1 Ariki

18 E MANGANUI akera te rā i topa, kua tae maira te tuatua a Iehova kia Elia, i te toru o te mataiti, na ko maira, E aere, e akakite ia koe uaorai kia Ahaba; e naku e apai atu i te ua ki runga i te enua nei.

2 Kua aere iorā Elia e akakite iaia uaorai kia Ahaba. Te maata ra te onge i Samaria ra.

3 Kua karanga aturā Ahaba kia Obadia, ko te akaaere ïa o tona ngutuare, (Te maata ra to Obadia ra mataku ia Iehova:

4 Ka ta ai oki a Iezebela i te au peroveta a Iehova ra, kua rave akerā Obadia i tetai anere peroveta, kua uuna, taki rima ngauru i roto i te ana okotai, e kua angai ki te areto e te vai.)

5 Kua tuatua mairā Ahaba kia Obadia, E aere koe na runga i te enua katoa nei, e te au punavai ravarai ra, e te au kauvai katoa; peneiake ko te kitea atu te ngangaere rikiriki, kia ora te au oroenua, e te au mule, ko te ope takiri aea te au puaka i te mate.

6 Kua kokoti iora raua i te enua, ka aere ei na rungao; riro aturā Ahaba na tona ara, koia anake ra; riro aturā Obadia na tona ara, koia anake ra.

7 Te aere ua rā Obadia, e i na, kua aravei akerā Elia iaia, e kua kite akera aia iaia, kua tipapa iora aia i raro te mata, kua tuatua akera, Ko toku pu ra ainei koe ko Elia?

8 Kua tuatua maira aia kiaia, Ko au: e aere, e karanga atu ki toou pu, I na, tera ake a Elia.

9 Kua karanga atura aia, Eaa ra taku nei ara, i tuku ei koe i to tavini ki roto i te rima o Ahaba kia mate au?

10 Te ora ra to Atua ko Iehova, kare rava e enua, kare e basileia i toe, i kore ei i tonokia te tangata e taku pu, i te kimi ia koe: e kia tuatua mai ratou e, Kare ua, kua akataputou atu aia i taua enua ra, e taua basileia ra, e kare koe i kitea.

11 E tenana, te tuatua maira koe, E aere, e akakite i toou pu. I na, tera ake a Elia.

12 Tei te riro anga au ra, ka riro te Vaerua o Iehova i te apai ke ia koe, e kare e kitea atu e au; e kia aere au e kia akakite kia Ahaba, e kare aia e kite ia koe, ka riro aia i te ta mai iaku: e teianei, i mataku ua ana to tavini ra ko au ia Iehova mei toku ou anga mairai.

13 Kare koe i akakiteia mai e taku pu, i taku nei ravenga ka ta ai a Iezebela i te au peroveta a Iehova, e kua uuna au i tetai anere tangata i te au peroveta no Iehova, e rima ngauru i roto i te ana okotai, e kua angai au ia ratou ki te areto e te vai?

14 E tenana, te tuatua mai na koe e, E aere, e akakite ki toou pu, I na, tera ake a Elia; ka riro oki aia i te ta mai iaku.

15 Kua tuatua mairā Elia, Te ora rā Iehova Sabaota, taku e tu ua i mua i te tona aroaro, ka akakite tika atu au iaku uaorai kiaia i teianei rā.

16 Aere aturā Obadia e aravei ia Ahaba, e kua akakite kiaia: e kua aere mairā Ahaba e aravei ia Elia.

17 E kia akarā Ahaba ia Elia, kua tuatua mairā Ahaba kiaia, Ko koe ainei tei taeko ia Iseraela nei?

18 Kua karanga atura aia, Kare au tei taeko ia Iseraela; ko koe ra, e te ngutuare o to metua, ko kotou i akaruke i te au akauenga a Iehova, e kua aru koe i te au Baala.

19 E tenana, e tono i te karere e akaputuputu ia Iseraela ravarai, e aere mai kiaku nei ki te maunga nei ki Karamela, e te au peroveta o Baala e a katoa anere e rima ngauru, e te au peroveta o Asetoreta e a anere, ko tei kaikai i te kaingakai a Iezebela.

20 Kua tono akerā Ahaba i te karere ki te au tamariki ravarai o Iseraela, e kua akaputuputu mai i te au peroveta ki te maunga ra ki Karamela.

21 Kua aere mairā Elia ki te au tangata katoa ra, e kua tuatua maira, Mei te aa te roa o tenana ekoko rua anga? ko Iehova te Atua ra, e aru iaia: ko Baala ra, e aru iaia. Kare akerai te tangata i ki mai kiaia.

22 Kua tuatua mairā Elia ki te au tangata, Ko au, ko au anake nei tei toe i te au peroveta a Iehova; kareka te au peroveta a Baala, e a ïa anere e rima ngauru.

23 O mai ana e rua puakatoro na matou, ka rave ei ratou i tetai puakatoro na ratou uaorai, ka tipupu ei, ka tuku ei ki runga i te vaie, auraka ra ei ai e tukuia i raro ake: e naku rai e rave i tetai puakatoro, ka tuku ei ki runga i te vaie, auraka ei ai i raro ake:

24 Ka tautopaʼi kotou i te ingoa o to kotou au atua, ka tautopa oki au i te ingoa rai o Iehova: e te atua e tuatua mai i te apai anga mai i te ai, koia te Atua. Kua tuatua maira te au tangata ravarai, na ko maira, E tuatua meitaki taua tuatua nei.

