Ezekiela

38 KUA tae maira oki te tuatua a Iehova kiaku nei, na ko maira,

2 E te tamaiti a te tangata na, e anga i to mata kia Goga i te enua o Magoga, ki te ariki o Rosa, Meseka, e Tubala, ka totou atu ei kiaia,

3 Ka karanga atu ei, Te na ko maira te Atu ra ko Iehova; I na, kare au e tau ia koe, e Goga e, e te ariki o Rosa, Meseka, e Tubala ra.

4 E e akaoki au ia koe ki muri, e momono au i te matau ki roto i to tanga na; ka arataki mai ei ia koe ki vao; e toou nuku katoatoa ra, i te au oroenua, ma te au tangata akaoro ra, ratou ravarai ma te kakau tu ke tu ke, e urupu maata ma te tapoki e te paruru, ma te koke anake te mouranga:

5 Ko Peresia, Kusa, e Phuta, ma ratou katoa ra; ma te paruru anake e te pare-kotaa:

6 Ko Gomera, e tona ra au motuanga ravarai; te ngutuare o Togarama no te pae i apatokerau ra, e tona ra au motuanga ravarai: ko koe ma te au tangata maata.

7 Ka akateateamamao, e akateateamamao ia koe uaorai, ko koe, e toou tini ravarai i putuputu mai kia koe ra, e ka riro koe ei tiaki no ratou.

8 Kia topa te au rā e manganui e atoroia mai ei koe: i te au mataiti openga ka aere mai ei koe ki roto i te enua i akaokiia mai mei te koke maira, i akaputuputuia mai mei roto i te au tangata e manganui, ki runga i te au maunga o Iseraela i vai tanea ua ana: kua akaokiia maira te reira mei roto mai i te au enua ra, e ka noo au ua ratou e ope rava ake.

9 Kua kake a uriia maira koe ki runga, ka riro koe mei te tumurangi e ngaro ei te enua ra, ko koe, e toou ra au motuanga ravarai, e te au tangata e manganui i te kapiti katoa anga kia koe ra.

10 Te na ko maira te Atu ra ko Iehova, e i taua rā ra e riro i te tupu tetai aronga mea ki roto i to ngakau, e riro oki koe i te manako i te mea kino.

11 E ka riro koe i te tuatua e, E aere au ki runga ki te enua vila koro koreia ra; e aere au ki te aronga noo ponuiaau ua ra, ko tei noo ma te ora, ko tei noo anakeia ma te patu kore, kare, o ratou tea, kare oki e pa,

12 Kia āru i ārunga, e kia noni i te nonianga, e kia ariu i to rima ra ki runga i te au ngai tanea kia tangataia ra, e ki runga i te au tangata i akaputuputuia mai mei roto i te au enua ra, e puaka ta ratou ma te apinga, e kua noo ki runga i te ngai teitei i te enua ra.

13 Ko Seba, e ko Dedana, e te aronga oko no Taresisa, e to reira aronga mana katoa ra, te ka tuatua mai ïa kia koe, I aere mai koe ei āru apinga? kua akaputuputu mai ainei koe i to au tangata ei noni apinga? ei apai i te ario e te auro, ei taki puaka, e ei apai apinga, e ei āru i te ārunga maata?

14 E tenana, e te tamaiti a te tangata na, ka totou, e karanga atu kia Goga, Te na ko maira te Atu ra ko Iehova; I taua rā ra kia noo toku au tangata ra ko Iseraela ma te mataku kore, kare ainei koe i kite?

15 E ka aere mai koe mei toou ra ngai, mei te pae i apatokerau, ko koe, e te au tangata e manganui ma koe katoa ra, ma te akaoro anake na runga i te oroenua, e urupu maata oki, e nuku ririnui:

16 E ka aere koe ki runga ki toku ra au tangata ia Iseraela, mei te tumurangi e ngaro ei te enua ra; ei te au rā openga e tupu ei, e naku koe e arataki ki runga i toku enua, kia kite te au etene iaku, kia akatapuia mai au ia koe ra, e Goga, ki mua i to ratou mata.

17 Te na ko maira te Atu ra ko Iehova, Kare ainei ko koe tei tuatuaia e au i taito ra, i toku ra au tavini i te au peroveta i Iseraela nei, ko tei totou i taua tuatau i muatangana roa ra, e e arataki mai au ia koe ki runga ia ratou?

18 E kia tae ki taua tuatau ra, i te rā e aere ei a Goga ki runga i te enua o Iseraela, te tuatua maira te Atu ra ko Iehova, e kake katoa mai ïa toku riri otooto ki toku nei mata.

19 E no toku vareae, e no te ai o toku riri, i tuatuaʼi au, Koia tika rai, e ngaueue maata tei te enua ra ia Iseraela kia tae ki taua rā ra;

20 E ngaueue oki te au ika o te tai, e te au manu o te reva, e te au puaka o te enua, e te au mea katoa e totoro aere i runga i te enua nei, e te au tangata katoa ki runga i te enua nei, ki mua i toku aroaro; e uriia te au maunga ki raro, e te au ngai teitei, e topa ïa, e te au patu ravarai, e ngaoro ïa ki raro i te one.

21 E naku e kapiki ki te koke ei rave iaia, e pini ua ake toku au maunga katoa nei, te tuatua maira te Atu ra ko Iehova: te koke a tera tangata tera tangata, ei rave ïa i tona uaorai taeake.

22 E taumāro atu au iaia ra ma te maki-mate e te toto; e naku e akatopa i te ua a vai puke ra, e te ua toka mamaata, te ai oki, e te teio, ki runga iaia, e ki runga i te au motuanga nona ra, e ki runga i te au tangata e manganui tei iaia ra.

23 E akamaata oki au iaku uaorai, e e akatapu iaku uaorai; e kiteia oki au e te mata o te au enua e manganui; e kite oki ratou e ko Iehova au.