Genese

16 KARE a te vaine a Aberama, ko Sarai, e tamaiti i anau nana; e e tavini vaine tona no Aiphiti, ko Hagara te ingoa.

2 E kua tuatua mairā Sarai kia Aberama, I na, kare akenei i tika ia Iehova kia anau tamariki au; teia taku tuatua kia koe, e aere atu koe ki toku tavini vaine nei; peneiake ko te rauka taku tamariki iaia ra. Kua akarongo atura oki a Aberama i taua tuatua a Sarai ra.

3 E raungauru akera o Aberama mataiti i te noo anga i Kanaana, kua rave akera te vaine a Aberama ko Sarai i tona tavini vaine Aiphiti ra ia Hagara, tuku atura ki tana tane ra kia Aberama ei vaine nana.

4 E aere atura aia kia Hagara ra, e kua to iora aia; e kite akera aia uaorai e, kua to aia, riro atura tona pu vaine ei akavaavaaanga nana.

5 Kua tuatua mairā Sarai kia Aberama, Tei ia koe toku kino; kua oronga atu oki au i toku tavini vaine ki roto i to umauma; e kite akene iaia e, kua nui aia ra, i riro io nei au ei akavaavaaanga nana. Ei ia Iehova te tuatua ia taua.

6 Kua karanga aturā Aberama kia Sarai, I na, tei toou rima oki to tavini vaine; ka rave koe i taau e anoano iaia. Kua tinaimate aturā Sarai iaia, e oro ke atura aia.

7 E kitea iora aia e te Angela a Iehova i te pae o tetai punavai i te medebara ra; i te punavai i te arataa, ka aere ei ki Sura ra.

8 E kua tuatua maira aia, E Hagara e, te tavini o Sarai ra, mei ea mai koe? e e aere oki koe ki ea? Kua karanga atura aia, I oro mai nei au i toku pu vaine ra ia Sarai.

9 E kua tuatua maira te Angela a Iehova kiaia, Ka oki ki toou pu vaine ra, ka kauraro marie atu ei koe kiaia.

10 E kua tuatua mairai te Angela a Iehova kiaia, Ka akamaata roa au i toou uanga, kia kore roa e tika kia tatau i te maata.

11 Kua tuatua rai oki te Angela a Iehova kiaia, I na oki koe, kua nui, e e tamaiti taau e anau, e ko Isemaela tona ingoa taau e tapa; no te mea, kua akono mai a Iehova i toou na tumatetenga.

12 E ka riro aia ei tangata momoavao; ka rave tona rima ki te tangata katoa, e rave oki to te tangata katoa rima iaia; e ka noo oki aia ki mua i te mata o tona katoa ra ai taeake.

13 Kua tapa iora aia i te ingoa o Iehova i tuatua mai kiaia ra, Te kite maira koe, e te Atua, iaku: kua na ko iora oki aia, Kua akara katoa ainei au i ko nei iaia tei kite mai iaku?

14 No reira i tapaiaʼi taua ruavai ra, ia Berelahai-roi; i na, tei te va i Kadesa e Bereda.

15 E anau akerā Hagara e tamaiti ia Aberama; e tapa iorā Aberama i te ingoa o tana tamaiti, ta Hagara i anau ra, ko Isemaela.

16 E varu akera o Aberama ngauru anga i te mataiti, e ono ara, i anau ei a Hagara i te tamaiti na Aberama, ia Isemaela.