1 Samuela

19 KUA tuatua mairā Saula ki tana tamaiti kia Ionatana ra, e te au tavini katoa nona ra, e ta ratou ia Davida.

2 E akaperepere maata ra to te tamaiti a Saula to Ionatana ia Davida: e kua akakite mairā Ionatana kia Davida, na ko maira, Te anoano nei toku metua ra ko Saula ia koe e ta: e teianei, teia taiku tuatua kia koe, e akamaroiroi ia koe uaorai e kia ao ake ei roto i tetai ngai ngaro koe pipini atu ei, ka noo marie atu ei:

3 E ka aere mai au ki vao, e ei vaitata katoao au i toku metua ki roto i te kainga i nooia e koe ra; e naku e tuatua ki toku metua ia koe ra; e kia kite au i te ka tupu ra, naku ïa e akakite atu kia koe ra.

4 Kua tuatua meitaki aturā Ionatana ki tona metua ra kia Saula ia Davida, na ko atura kiaia, Auraka te ariki e takinga-kino i tona tavini ia Davida; no te mea kare akenei aia i takinga-kino ia koe, e no te mea e angaanga meitaki maata tana i rave naau ra:

5 Kua akaruru ua oki aia i tona uaorai ora, e kua ta atura i te Philiseti, e e ora maata ta Iehova i rave no Iseraela katoatoa; kua kite oki koe, e kua rekareka oki koe ra: eaa oki koe e ara ai i te toto ara kore, e ta ara kore uaʼi ia Davida.

6 Kua akarongo mairā Saula i te tuatua a Ionatana: e kua taputou iorā Saula, Te ora rā Iehova, kare rava aia e taia.

7 Kua kapiki aturā Ionatana ia Davida, e kua akakite aturā Ionatana kiaia i taua au tuatua katoa ra. E kua arataki mairā Ionatana ia Davida kia Saula ra, tu iora aia ki mua i tona aroaro mei tei muatangana ra.

8 Kua tupu akaou iora te tamaki; e kua aere atura Davida e kua tamaki ki te Philiseti, ta atura e kua maata atura tei pou; e ati ua oki ki mua iaia.

9 Tei runga maira te vaerua kino no ko mai ia Iehova ra ia Saula; noo uaʼi aia i roto i tona are, ma te tao i tona rima: e kua akatangi iora to Davida rima i tana kinura.

10 Te umuumu marie rā Saula e ko ia Davida ki tau tao ra, e kia piri atu ki runga i te pae are; akamanu ua atura ra aia mei mua i te aroaro o Saula, e puta atura taua tao ra ki roto i te pae are ra: oro aturā Davida, e ora atura i te reira po.

11 Kua tono atura oki a Saula i te au karere ki te ngutuare o Davida, e moetapapa iaia, e ta iaia kia popongi ake: kua akakite maira te vaine a Davida ra ko Mikala kiaia, na ko maira, Kia kore koe e oro i teianei po kia ora koe ra, apopo koe e taiaʼi.

12 Kua tuku iorā Mikala ia Davida ki raro na roto i te māramārama; e aere atura aia, e oro atura, e ora atura.

13 E kua rave iorā Mikala i tetai tiki, kua tuku iora ki roto i te roi, e kua tuku iora i te kakau uru puakanio ei urunga nona, e kua tapoki iora ki te kakau.

14 E kia tono mai a Saula i te tangata e rave ia Davida, kua karanga atura te vaine, Kua mate aia i te maki.

15 Kua tono akaou mairā Saula i te tangata e akara ia Davida, na ko akera, E apai mai iaia i ko nei kiaku nei ma te roi katoa, kia ta ua iaia.

16 Tei te tomo anga taua arongakarere ra ki roto ra, i na, te vai ua ra taua tiki ra ki runga i te roi, ma te kakau uru puakanio ei urunga nona.

17 Kua tuatua mairā Saula kia Mikala, Eaa koe i peraʼi i te pikikaa mai iaku, i tuku ei koe i toku enemi, e kua ora atura aia? Kua karanga aturā Mikala kia Saula, I tuatua mai aia kiaku e, E tuku ake ana koe iaku; eaa ïa puapinga kia ta atu au ia koe ra?

18 Riro aturā Davida, e kua ora atura, aere atura ki Rama kia Samuela ra; e kua akakite atura kiaia i te au ravenga a Saula iaia ra. Kua aere atura aia e Samuela katoa, noo atura i Naiota.

19 E akakiteia mairā Saula, tuatuaia maira, I nā Davida, tei Naiota i Rama ra.

20 Kua tono aturā Saula i te au karere e rave ia Davida; e kite atura ra ratou i te pupu peroveta i te totou anga, e ko Samuela oki to rungao i taua aronga ra, tei runga maira te Vaerua o te Atua i taua au karere no Saula ra, totou katoa oki ratou.

21 E kia akakiteia mai a Saula ra, kua unga atura aia i etai puke karere ke, e kua totou katoa oki ratou. E kua tono akaou aturā Saula i te au karere, ko te tu toru ïa, e kua totou katoa oki ratou.

22 Kua aere katoa atura aia ki Rama, e tae atura ki te ruavai maata i Seku ra: kua ui atura aia, e kua karanga atura, Teieā Samuela raua ko Davida? Kua tuatua maira tetai, I na, tei Naiota i Rama ra raua.

23 E aere atora aia ki reira ki Naiota i Rama ra; tei runga katoa maira te Vaerua o te Atua iaia, aere ua atura aia ma te totou, a tae ua atura aia ki Naiota i Rama ra.

24 Kua kiriti katoa akera aia i ona kakau ra, e kua totou ua atura aia ki mua i te aroaro o Samuela; moe ua iora i te reira rā e te reira po, ma te kakau kore. Koia tei tuatuaia ra e, Tei te au peroveta katoa ra oki a Saula?