Iobu

4 KUA karanga atura te ngati Temana ra ko Eliphaza, na ko atura,

2 E kinokino ainei koe, kia karangaranga ua atu matou kia koe? E tika ra iaai kia kore e tuatua?

3 I na, e manganui tei akoia e koe, e kua akamaroiroiia e koe te rima ngavarivari.

4 Kua turuia tei turori ua ra i taau ra tuatua, e te turi akamārū ua, kua ketaketa ia koe.

5 I tenana ra, kua rokoia koe e taua mea ra, e kua potopoto toou aʼo; kua akatukia mai ia koe, e kua tumatetenga koe.

6 Kare ainei to mataku i te Atua, toou irinakianga, e toou manakonako anga i te apa kore anga o toou ra au aerenga?

7 Ka akamaaraara ana, ko taku ïa tuatua kia koe, Koai ïa tangata ara kore i mate? Kiea te aronga tuatua-tika i te tipu ke angaia?

8 Mei taku rai oki i kite, ko tei arote i te kino, e tei ruru i te ara, ko ta ratou rai ïa e kokoti.

9 E mate ratou i te matangi a te Atua, e i te aʼo o tona putaiu e pou ei ratou.

10 Te ngunguru o te liona, e te reo o te liona taae e te nio o te au liona ou, kua akaatiia ïa.

11 Te mate nei te liona ririnui i te kai kore, e te au punua a te liona tinana, kua pueurikiriki keia ïa.

12 E manga tuatua tei apai poiriia mai kiaku nei, e kite atura taku taringa i tetai ngai mea ngiti o te reira.

13 I te au manako no te orama i te po ra, ka rokoia mai ei te tangata nei e te moe tinainai,

14 Rokoia iora au e te mataku, e te ruketekete, e taku au ivi katoa ra tei ru ua.

15 Kua na mua iaku tetai vaerua i te aere; te maranga ua ra te ii iaku:

16 Kua tu ua iora, kare ra au i kite i tona tu: e turuma ra tei mua i taku mata, kare ua e mu, e te rongo ra au i tetai reo:

17 E rai ainei ta te tangata nei tuatua-tika i ta te Atua? e rai ainei to te tangata nei viivii kore i to Tei anga iaia ra?

18 I na, kare tona au tavini i irinakiia e ia; e te karanga nei aia e auouo to tana au angela:

19 Ka tanga atu ei i te aronga e noo i te are one nei, e to ratou tumu, ko te one-pueu ïa, tei paruparu ki mua i te aroaro o te neu?

20 Te pou ua nei ratou mei te popongi mai e tae ua atu ki te aiai: te mate takiri nei rai ratou ma te akono koreia atu.

21 Kare ainei e ngaro ua te meitaki i roto ia ratou? te mate nei ratou, e kare rai i rauka te kite.