Exodo

34 KUA tuatua mairā Iehova kia Mose, Ka tarai ana koe i e rua papa toka, mei tei muatangana ra te tu; e naku e tata i te tuatua ki rungao i aua nga papa ra, i tei tataia ki runga i nga papa i muatangana, taau i akangaangaa ra.

2 E akateateamamao koe kia popongi, e aere mai koe i te popongi ki runga i te maunga nei ko Sinai, akakite mai ei ia koe uaorai iaku i reira ki runga i te take maunga ra.

3 Auraka rava ra ei tangata e aere katoa mai ki runga, auraka rava oki tetai tangata kia kitea mai i taua maunga nei e pini ua ake; auraka katoa te mamoe e te puakatoro e kaikai aere i vaitata i taua maunga ra.

4 Kua tarai iora aia i nga papa toka e rua, mei tei muatangana ra te tu: e kua tu akerā Mose ki runga i te popongi roa, aere atura ki rungao i taua maunga ra ko Sinai, i ta Iehova i akaue mai iaia ra, e kua taoi katoa i nga papa toka i tona rima.

5 Kua eke mairā Iehova na roto i te tumurangi, tu ua iora i reira i vaitata iaia, e kua tutu maira i te ingoa ra o Iehova.

6 Kua aere iorā Iehova na mua iaia, kua tutu maira, Ko Iehova, Ko Iehova, e Atua takinga-meitaki, e te aroa ua, e te akakoromaki maata, e te meitaki maata, e te tuatua-mou,

7 E te vaoo marie i te aroa e tausani ua atu, e te akakore i te tuatua-tika kore, e te ara, e te kino; e kare e tuatua ki te tangata kino e, e tangata kino kore, i te tutaki anga i te ara a te aronga metua ki runga i te tamariki, e ki runga katoa i te tamariki a te au tamariki ra, e tae ua atu ki te toru e te a o te uki ra.

8 Kua rapurapu ua iorā Mose, kua tupou iora aia ki raro i te one, akamori atura;

9 E kua karanga atura aia, Kua kite aroaia au e koe, e taku Atu, teia taku tuatua, e aere katoa koe, e taku Atu, ki roto katoa ia matou; e au tangata kaki ketaketa rai oki ratou; e e akakore mai koe i ta matou tuatua-tika kore, e ta matou ara, e e rave mai koe ia matou noou uaorai.

10 E kua tuatua maira aia, I na, e papau au i te koreromotu: e rave au i te mea umereia ki mua i te aroaro o toou au tangata katoa na, kare rai i raveia i te ao katoa nei, e i roto i te au tangata katoa; e ka kite te au tangata katoa i o ou ra i te angaanga a Iehova: e mea tu ke oki taku ka rave ia koe ra.

11 E akono meitaki koe i taku e akaue atu kia koe na i teianei rā: I na, e tuaru ke au i te ngati Amori ki mua ia koe, e te ngati Kanaana, e te ngati Heta, e te Perizi, e te ngati Hevi, e te ngati Iebusi.

12 Kia matakite ia koe, ko te papau aea koe i te koreromotu i to taua enua taau e aere na; ko te riro aea oki ei ereere ia koe na;

13 E akapou ra kotou i ta ratou au atarau, e vavaʼi i ta ratou au tiki, e tipu oki i te au Asetoreta no ratou;

14 Auraka oki koe e akamori i tetai atua ke: e Atua vareae oki a Iehova, ko Vareae oki tona ingoa:

15 Ko te papau aea koe i te koreromotu i te tangata no te reira enua, ko te aere ke aea ratou i te akaturi aere anga i to ratou au atua, e e apai i te atinga ki to ratou au atua, ko te tuatua mai aea tetai kia koe, e ko te kai aea koe i tana atinga;

16 Ko te rave aea koe i ta ratou au tamaine ei vaine na taau au tamariki tamaroa, e ko te akaturi aea taua au tamaine na ratou ra i te aru anga i to ratou au atua, akatatipa ke atura ratou i taau au tamariki i te kanga anga i to ratou au atua.

