Levitiku

17 KUA tuatua mairā Iehova kia Mose, na ko maira,

2 E karanga atu koe kia Aarona, e nga tamariki nana ra, e ki te au tamariki ravarai na Iseraela, e na ko atu koe kia ratou; Teia te tuatua ta Iehova i akaue maira, na ko maira,

3 To te ngutuare o Iseraela, kia ta i te puakatoro, e te mamoe, e te puakanio i roto i te puakapa, e kia ta oki ki vao mai i te puakapa, 4 E kare e taki ki te ngutupa o te Are uipaanga, kia apaiia tetai atinga na Iehova, ki mua i te puakapa o Iehova ra; ka tapepeia te reira tangata i te akataʼe toto, e toto oki tei taʼe iaia; e tipu keia te reira tangata i tona ra iti-tangata; 5 Kia apai mai te tamariki a Iseraela i ta ratou au atinga, ta ratou e ta ua i te au ngai ke ra, kia taki mai ratou i te reira kia Iehova, ki te ngutupa o te Are uipaanga ra, ki te taunga, ka apai ei, ei aronga atinga au na Iehova ra.

6 E na te taunga e pîpî i te toto ki runga i te atarau a Iehova i te ngutupa o te Are uipaanga ra, e taʼu oki i te tongaua ei mea aunga kakara na Iehova.

7 Auraka ratou e apai akaou i ta ratou au atinga na te au demoni, ta ratou e aru akaturi aere ei ra. Ei akonoanga mou teia na ratou e ope ua ake to ratou au uki ra.

8 E karanga atu koe kia ratou, To te ngutuare o Iseraela ra, e to te au tangata ke e tuitarere ua i roto ia ratou ra, kia apai i te atinga karakaratio, e te au atinga katoa ra.

9 E kare e apai ki te ngutupa o te Are uipaanga, ka apai ei kia Iehova ra; e tipu keia te reira tangata i tona ra iti-tangata.

10 E to te ngutuare o Iseraela, e to te au tangata ke e tuitarere ua i roto ia ratou, kia kai i te toto ra; ka anaana tikai toku mata i te reira tangata, i tei kai i te toto ra, e tipu ke atu au iaia i tona iti-tangata ra.

11 Tei te toto oki te ora e oraʼi te au mea katoa ra; i akono ei au i te reira e ko ta kotou ïa e apai ki runga i te atarau, ei tapokiangaara na kotou uaorai: Ko te toto oki tei riro ei tapokiangaara na te tangata. 12 I tuatuaʼi au ki te tamariki a Iseraela e, Auraka rava tetai o kotou e kai i te toto, e auraka katoa te tangata ke e tuitarere i roto ia kotou na e kai i te toto.

13 To te tamariki oki a Iseraela, e to te au tangata ke e tuitarere i roto ia ratou, kia arumaki i te puaka e te manu i tika kia kai ra, e rauka iora; ka akataʼe aia i tona toto ki raro, ka tapoki ei ki te one.

14 Tei te toto oki te ora o te au mea katoa nei; ko to ratou ïa ora i tuatuaʼi au ki te tamariki a Iseraela e, Auraka kotou e kai i te toto o te au mea katoa nei; no te mea ko te ora ïa o te au mea katoa nei, ko te toto ra; ko tei kai i te reira, ka tipu keia ïa.

15 E te tangata e kai i te mea mate ua, e tei etietiia ra, te tangata uenua e te tangata ke, ka orei aia i ona kakau, e ka pai aia ki te vai, ka viivii ïa aia e aiai ua atu; ei reira aia e mā ai.

16 Kia kore ra aia e orei i ona kakau, e kia kore aia e paî ki te vai; ei runga iaia tana ara vaoo ei.