Te Au Akava

7 KUA tu akerā Ierubaala, koia Gideona, e te tangata ravarai i vaitata iaia ra, i te popongi akirata, e kua patia iora i te puakapa i vaitata i te ruavai o Haroda; tei te pae i apatokerau iaia te nuku Midiana i te pae maunga ra ko More i te o ra.

2 Kua tuatua mairā Iehova kia Gideona, E maata rava tenana au tangata ia koe na, kia oronga au i to Midiana i to ratou rima, ko te nengonengo aea Iseraela ki mua iaku, ko te tuatua aea e, I ora au i toku uaorai rima. 3 E tenana, teia taku tuatua, e tutu atu kia akarongo mai te au tangata ra, e karanga atu, Ko tei mataku ra, ko tei ngarangara ra, ka oki aia ka aere i tenana, mei te maunga atu nei ko Gileada. Kua oki atura e rua ïa ngauru e rua ara i te tausani no roto i taua aronga ra, toe iora okotai ngauru i te tausani.

4 Kua tuatua mairā Iehova kia Gideona, E maata rava rai tenana au tangata: e arataki mai koe ia ratou ki te pae vai nei, e naku e timata ia ratou i reira, kia kite koe: e taku e karanga atu kia koe e, E aere katoa teia, e aere katoa ïa te reira; e taku e karanga atu kia koe e, Auraka teia e tae katoa, auraka te reira e tae.

5 Kua arataki atura aia i te au tangata ki raro ki te vai ra, kua tuatua mairā Iehova kia Gideona, Ko te tangata katoa e miti ua i te vai ki tona arero ra, mei te puakaaoa e miti ra, e akataka ke koe i te reira; e te au tangata ravarai e tuku i te turi ki raro ka inu ei.

6 E taua aronga i miti ua ra tei āū ua ra te vai ki te rima ka topiri ei ki te vaa, e toru ïa anere, kareka tetai pae katoa o taua aronga tangata ra, kua tuku ïa nga turi ki raro inu ei i taua vai ra. 7 Kua tuatua mairā Iehova kia Gideona, Ka akaora au ia kotou i te au tangata e toru anere i miti ua i te vai ra, e e tuku oki au i to Midiana ki toou rima: e tetai papaki tangata ravarai, ka tuku ïa kia aere ua ana ratou ki tona ngai, ki tona ngai. 8 Kua rave iora te au tangata i te kai i to ratou rima, e to ratou au pu; taua aronga tangata e toru anere anake ra tana i tāpu ra: tuku atura ra i tetai papaki Iseraela katoa kia aere ua ana te tangata katoa ki to ratou au puakapa ra. Tei raro iaia te nuku Midiana, tei te o. 9 Kua tuatua mairā Iehova kiaia i taua po ra, Ka tu, ka aere koe ki taua puakapa ra: kua orongaia ïa e au ki to rima. 10 E te mataku ra koe kia aere ki raro ma te tangata katoa, e aere ua ko koe ra, e to tavini ra ko Phura, ki taua puakapa ra. 11 E ka akarongo koe i ta ratou tuatua; e muri ake ka maroiroi ïa to rima kia aere ma te tangata katoa ki taua puakapa ra. Aere atura aia ki raro i reira, raua ko tona tavini ra ko Phura, ki te pae puakapa o te au tangata tamaki, ki te pae o taua puakapa ra. 12 Te tarava ua ra to Midiana e to Amaleka e to te itinga o te rā katoa i taua o ra, mei te tāpaki ra te maata; e ta ratou au kamela kare e ope kia tatau, mei te one taatai ra te maata.

13 E tae aturā Gideona i reira, e i na, te akakite ra tetai tangata ki tetai i tana rikamoe, te tuatua ra, I na, e moe taku, e i na, kua taka mai tetai areto kerite ki roto i te nuku Midiana nei, aere ua maira ki tetai puakapa, kua pa iora, e topa iora ki raro, kua tatipoki akera, e tarava ua iora taua puakapa ra ki raro i te one. 14 Kua tuatua akera tetai, na ko iora, Ko te koke te reira a Gideona, a te tamaiti a Ioasa ra, e tangata Iseraela; kua oronga te Atua i to Midiana, e te nuku katoa nei, ki tona rima.

15 E akarongo akerā Gideona i taua moe ra i te akakite angaia, e te arite anga, kua akamori aia i te Atua, e kua oki maira ki te nuku o Iseraela, kua tuatua maira, Ka tu; kua tuku mai oki a Iehova i te nuku Midiana ki to kotou rima. 16 Kua akataka iora aia i te au tangata e toru anere ra, kia toru takanava, kua tuku iora i te pu ki te rima o te tangata katoa e pini ua ake, e te kapu, e te lamepa ki roto i taua au kapu ra.

17 E kua karanga atura aia kia ratou, E akara mai iaku, ka pera katoaʼi; e i na, kia tae au ki te pae o taua puakapa ra, mei taku e rave ra, e pera katoa kotou.

18 E kia akatangi au e toku takanava katoa ra i te pu ra, e akatangi katoa kotou i te pu e pini ua ake taua puakapa katoa ra, ka karanga atu ei e, Ko te koke a Iehova, e ta Gideona. 19 Kua tae aturā Gideona e te au tangata okotai anere iaia ra, ki te pae o taua puakapa ra, i te araanga i rotopu; kua tuku ouia iora te au tiaki e ratou: kua akatangi iora ratou i te au pu, e kua akangaangaa iora i te au kapu i to ratou au rima.

20 E kua akatangi nga takanava ravarai e toru i te au pu, e kua akangaangaa i te au kapu, e kua mou iora i te au lamepa i to ratou rima kaui, e na to ratou rima katau i mou i te au pu ei akatangi anga; e kua kapiki atura ratou, Ko te koke a Iehova, e ta Gideona. 21 Kua tu ua iora ratou ravarai, i tona ngai i tona ngai, e pini ua ake taua puakapa ra. Rapu ua iora taua nuku katoa ra; e kua aue ua iora, e ati ua atura.

22 Kua akatangi iora oki ratou i te pu e toru anere ra, e kua akaariu a Iehova i te koke a te tangata ravarai ki runga ia ratou uaorai, e pini ua ake taua nuku katoa ra; e oro atura taua nuku ra ki Bete-sita i Zerera, e tae atura oki ki te pae i Abela-mehola i vaitata i Tabata. 23 Kua akaputuputuia iora to Iseraela no ko ia Naphatali, e no ko ia Asera, e no ko ia Manase katoa ra, e kua arumaki atura i to Midiana.

24 Kua unga aturā Gideona i te karere e pini ua ake te maunga ra ko Epheraima, e karanga atu e, E aere mai, ka tamaki i to Midiana, kia rauka ia kotou te vai ki mua ia ratou, e tae ua atu ki Betebara, koia oki i Ioridana. 25 Kua akaputuputu anake iora to Epheraima katoa ra, kua rauka iora nga vai ra, ko Bete-bara e Ioridana. 26 E kua rauka iora ia ratou nga ariki Midiana toko rua, ko Oreba e ko Zeeba; e kua ta iora ratou ia Oreba ki runga i te mato i Oreba, e kua ta ratou ia Zeeba i te taomianga vine i Zeeba ra; e kua arumaki atura i to Midiana, e kua apai maira i nga mimiti o Oreba e Zeeba kia Gideona ra i tetai pae Ioridana ra.