25 Kua tuatua mairā Elia ki taua au peroveta o Baala ra, E ravā ana kotou i tetai puakatoro na kotou, e akamata na i te rave i te reira; e manganui oki kotou; ka tautopaʼi kotou i te ingoa o to kotou au atua, auraka ra ei ai e tukuia i raro ake.

26 Kua rave iora ratou i taua puakatoro i o maiia na ratou ra, kua akonokono iora, kua tautopa iora i te ingoa o Baala mei te popongi mai e avatea atura, i te kapiki ua anga e, E Baala, e akarongo mai ia matou. Kare rava ra e reo; kare e ki mai. Kua rere aere ratou ki runga i taua atarau i angaia e ratou ra.

27 E avatea akera, kua aviri mairā Elia, kua tuatua maira, E kapiki reo nui atu: e atua oki aia; tei te kimi paa i te manako; e kare ra, tei te angaanga; e kare ra tei te arataa; e kua moe paa aia, e kia akaaraia e tikaʼi.

28 Kua kapiki reo nui atura ratou, e kua kotikoti iora ia ratou uaorai, ta ratou ïa ravenga, ki te matipi, e te ko, e kua î ua maira te toto ki runga ia ratou.

29 E taupeupe akera te rā, kua tamou atura ratou i ta ratou au peu, e tae ua atura ki te apai anga i te atinga aiai ra, e kare e reo, kare e tuatua mai, kare ratou i akonoia mai.

30 Kua tuatua mairā Elia ki te au tangata katoa, E aere mai ana ki ku nei kiaku nei. Kua aere maira te au tangata ravarai i vaitatao kiaia. Kua patu akaou iora aia i te atarau a Iehova i ngaangaa ra.

31 Kua rave iorā Elia i nga toka okotai ngauru ma rua, aite akera ki nga kopu i te tamariki a Iakoba, ta Iehova i tuatua maira, na ko maira e, Ko Iseraela toou ingoa:

32 Kua akatu akera aia i tetai atarau i te ingoa o Iehova i taua au toka ra; kua akaruarua akera aia e pini ua ake taua atarau ra, e o nga āriki ua e rua sea.

33 Kua koroata iora aia i te vaie, kua kotikoti iora taua puakatoro ra, kua tuku akera ki rungao i taua vaie ra, e kua tuatua akera, E akaki ana i nga āriki e a ki te vai, ka riringi ki rungao i te atinga karakaratio, e ki rungao i te vaie ra.

34 E kua tuatua maira aia, E pera akaou kia rua. Kua pera akaou ratou kia rua. Kua tuatua maira aia, E pera akaou kia toru. Kua pera oki ratou kia toru.

35 Kua taʼe aere ua iora taua vai ra, e pini ua ake taua atarau ra: ki rava akera taua rua ra ki te vai.

36 E tae akera ki te apai anga i te atinga aiai ra, kua akavaitata maira te peroveta ra ko Elia, kua karanga atura, E te Atua no Aberahama, no Isaaka, e no Iseraela, e Iehova e, e akakite mai koe i teianei rā, ko koe te Atua i Iseraela nei, e ko au toou tavini, e no te mea kua tuatuaia mai au e koe ra, i rave ei au i taua au mea katoa nei.

37 E akarongo mai iaku, e Iehova, e akarongo mai, kia kite teianei aronga e ko koe te Atua ko Iehova, e e akaariu oki koe i to ratou ngakau.

38 Kua topa maira te ai a Iehova i reira, pou iora te atinga karakaratio, e te rakau, e te toka, e te one, e i mitimitiia ra taua vai i roto i te rua ra.

39 E kite akera te au tangata katoa ra i te reira, kua tipapa iora ki raro te mata: kua tuatua akera, Ko Iehova, koia te Atua; ko Iehova, koia te Atua.

40 Kua tuatua mairā Elia, E opu ana i te au peroveta a Baala; auraka rava tetai kia ora. Kua opu iora ratou ia ratou; kua arataki mairā Elia ia ratou ki te kauvai ra ki Kisona, e kua ta iora ia ratou i reira.

41 Kua tuatua mairā Elia kia Ahaba, E aere, e kaikai, e inu oki: e ua maata teia e aruru mai nei.

42 Aere aturā Ahaba e kaikai e inu oki. Aere aturā Elia ki runga i te take maunga ra i Karamela; kua tipapa iora aia ki raro i te one, kua tuku iora i te mata i rotopu i nga turi,

43 E kua tuatua maira ki tona tavini, E aere ki runga i tenana, e akara tika ki tai. Kua aere iora aia ki runga, e kua akara, e kua karanga atura, Kare ua. Kua tuatua maira aia, E aere e kia itu ua atu i te aerenga.

44 E tae akera ki te itu o te aerenga, kua karanga atura, I na, e tumurangi iti te tupu maira no raro maira i te tai, mei te rima tangata nei te tu. Kua tuatua maira aia, E aere ki runga, e karanga atu kia Ahaba, E akonokono i te kariota naau, e aere ki raro, ko te rokoia aea koe e te ua.

45 E kare akerai i mamia, kua kerekere iora te rangi i te tumurangi e te matangi, ko te ua iora oki e mea maata. Kua akaoro iorā Ahaba e tae atura ki Iezereela.

46 Tei runga maira te rima o Iehova ia Elia; kua tatua iora aia i tona taukupu, kua oro iora na mua ia Ahaba, e tae ua atura ki te tomoanga i roto ia Iezereela.