Ephesia

3 NO reira oki au nei ko Paulo, te tangata o Iesu Mesia, i tapekaia nei, tapekaia ia kotou i te etene na.

2 Kua kite oki kotou i te akaaerenga i te aroa ua o te Atua i tukuia mai kiaku nei no kotou na:

3 E nana i akakite ua mai iaku i te tuatua ngaro ra; (i taku i tata poto atu ia kotou na,

4 E kite ei oki kotou i toku kite i te tuatua ngaro a te Mesia nei, kia tatau ra;)

5 Ko tei kore i akakiteia mai ki te tangata i te au uki i muatangana ra, mei tei akakiteia mai e te Vaerua i teianei ki tana au aposetolo tapu ra e te au peroveta nana ra;

6 E ei aronga tuanga katoa te au etene, ei kapitianga okotai rai, e kia rauka katoa tei tuatuaia mai e ia i te Mesia i te evangelia nei:

7 I akariroiaʼi oki au nei ei orometua, no te meitaki i orongaia mai kiaku nei i te aroa ua o te Atua i te ravenga ririnui a tona mana.

8 Ko au nei rai, ko te iti rava i te iti i te aronga tapu ravarai, tei orongaia mai taua aroa ua nei, kia tutu aere au ki rotopu i te etene i te meitaki maata ope kore o te Mesia kia kimi ra;

9 E ei akakite ki te au tangata ravarai i te kapitianga o te tuatua ngaro, i uunaia mei muatangana mai o teianei ao i roto i te Atua, ko tei anga i te apinga tini ravarai i te Mesia ra ia Iesu:

10 Kia akakite i te ekalesia i teianei te pakari tumatatini o te Atua i te ui ariki e te aronga mana i te ao ra,

11 I te akakoroanga nana mei muatangana mai tana i akakoro i to tatou Atu ia Iesu Mesia:

12 Nona tatou e tuatua uaʼi, e te o oki ma te mataku kore i te akarongo iaia.

13 E teianei, teia toku anoano, eiaa kotou e taitaia i toku nei mate ia kotou, ko to kotou oki ïa kakā.

14 No reira oki au i akamingi atu ei i taku turi ki raro i te aroaro o te Metua o to tatou Atu ra o Iesu Mesia,

15 Nona oki te ingoa i tapaia i te kopu-tangata ravarai, to runga i te rangi, e to te ao katoa nei,

16 Kia oronga aia ia kotou i te maata o tona kakā, kia akaetaetaia mai te tangata i roto ra e tona Vaerua;

17 Kia noo te Mesia i roto i to kotou ngakau i te akarongo; kia akaia kotou, e kia akatumuia i te inangaro,

18 Kia kite kotou e te aronga tapu katoa ra, i te tipoto, e te tiroa, e te oonu, e te teitei,

19 Kia kite kotou i te aroa o te Mesia, ko te kore e taea e te kite tangata nei, kia akakiia kotou e kia tae ki te ki katoa a te Atua ra.

20 E teianei ei iaia, ei te maata ua atu tana kia rave i te au mea katoa ta tatou e pati nei, e ta tatou e manako nei, i te mana i ririnui i roto ia tatou nei,

21 Ei iaia te kakā i te ekalesia ia Iesu Mesia, e ope ua atu te au uki ravarai, e tuatatau ua atu. Amene.