Salamo

116 E INANGARO toku ia Iehova, koia i akarongo mai i toku reo, e taku i pati atu. 2 No te mea kua ariu mai tona taringa kiaku nei, e kapiki rai au iaia e mutu ua atu toku nei aʼo. 3 I akapiniia au e te au taura o te mate; i rokoia au e te au tumatetenga o ade: i rokoia au e te tumatetenga e te mamae. 4 Kua kapiki iora au i te ingoa o Iehova; E Iehova e, te pati atu nei au kia koe, e akaora koe i toku vaerua. 5 Ko te takinga-meitaki e te tuatua-tika ta Iehova; e aroa oki to to tatou Atua. 6 E tiaki mai a Iehova i te aronga varevare: i tuku akaakaia au, e kua akaora aia iaku. 7 E oki, e taku vaerua, ki toou ra akaangaroi anga, kua takinga-meitaki mai oki a Iehova ia koe. 8 Kua akaora koe i toku vaerua i te mate, toku mata i te roi-mata, e toku vaevae kia kore e inga. 9 E aaere rai au ki mua ia Iehova, i te enua o te aronga e ora nei. 10 Kua akarongo au, tuatua ua rai au e, Kua maata roa io nei toku mate: 11 Kua tuatua au i toku rapurapu anga ra, E pikikaa anake to te tangata nei. 12 Eaa ra taku e apai atu na Iehova, i te au takinga-meitaki katoa nona iaku nei? 13 Ko te kapu ora taku ïa e apai ki runga, ka kapiki ei i te ingoa o Iehova. 14 Ka akatupu au i taku i tia ia Iehova, i teianei ki mua i te aroaro o tona katoa ra au tangata. 15 E mea apinga maata i mua i te aroaro o Iehova te mate o tona ra aronga tapu. 16 Koia tika rai, e Iehova, no te mea ko au to tavini, to tavini, te tamaiti a to tavini vaine, kua matara ia koe toku nei au tapeka. 17 Ka apai au i te atinga akameitaki kia koe, ka kapiki ei au i te ingoa o Iehova. 18 Ka akatupu au i taku i tia ia Iehova, i teianei ki mua i te aroaro o tona katoa ra au tangata, 19 I roto i te au paepae i te are o Iehova ra; i rotopu ia koe, e Ierusalema e. Alelu Ia.