2 Samuela

5 KUA aere maira te au kopu ravarai o Iseraela kia Davida ra ki Heberona, e kua karanga atura kiaia, na ko atura, I na matou, ko toou ra ivi ko matou ïa e toou ra kiko.

2 I muatangana ra oki, ka ariki ei a Saula i runga ia matou ra, ko koe rai tei arataki ia Iseraela ki vao, e naau rai i akaoki mai ki roto: kua tuatua mai oki a Iehova kia koe, Naau e angai i toku iti-tangata ia Iseraela, e ei tutara koe ki runga ia Iseraela.

3 Kua aere anake maira te aronga pakari o Iseraela ki te ariki ra ki Heberona; e kua papau iora te ariki ra ko Davida i tetai koreromotu ia ratou i Heberona, ki mua i te aroaro o Iehova; kua akatainu iora ratou ia Davida ei ariki ki runga ia Iseraela.

4 Ka toru ngauru o Davida mataiti i riro ei te au iaia, e a oki ngauru anga te mataiti i tona ariki anga.

5 E itu mataiti e ono marama i te ariki anga ki runga ia Iuda i Heberona: e i Ierusalema e toru ïa ngauru e toru ara i te mataiti i te ariki anga ki runga ia Iseraela ravarai e ia Iuda ra.

6 Aere atura te ariki e tona au tangata ki Ierusalema ki te ngati Iebusi i te aronga uenua ra; e kua tuatua akera ratou kia Davida, na ko akera, Kare koe e o mai i ko nei, na te matapo oki e te pirikoki koe e paruru atu: i manako oki ratou e, kare a Davida e o i reira.

7 Rauka iora ra ia Davida te punanga etaeta ra ko Ziona; koia oki te oire o Davida.

8 I tuatua ana oki a Davida i taua rā ra, Ko tei aere na te ara vai, e kua ta i te ngati Iebusi, e te pirikoki e te matapo, tei makitakita e to Davida ngakau: ei rangatira maata ïa aia. (Kua tuatua mai oki te matapo e te pirikoki, Kare aia e tae ki roto i te are.)

9 Noo iorā Davida i roto i taua punanga ra, e tapaia iora i te oire o Davida. Kua patu iora oki a Davida i te patu e pini ua ake mei Milo mai e i roto ra.

10 Tupu aturā Davida, aere atura i te maata anga; e ei vaitata katoao te Atua Sabaota ra ko Iehova iaia.

11 Kua tono maira te ariki o Turia ra ko Hirama i te karere kia Davida, ma te rakau ra e arezi, e te aronga taunga tarai rakau, e te aronga tarai toka; e kua patu iora ratou i tetai are no Davida.

12 E kia akarā Davida e kua akatinamouia aia e Iehova ei ariki i runga ia Iseraela, e kua akateitei aia i tona au no tona ra au tangata no Iseraela;

13 Kua rave rai a Davida i etai vaine tavini ra nana, e te vaine nana, i Ierusalema, ka aere mai ei aia mei Heberona mai: e kua anau mairai oki te tamaroa e te tamaine na Davida.

14 Teia oki te au ingoa no tei anau mai nana i Ierusalema; ko Samua, e ko Sobaba, e ko Natana, e ko Solomona,

15 E ko Ibahara, e ko Elisua, e ko Nephega, e ko Iaphia,

16 E ko Elisama, e ko Eliada, e ko Eliphaleta.

17 E kite akera te Philiseti e, kua akatainu ratou ia Davida ei ariki no Iseraela, kua aere anake iora te Philiseti e kimi ia Davida; e kite akerā Davida, aere atura aia ki raro i te punanga.

18 Tae maira oki te Philiseti i reira, e kua akamatoa iora ia ratou uaorai i te o ra ko Rephaima.

19 E kua ui aturā Davida kia Iehova, na ko atura, E aere ainei au ki runga ki te Philiseti? ka tuku mai ainei koe ia ratou ki toku rima nei? Kua tuatua mairā Iehova kia Davida, Ka aere ki runga: ka tuku tikai au i te Philiseti ki to rima na.

20 Kua aere iorā Davida ki Baala-pera-zima, e kua ta iorā Davida ia ratou i reira, e kua tuatua akera, Kua ngaangaa rava io nei toku au enemi ia Iehova ki mua iaku, mei te vai e ngaa ra: tapa iora i te ingoa o taua ngai ra ia Baala-perazima.

21 I reira to ratou au idolo i te akaruke angaia, e na Davida e na tona au tangata ratou i taʼu ki te ai.

22 Kua aere akaou maira oki te Philiseti, kua akamatoa iora ia ratou uaorai i te o ra ko Rephaima.

23 E kia ui a Davida kia Iehova, kua tuatua maira aia, Auraka koe e aere ki runga: e korotakanimo koe na muri ia ratou, ka na ko mai ei i te aere kia ratou na te pae Baka ra.

24 E kia akarongo koe i te ngaee anga i te kauru o taua au Baka ra, ka akamaroiroi koe i reira: e reira oki a Iehova e aere ei na mua ia koe, e ta i taua nuku ra i te Philiseti.

25 E kua perā Davida, i ta Iehova i akaue mai kiaia ra; kua ta iora i te Philiseti mei Geba atu e tae ua atura ki Gezera.