kia tapaia i te tamaiti a te tamaine a Pharao ra;

25 E mea meitaki iaia te rave katoa i te mate i te kapiti anga i te au tangata o te Atua, i te rave i te navenave poto ua o te tuatua kino ra;

26 E apinga maata oki iaia te akakino i te Mesia nei, i te au taonga katoa o Aiphiti ra: te akono marie ra oki aia i te tutaki ra ei oko.

27 No te akarongo i akaruke ei aia ia Aiphiti, kare i mataku i te riri o te ariki ra: i maroiroi rava atura aia i te akara anga atu iaia, i tei kore e kitea kia akara ra.

28 No te akarongo i akono ei aia i te pasa, e te pîpî anga toto ra, kia kore tei ta i te tama mua ra kia rave katoa mai ia ratou ra.

29 No te akarongo i tae ei ratou na raro i te Tai Kutekute mei te mea e e enua marō: e kia timata to Aiphiti ra i te aru, maremo atura ïa.

30 No te akarongo i ingaʼi te patu i Ieriko ra ki raro, kia oti te akapini angaia i nga rā e itu ra.

31 No te akarongo i kore ei i mate te vaine akaturi ra ko Rahaba, ka mate ei te aronga akarongo kore ra, koia i āriki meitaki i nga tutaka ra.

32 E eaa tu rai taku tuatua? e roa ua oki kia tuatua au ia Gideona, ia Baraka, ia Samasona, ia Iepheta; ia Davida oki ia Samuela, e te au peroveta ra:

33 Ko tei pou ia ratou te au basileia i te akarongo, kua rave i te tuatua-tika ra, kua rauka tei tuatuaia maira, kua mopani i te vaa o te au liona,

34 Kua tamate i te ririnui i o te ai, kua ora i te mata koke ra, kua akamaroiroiia i te paruparu anga ra, toa rava atura oki i te tamaki, ati atura oki ia ratou te au nuku o te enua ke ra.

35 I rauka akaou oki ta te au vaine tamariki i mate ra i akaora akaouia ïa: e tetai papaki akamamaeia ïa, kare i rave i te ora; kia rauka ia ratou te tuakaouanga i te mea meitaki rava:

36 E e mate maata to tetai pae i te akavaavaa, e te pāpā, e te ruru, e te tapeka i roto i te are tapekaanga:

37 I peîia ratou i te toka, i kekeia rotopu ïa ratou e taka ke atura, i timataia, i tamate takiriia i te koke; i koka aere ua ratou ma te kakau kiri mamoe e te kiri puaka-nio, ma te puapinga kore, te tairoia, e te takinga-kinoia ra;

38 (Kare oki teianei ao i tau i taua aronga ra:) i koka aere ua oki ratou i te medebara, e ki runga i te maunga, e te pipini anga ki roto i te au ana, e te au vaarua o te enua nei.

39 E rongo meitaki tei rauka ia ratou ravarai nei i te akarongo, kare ra i rauka tei tuatuaia maira:

40 No te mea kua vaooia e te Atua te mea meitaki rava atu no tatou, kia kore e rauka te meitaki roa ia ratou anake auraka tatou katoa ra.