Habakuka

3 E PURE na te peroveta ra na Habakuka, ki runga i te mea tangi akapaapaa ra.

2 I akarongo ana au i te rongo ia koe, e Iehova, mataku iora au; e Iehova e, e akatupu akaou koe i taau angaanga i rotopu i te au mataiti ra; i rotopu i te au mataiti e akakite mai koe: i te riri anga ra, e akamaara koe i te aroa.

3 I aere mai te Atua mei Temana mai; e Tei Tapu ra mei te maunga rai i Parana. Sela. Kua kapi te rangi i tona kakā, kua ki oki te enua i te paapaa iaia.

4 Kua tau tona kakā ki to te mārama, puroro maira te verovero no roto i tona rima: i reira oki tona mana i te uuna angaia.

5 Kua na mua iaia te maki-mate i te aere; e te maki vera tei aru i tona au takainga vaevae.

6 Kua tu iora aia, e kua akangaueue atura i te enua; kua akara aia, e kua akaruketekete atura i te au etene; e te au maunga taito ra, pueurikiriki iora, te au tuaivi vaoo-ngata ra, topa iora ki raro; te au aerenga taito nona.

7 Kua kite au i te au puakapa o Kusana i te tumatetenga anga, e kua ru ua te au paruru o te enua ra o Midiana.

8 I ka ainei to Iehova riri ki te au kauvai? i tupu ainei to riri ki te au kauvai? i otooto ainei to riri ki te tai? Ka akaoro ei koe na runga i te au oroenua, ma to au kariota akaora ra?

9 I vai taka uaia to ana, kia tataki itu te korare, ko te tuatua ïa: Sela. Kua vavaʼi koe i te au kauvai i te enua nei.

10 Kua akara te au maunga ia koe, e kua ngaueue; te maringi anga o te vai puke ra, riro ke atura ïa; kua tuku maira te moana i tona reo, kua apai i ona rima ki runga roa.

11 Kua noo ua te rā e te mārama ki roto i to raua ngai i te kakā o to au kakao i rere ra, i te kakā kanapanapa o taau korare.

12 Ma te riri akaoko i aere ei koe na roto i te enua, ma te riri i takatakai ei koe i te au etene.

13 Kua aere koe ei ora no toou ra au tangata, ei ora no to aronga akatainuia ra, kua paru ia koe te pu o te are o te aronga kino, kua eeu koe i te tumu e tae rava atu ki te kaki ra. Sela.

14 Kua koia e koe tei maata i o tona ra au rangatira ra ki te rakau nana uaorai, tei tu a uriia ra i te aere anga mai ei akapueurikiriki iaku ra, i rekareka ratou mei te mea e kia pou ngaro ua ia ratou te aronga ao.

15 Kua na raro koe i te tai ma to au oroenua ra, na roto i te auau anga o te moana maata ra.

16 Akarongo akera au, ngarepurepu atura toku manava, i te rongo ra, kua ru ua oku ngutu; kua o maira te pe ki roto i toku au ivi, kua ruketekete iora i toku ra ngai: e akaangaroi ra au i taua rā tumatetenga ra, kia kake mai te au tangata e tamaki mai ia matou.

17 Kore ua atu rai te pua anga o te suke; kore ua atu te manga i runga i te au vine, kore ua atu rai te olive i te ua mai, e kore ua atu e kai ki runga i te au kainga; pou ua atu rai te au anana i roto i te au koro ra, e kore ua atu te au puakatoro i roto i te vairanga ra:

18 E rekareka ra au ia Iehova e rere ua au i te rekareka i te Atua o toku nei ora.

19 Ko te Atu ra ko Iehova, ko toku ïa maroiroi; nana e akariro i toku vaevae mei to te aili, e ka aaere au iaia na runga i taku au ngai teitei. Na te tumu imene, ma taku au peu akatangi ra.