Te Au Akava

6 KUA rave iora te tamariki a Iseraela i te kino ki mua i te aroaro o Iehova ra, e kua tuku aturā Iehova ia ratou ki te rima o Midiana ka itu akera mataiti.

2 E ririnui maira te rima o Midiana ia Iseraela; e no to Midiana ra, kua ko iora te tamariki na Iseraela i te pipini anga no ratou, e te au ana, e te au punanga etaeta e vai ki runga i te au maunga ra. 3 E kua tanu iora te ngati Iseraela i te kai, kua aere mai to Midiana i reira, e to Amaleka, e to te itinga o te rā ra, kua aere mai oki ratou e tamaki ia ratou; 4 E kua patia ratou i te puakapa i vaitatao ia ratou, e kua akapou takiri rava i te kai o te enua, e tae ua atura ïa ki Gaza, kare rava e kai i vaooia na Iseraela, kare rava e mamoe, kare e puakatoro, kare e asini.

5 I aere mai oki ratou ki runga ma ta ratou au puaka, e ta ratou au puakapa, mei te tāpaki ratou i te maata i te aere anga mai; kare oki ratou e ta ratou au kamela e ope kia tatau ra: i aere mai ratou ki runga i te enua e tairipoti rava.

6 Putaua maata rava atura to Iseraela i to Midiana ra, kua kapiki ra te tamariki a Iseraela kia Iehova. 7 E tei te kapiki anga te tamariki a Iseraela kia Iehova ra, i to Midiana ra,

8 Kua tono mairā Iehova i tetai peroveta ki te tamariki a Iseraela ra, ko tei tuatua mai kia ratou e, Te na ko maira te Atua o Iseraela ra ko Iehova, I arataki mai au ia kotou mei Aiphiti maira, e kua aere mai kotou iaku ki vao mai i te ngutuare i ao ei ra;

9 E kua akaora au ia kotou i te rima o to Aiphiti, e te rima o te aronga ravarai i takinga-kino mai ia kotou; e kua tuaru au ia ratou ki mua ia kotou, e kua oronga au i to ratou enua no kotou;

10 E kua karanga atu au kia kotou, Ko au to kotou Atua ra ko Iehova; auraka kotou e mataku i te au atua o te ngati Amori, no ratou te enua ta kotou e noo na: kare akenei ra kotou i akamako mai i toku reo. 11 Kua aere maira te Angela a Iehova, e kua noo iora ki raro ake i te rakau i Ophera, i o Ioasa ngati Abiezera: te pāpā ra tana tamaiti a Gideona i te sitona i te taomianga vine ra, kia ngaro i to Midiana ra.

12 Kua mama maira te Angela a Iehova kiaia, e kua tuatua maira kiaia, Tei vaitatao a Iehova ia koe, e tenana tangata ririnui e te maroiroi ra. 13 Kua karanga aturā Gideona kiaia, E taku atu e, tei vaitatā Iehova ia matou ra, eaa matou i rokoia mai ei i teianei au mea katoa? teiea oki te au ravenga taka ke katoa nana ta to matou ai metua i akakite mai kia matou nei, i te na ko anga e, Kare ainei a Iehova i arataki mai ia tatou mei Aiphiti mai? i teianei ra, kua akaruke mai a Iehova ia matou, e kua tuku ia matou ki te rima o Midiana.

14 Kua akara mairā Iehova iaia, e kua tuatua maira, Ka aere ma tenana maroiroi noou na, e naau e akaora ia Iseraela i te rima o Midiana: kare aina naku koe i tono?

15 Kua karanga atura aia kiaia, E taku Atu e, e akapeea e oraʼi Iseraela iaku? I na, e kopu-tangata akaaka toku ia Manase nei, e ko au tei iti rava i te kopu-tangata o toku metua. 16 Kua tuatua maira Iehova kiaia, Ei vaitata tikai au ia koe, e naau e ta i to Midiana, mei te mea e tangata okotai nei.

17 Kua karanga atura aia kiaia, Kua kite aroaia mai au e koe, i teianei ra e akakite mai koe i tetai akairo kia kite au e, koai koe e tuatua mai iaku nei. 18 Auraka koe e aere ke, e kia oki mai au kia koe nei, kia apai mai au i taku nei atinga kai, e tuku ki mua i to aroaro na. Kua tuatua maira aia, Ka noo rai au e kia oki akaou mai koe. 19 Kua aere iorā Gideona ki roto, kua tunu iora i tetai punua puakanio, e tetai epha faraoa ei areto akaopue kore; kua tuku iora i te puaka ki roto i te kete, e kua tuku i te vai puaka ki roto i tetai kapu, kua apai atura kiaia i raro ake i taua rakau ra, kua tuku atura kiaia. 20 Kua tuatua maira te Angela a te Atua kiaia, Ka rave mai i te puaka e nga areto akaopue kore nei, e tuku ki runga i teianei mato, ka riringi ei i te vai puaka. E kua pera oki aia.

