Angaanga

18 E MURI akera i te reira, akaruke iorā Paulo i Atene; e tae atura ki Korinetia:

2 Kite atura aia i tetai tangata ngati Iuda, no Ponoto, ko Akuila te ingoa, e tana vaine ko Peresila, mea aere ou mai aia mei Itale mai; (no te mea kua akaue a Kalaudio i te ngati Iuda ravarai e akaruke mai i Roma;) aere atura aia kia raua ra; 3 No te mea oki okotai rai taoonga, noo atura aia ki o raua, rave iora i te angaanga: (e anga are kakau to ratou taoonga.)

4 Kua tuatua oki aia i te au sabati ravarai i roto i te sunago, e ako atura i te ngati Iuda ma te Eleni.

5 E kia tae mai a Sila raua ko Timoteo mei Makedonia mai, riro rava atura te vaerua o Paulo, kua akakite ua atura ki te ngati Iuda e, ko Iesu te Mesia.

6 Kia taumāro maira ra ratou, e kia akakino mai, kua ruru atura aia i tona kakau, kua tuatua atura kia ratou, To kotou na toto, ei rungao ïa i to kotou uaorai mimiti; kua mā au; teia au ka aere ki te etene.

7 Aere atura aia e tomo atura ki roto i te are o tetai tangata akono i te Atua, ko Iuseto te ingoa, tei vaitata tona are ki te sunago.

8 Kua akarongo ra te tutara o te sunago, ko Keripo te ingoa, e tona ngutuare katoa, i te Atu; e manganui katoa to Korinetia i kite, kua akarongo, e bapetizoia iora.

9 Kua tuatua maira te Atu kia Paulo i te orama i te po, Auraka e mataku, ka tuatua rai, auraka koe e muteki ua:

10 Tei vaitata katoa oki au ia koe, kare rava e tangata e rave kino mai ia koe; e manganui oki toku tangata i teianei oire.

11 Kua noo atura aia i reira, okotai mataiti e e ono marama, i te apii anga i te tuatua a te Atua ki o ratou ra.

12 Ia Galio i tutara i Akaia ra, kua tu katoatoa akera te ngati Iuda ma te anoano okotai, e opu ia Paulo e kua kave atura iaia ki te akavaanga, Na ko akera,

13 Te ako nei teianei tangata i te au tangata nei, e akamori i te Atua ma te akono kore i te ture.

14 E te akonokono rā Paulo e tuatua, kua tuatua mairā Galio i te ngati Iuda, Naringa teianei e tuatua takinga-kino, e te kanga, e te au ngati Iuda, e tika ïa kia akarongo marie atu au ia kotou.

15 E taumāro anga tuatua tena, e te ingoa, e ta kotou uaorai ture, na kotou ïa e akara i te reira; kare au e akava i te reira tuatua.

16 Turaki ke atura aia ia ratou i taua akavaanga ra.

17 Kua opu akera te au Eleni katoa ia Sositene i te tutara maata i te sunago ra, kua pāpā atura ki mua i te akavaanga ra. Kare ravā Galio i akono i te reira au mea.

18 Kua noo iorā Paulo i reira e roa akera, poroaki maira i te au taeake, ano atura ki Suria, e ko Peresila katoa raua ko Akuila; i pakoti ana aia i tona mimiti i Kenekerea, i tia ana oki aia.

19 E tae atura ki Ephesia, vaio akera ia raua i reira: kareka aia uaorai, tomo atura ïa ki roto i te sunago, kua tuatua atura ki te ngati Iuda.

20 E kia tāpu mai ratou iaia e noo rai aia ki o ratou ra e kia roa, kare akera i tika iaia;

21 Kua poroaki atura aia ia ratou, na ko atura, E akono rai au i te oroa i vaitata i Ierusalema ra e tikaʼi: ka oki maira au ki ku nei kia kotou nei, kia tika i te Atua. Ano atura aia mei Ephesia atu.

22 E tapae atura aia ki Kaisarea, aere atura ki runga, e aroa atura i te ekalesia, e oti akera, riro atura ki Anetioka.

23 E roa akera aia i reira, riro atura, aere atura, e na Galatia e Pherigia e pini rava akera tei reira enua, i te akatinamou anga atu i te au pipi katoa.

24 Kua aere maira ki Ephesia tetai ngati Iuda, ko Apolo te ingoa, i Alekanederea te anau anga, e tangata vaa tukatau, e te pakari oki i te tuatua i tataia ra.

25 I apiiia aia i te tuatua a te Atu, e no te maroiroi o tona ngakau, kua tuatua iora, e apii marie atura i te tuatua a te Atu, ko te bapetizoanga a Ioane anake ra tana i kite.

26 Timata atura oki aia i te tuatua i roto i te sunago ma te mataku kore: e kia akarongo aturā Akuila ma Peresila iaia, kua arataki maira iaia ki to raua uaorai ngutuare, e kua akakite tikai atura kiaia i te tuatua a te Atua.

27 E inangaro akera aia i te ano ki Akaia, kua tata iora te au taeake i te tuatua, i te ako anga atu i te au pipi, kia kite meitaki mai ratou iaia: e tae atura aia ki reira, e turu maata tona i te aronga i akarongo, te aronga no te aroa ua o te Atua i akarongo ei ra.

28 Māro marie atura aia i te ngati Iuda i te ngati tangata, akakite pu tikai atura e, ko Iesu te Mesia, i te tuatua i tataia ra.