Philipi

2 E TEIANEI e manga maanaana tei te Mesia ra, e manga rekareka tei te aroa, e manga tauanga to te Vaerua, e manga aroa ngakau e te takinga-meitaki,

2 Ka akarava mai kotou i toku nei rekareka, i te tavaitai anga i to kotou manako, ma te inangaro okotai, ma te kapitianga o to kotou ngakau, i te akono anga i te tuatua okotai ra.

3 Auraka takiri e mea e raveia ma te taumāro, e te akanengonengo puapinga kore; ei ngakau akaaka ra, i te manako akameitaki atu tetai ki tetai, auraka iaia uaorai.

4 Auraka te tangata e akono i tona anake uaorai au mea, e akono katoa ra i to etai ke ra au mea.

5 Kia okotai rai o kotou tu ngakau e to te Mesia ra to Iesu:

6 Ko te tu ïa aia no te Atua, e kare aia i manako e, e apinga āru kia aite katoa aia i te Atua ra:

7 Kua tuku ke atura ra aia i tona uaorai tu, e kua rave i to te tavini, i te riro anga mai mei te tangata nei te tu:

8 E koia i kitea mei te tangata nei te tu, kua taakaaka iaia uaorai i te akonoanga e tae ua atu ki te mate, ki te mate satauro ra.

9 I akateitei rava atu ei te Atua iaia, e kua oronga mai i te ingoa i maata ua atu i te teitei i te au ingoa ravarai nei nona:

10 Kia tuku te au turi katoa ki raro, to te rangi, to runga i te enua, e to raro ake i te enua, i te ingoa o Iesu;

11 E kia aaki te au vaa ravarai e, ko Iesu Mesia te Atu, kia kakā te Atua Metua ra.

12 E tenana, e aku au akaperepere e, kare akenei kotou i tivata i te akono, kare ra iaku anake i noo ki o kotou na, kua maata ra iaku i takake io nei, e rave akaoti ua i to kotou uaorai ora ma te mataku e te rutetetete.

13 Ko te Atua oki tei angaanga ki roto ia kotou, i te inangaro e te rave, mei tana i anoano ra.

14 E rave i te au mea ravarai ma te urutoe kore, e te taumāro kore:

15 Kia riro kotou ei aronga apa kore, e te kino kore, ei tamariki na te Atua, kare e akakino anga, i rotopu i te uki piko e te māro: kia kakā kotou i rotopu ia ratou mei te rama i teianei ao,

16 I te tāpu akakite anga i te tuatua ora; ei rekareka anga naku i te rā o te Mesia ra, ko au kare i oro puapinga kore ua, kare oki i angaanga puapinga kore ua.

17 E kia maringi atu toku toto ki rungao i te atinga apai akakiteia ra o to kotou akarongo, e rekareka ïa reira.

18 E na reira kotou i te rekareka, kotou e ko au katoa i te rekareka anga.

19 Te irinaki nei au i te Atu ra ia Iesu, e kia roa poto ake, e tono atu ei au ia Timoteo kia kotou na, kia mareka au kia kite au i te au tuatua ia kotou na.

20 Kare oki oku e tangata mei iaia nei te tu i te ngakau, i te akono tikai i ta kotou na;

21 Te kimi nei oki te tangata ravarai i ta ratou uaorai, kare i ta Iesu Mesia.

22 Kua kite ra kotou iaia, e mei ta te tamaiti akono anga i te metua ra, ko tana ïa akono anga iaku i te angaanga i te evangelia nei.

23 Koia taku e manako nei e, e unga atu iaia kia kotou na, kia roa poto ake, kia kite ake ana ra au i te tuatua iaku uaorai.

24 Te irinaki nei au i te Atu ra, e ko au uaorai te ka aere katoa atu, kare e roaia.

25 I manako ra au e, e mea tika kia tono i taku taeake nei ia Epaperodito kia kotou, e oa rave angaanga noku, e e taeake toa oki; e karere ra na kotou, i tei matuapuru mai iaku nei i toku nei ngere anga.

26 Anoano maata tona ia kotou, e te aue maata oki, i te mea i tuatuaia ki o kotou na e, kua mate aia i te maki.

27 I mate tika rai oki aia i te maki, me mate takiri rava; i aroa maira te Atua iaia; kare ra iaia anake, iaku katoa nei, kia kore e papatini toku aue.

28 I tono vave atu ei au iaia, kia rekareka kotou, i te kite akaou anga mai iaia, e kia iti oki toku aue.

29 E tenana, ka oo mai kotou iaia i te Atu nei ma te rekareka maata; e mei iaia ra te tu, kia manako meitakiia e kotou.

30 No te mea i vaitata aia i te mate i te angaanga a te Mesia nei, kare oki i akono i tona uaorai ora, kia akarava aia i to kotou takinga-meitaki iaku nei.