17 Auraka roa koe e anga i tetai atua akato noou.

18 E akono koe i te oroa kai akaopue kore ra: e kai koe i te kai akaopue kore e kia po itu, taku i akaue atu kia koe na, ei te tuatau akonoia ra, i te marama ra ko Abiba: no te mea tei te marama ra ko Abiba toou aere anga mai mei Aiphiti maira.

19 Te au tamaroa tama mua ra, naku anake ïa, e te toa anaunga mua o taau au puaka, to te puakatoro e to te mamoe.

20 Kareka to te asini anaunga mua, e oko koe i te reira i te mamoe: e kia kore e okoia e koe, e aati i te kaki. Taau au tamaroa tama mua katoa ra, e oko koe i te reira: e auraka ra tetai e aere puapinga kore ua mai ki mua iaku nei ra.

21 E rave koe i te angaanga i nga rā e ono ra, kareka i te rā itu ra e akangaroi koe i reira: i te tuatau tanu anga e te kokoti anga, e akaangaroi koe.

22 E te oroa i te ebedoma itu ra, i te popo mua i te akāu sitona ra, e akono koe i te reira, e te oroa uipa anga kai i te openga o te mataiti ra.

23 Kia tu toru taau au tane katoa i te aere anga mai ki mua i te aroaro o te Atu ra ko Iehova, te Atua o Iseraela ra, i te mataiti okotai.

24 E tuaru ke oki au i te au iti-tangata ki mua ia koe, e e akamaata au i toou na kotinga: kare rava oki tetai e anoano mai i to enua, kia aere koe ki runga ki mua i te aroaro o to Atua ra ko Iehova, tu toru i te mataiti okotai.

25 Auraka koe e apai mai i te toto o taku ra atinga ma te akaopue; e auraka roa te atinga i te oroa ra i te pasa e vaioia kia ao.

26 Te popo o toou na enua i tei para ana, ko taau ïa e apai mai ki roto i te are o toou Atua ra ko Iehova. Auraka koe e tunu i te punua puakanio i te u o te tinana uaorai.

27 Kua tuatua mairā Iehova kia Mose, E tata koe i taua tuatua nei; ko te tu oki teia o te tuatua o te koreromotu, taku i papau kia koe, e kia Iseraela nei.

28 E rua takau ona rā kia Iehova ra, e rua takau oki po; kare aia i kai i te kai, kare oki i inu i te vai. E kua tata iora aia i te tuatua o te koreromotu ra, ko nga ture okotai ngauru, ki runga i nga papa ra.

29 E kia eke mai a Mose ki raro mei runga i te maunga ra ko Sinai, ma nga papa kite ra e rua i te rima o Mose ra, tae maira aia ki raro mei runga mai i taua maunga ra, kare akerā Mose i kite e, te kakā ra tona kiri mata, koia i karangaranga kiaia ra.

30 E kia akara akerā Aarona e te tamariki ravarai a Iseraela ia Mose, i na, te kakā maira te kiri mata; mataku akera ratou kia akavaitata atu kiaia.

31 Kua kapiki atura rā Mose kia ratou; kua oki mairā Aarona e te au tutara ravarai o te uipaanga kiaia ra: e kua karangaranga aturā Mose kia ratou.

32 E muri akera kua akavaitata katoatoa maira te tamariki a Iseraela ra; e kua tuku iora aia i te au tuatua katoa kia ratou, ta Iehova i tuatua mai kiaia i runga i te maunga ra ko Sinai.

33 E oti akera ta Mose tuatua anga atu kia ratou ra, kua tuku akera aia i te tapoki ki runga i tona mata.

34 Kareka kia aere a Mose ki roto ki mua i te aroaro o Iehova e tuatua kiaia ra, kua kiriti akera aia i taua tapoki ra, e tae ua maira aia ki vao; e kia aere maira aia ki vao, kua tuatua aia ki te tamariki a Iseraela i tei akaueia mai kiaia ra.

35 Kite akera te tamariki a Iseraela i te mata o Mose, e te kakā ra te kiri mata o Mose: kua tuku akaou akerā Mose i te tapoki ki runga i tona mata, e kia aere aia ki roto e tuatua kia Iehova ra.