Maseli

17 E NGARI ake te manga kia mea ngiti marō ma te au, i te are i ki i te au puaka taia ma te karo.

2 Te tavini pakari ra, e tutara ïa ki runga i te tamaiti kanga ra, e tu oki i te tuanga e te au taeake ra.

3 Ko te pani timata to te ario, e te umu to te auro: ko Iehova ra tei timata i te ngakau.

4 E akarongo te tangata rave ara i te vaa pikikaa; e ariu oki te tangata pkikiaa i tona taringa ki te arero kino.

5 Ko tei akavaavaa i te ao ra, kua akakino ïa i Tei anga iaia ra: e ko tei rekareka i te kino ra, kare e karangaia e kare e ara.

6 E korona no te tangata pakari te au utaro; e te kakā o te tamariki ra, ko to ratou ïa metua.

7 Kare te tuatua meitaki e tau i te neneva: ka tanga atu ei te vaa pikikaa ki te ariki ra.

8 Te apinga oronga ua ra, mei te toka meitaki ïa i te mata o tei rave: te au ngai katoa tana i ariu ra, kua meitaki ïa.

9 Ko tei tapoki i te ara ra, kua aruaru kia tauia mai ïa: ko tei akakite ra i te tuatua ra, e taka ke te taunga tumanava iaia.

10 E meitaki to te ako i te tangata pakari ra, i te pāpā i te neneva e kia anere ua atu te tainga.

11 Ko te meameaau anake ra tei kimiia e te tangata kino: e tonokia mai oki te karere manava kino kiaia ra.

12 E ngari ake te tangata kia aravei i te daba i riro tona au punua ra, i te aravei i te neneva ma tona ra neneva.

13 Ko tei tutaki I te meitaki ki te kino ra, kare te kino e taka ke i tona ra are.

14 E tau te akamataanga karo ki te ngaa anga vai ra: e akaruke ra i te karo ra, ka tupu aea te riri.

15 Ko tei akatika i te tangata kino ra, e ko tei akaara i te tangata tuatua-tika ra, e mea viivii katoa raua na Iehova.

16 Eaa te puapinga o te moni ki te rima o te neneva ra? kia rauka ainei te pakari? kare oki tona ngakau e tau i te reira.

17 E aroa mairai te taunga i te au tuatau katoa ra, i anau maira te taeake no te tuatau e tumatetengaʼi ra.

18 Ko te tangata kare e kite ra, e rave ïa i te rima, riro atura ei tutaki no tona ra oa.

19 Ko tei inangaro i te karo ra, kua inangaro ïa i te ara: ko tei akateitei i tona ngutupa, kua kimi ïa i te mate.

20 Te ngakau māro ra, kare te meitaki i kitea e ia: e te arero ketaketa ra, e rokoia ïa e te kino.

21 E neneva tana i anau ra, ko te aue tana e rauka: e te metua o te kanga ra, kare ona rekareka anga.

22 E meitaki to te ngakau rekareka mei te vairakau ra: e marō ra te ivi i te ngakau taitaia.

23 E rave te tangata kino i te apinga no roto i te umauma ra, kia akamingi aia i te aerenga o te tuatua-tau.

24 Tei mua i te aroaro o te tangata kite ra te pakari: kareka te mata o te neneva ra, tei te openga mai ïa o te enua.

25 Te tamaiti neneva ra, e aue anga ïa na te metua tane, e te mamae oki no tei anau mai iaia ra.

26 Kia akautunga atu i te tangata tuatua-tika ra, kare ïa i te mea meitaki; e kare rai e meitaki kia moto atu i te aronga tutara i ta ratou tuatua-tika.

27 Te tangata pakari, kare e rapurapu i te tuatua ra, e te tangata kite ra, e ngakau maru tona.

28 Ko te neneva katoa ra oki, kia muteki ua, e karangaia ïa i te tangata pakari: e tei topiri marie i tona vaa, e karangaia ïa i te tangata kite.