21 Kua akatika iora te Angela a Iehova i te rakau i tona rima, kua akatukia maira i te kauru rakau i taua puaka ra e nga areto akapue kore ra; e kua puroro maira te ai no roto i taua mato ra, pou rava akera te puaka e nga areto akopue kore ra: ngaro atura taua Angela a Iehova ra, kare atura aia i kite. 22 Kite akerā Gideona e, ko te Angela ïa na Iehova, e kua tuatua akerā Gideona, Aue, e te Atu, e Iehova e! ko au i kite i te Angela a Iehova, toku mata e tona mata.

23 Kua tuatua mairā Iehova kiaia, Kia ora koe; auraka e mataku; kare koe e mate.

24 Kua patu iorā Gideona i tetai atarau na Iehova i reira, tapa iora i te reira, Ko Iehova-saloma, e te vai ua ra i teianei rā i Ophera i o te ngati Abiezera ra. 25 Taua po ra oki ta Iehova tuatua anga mai kiaia e, Ka rave koe i te puakatoro ou, tetai oki o te puakatoro mataiti itu, a to metua ra, e akangaangaa i te atarau a Baala ki raro, te atarau a to metua ra, ka tipu ei i te Asetoreta i vaitatao: 26 Ka patu ei koe i tetai atarau na to Atua ra na Iehova ki rungao i teianei mato, mei tei akonoia ra, ka rave ei i te rua o te puakatoro ra, e apai mai ei atinga karakaratio, e te rakau o te vaorakau taau e tipu ra ei vaie. 27 Kua iki iorā Gideona i nga tangata tino ngauru no roto i te au tavini nona ra, kua rave iora aia i ta Iehova i tuatua mai kiaia ra; e no te mea te mataku ra aia i te ngutuare o tona metua, e te au tangata o te oire, kare akera e tika kia rave i te ao, kua rave atura i te po.

28 E kia itirere akera te au tangata o te oire i te popongi akirata ra, i na, kua ngaangaa te atarau a Baala tei raro, e kua tipuia te Asetoreta i vaitatao ra, e kua apaiia te rua o te puaka-toro ki rungao i te atarau i akatuia ra.

29 Kua tuatua iora ratou ratou uaorai, Naai ra teia i rave? Kua kimi iora ratou, kua ui aere, kua tuatua akera etai, Na Gideona te tamaiti a Ioasa teia i rave.

30 Kua tuatua maira te au tangata o te oire kia Ioasa, O mai ana i to tamaiti kia mate aia, no te mea kua akangaangaa aia i te atarau a Baala; e kua tipu aia i te Asetoreta i vaitatao ra.

31 Kua karanga aturā Ioasa ki taua aronga katoa i tu mai ki mua iaia ra, Na kotou e akatika ia Baala? Ka akaora kotou iaia? ko te akatika iaia ka mate rai aia kia ao: e atua aia ra, nana rai e akatika iaia uaorai, i te mea, kua akangaangaaia tana atarau.

32 Tapaia iora aia ia Ierubaala i taua rā ra, tona metua i karanga ra e, Na Baala e akatika iaia uaorai i taua tangata ra, koia i akangaangaa i tana atarau. 33 Kua akaputuputu iora to Midiana ravarai, e to Amaleka katoa, e to te itinga o te rā katoa ra i reira, e kua aere iora i tetai pae, e kua patia iora i te puakapa i te o ra ko Iezereela.

34 Kua uru maira te Vaerua o Iehova ia Gideona, e kua akatangi iora aia i te pu; e kua akaputuputu maira to Abiezera kiaia ra.

35 Kua tono atura aia i te au karere i o Manase katoa ra, e kua akaputuputu katoa mai ratou kiaia ra: e kua tono aia i te karere ki o Asera, e ki o Zebuluna, e ki o Naphatali; e kua aere maira ratou e aravei ia ratou ra.

36 Kua karanga aturā Gideona ki te Atua, E akaora tikai koe ia Iseraela i toku nei rima, mei taau oki i tuatua maira,

37 I na, ka tuku au i te uru mamoe ki runga i te ngai pāpā sitona nei, e kia akara au e, e au to runga i te uru anake ra, e te marō ua ra te one e pini ua ake, ka kite ïa au i reira e, ka akaora koe ia Iseraela i toku nei rima, mei taau oki i tuatua maira 38 E koia tika atura oki; e ao akera oki, kua tu akera aia ki runga i te popongi akirata, kua kukumu iora i taua uru ra, kua tatau iora e ki rava akera tetai kapu i te vai no roto i taua uru ra.

39 Kua karanga aturā Gideona ki te Atua, Auraka e maata mai to riri iaku nei, taku ïa tuatua kia koe, okotai aku tuatua anga toe; okotai aku timata anga toe i te uru nei: kia marō te uru, e ei runga i te one te au e pini ua ake.

40 Kua pera oki te Atua i taua po ra, ko te uru anake ra oki tei marō; e e au anake to runga i te one e pini ua ake.