Mataio

23 KUA karanga aturā Iesu ki taua aronga maata ra, e ki tana au pipi,

2 Na ko atura, Te noo nei te au tata tuatua e te au Pharisea i te nooanga o Mose:

3 E teianei, e akono kotou, e e rave i te au mea katoa, ta ratou e tuatua mai; auraka ra kotou e aru i ta ratou akonoanga: ko te tuatua ua oki ta ratou, kare ra e akono.

4 Te ri nei oki ratou i te apainga teiaa, e te maranga kore, e te tuku nei ki runga i to tetai ke ua; kare ra tetai rima o ratou e akatukia atu i taua apainga ra.

5 E ta ratou e rave ra, e rave anake ïa, kia akaraia ratou e te tangata: te akapararauare nei i ta ratou philateri, e te akamaata atu nei i te veruveru o ta ratou kakau,

6 E te inangaro i te ngai teitei i te au kaingakai, e te nooanga memeitaki i te au sunago ra,

7 E kia aroaia oki i te ngai okoanga, e kia tuatuaia e te tangata e, e Rabi, Rabi.

8 Kareka kotou, auraka kia tapaia ia Rabi; okotai rai oki o kotou Orometua, ko te Mesia: e taeake anake oki kotou katoa na.

9 Auraka kotou e akametua i tetai tangata i teianei ao: okotai rai oki o kotou Metua, ko tei noo i te rangi.

10 Auraka kotou kia tapaia i te arataki; okotai o kotou Arataki, ko te Mesia.

11 E tei rai i roto ia kotou nei, ei tavini ïa no kotou.

12 Te akateitei iaia uaorai, e akamoraroia ïa; e te akamoraro iaia uaorai, e akateiteiia ïa.

13 Aue kotou, e te au tata tuatua, e te au Pharisea e, e aronga pikikaa! te topiri nei kotou i te basileia o te ao i te tangata nei: kare kotou uaorai i tomo ki roto, e te inangaro i te tomo ra, te tāpu nei kotou.

14 Aue kotou, e te au tata tuatua, e te Pharisea e, e aronga pikikaa! te pou nei ia kotou te au ngutuare o te aronga vaine takaua, e te akaroa na oki i te pure ei pikikaa anga: e maata ua atu to kotou mate i te reira.

15 Aue kotou, e te au tata tuatua, e te au Pharisea e, e aronga pikikaa! te takako nei kotou i te tai e te enua, kia rauka tetai pipi; e kia rauka ra, e maata ua atura tona tau ia kotou ei tamaiti no te po, i to kotou uaorai.

16 Aue kotou, e te au arataki matapo e, ko te tuatua e, Ko te taputou ki te nao ra, kare ïa o reira; kareka te taputou ki te auro o te nao ra, e kai ou ïa.

17 E te au neneva, e te matapo e! ko teea tei maata, ko te auro aina, e ko te nao aina, tei akatapu i taua auro ra?

18 E, Ko te taputou i te atarau ra, kare ïa o reira; ko te taputou ra ki te apinga ki rungao, e kai ou ïa.

19 E te au neneva, e te matapo e! ko teea tei maata, ko te apinga aina, e ko te atarau aina, te mea e tapu ei taua apinga ra?

20 E teianei ko tei taputou i te atarau ra, kua taputou ïa i te reira, ma te apinga katoa ki rungao.

21 E ko tei taputou i te nao ra, kua taputou ïa i te reira, e iaia oki ko tei noo i roto.

22 Ko tei taputou i te rangi ra, kua taputou aia i te terono o te Atua, e iaia oki ko tei noo ki rungao.

23 Aue kotou, e te au tata tuatua, e te au Pharisea e, e aronga pikikaa! te oronga nei kotou i te ngauru o te minete e te aneto e te kumino, e te akaruke nei i te au mea mamaata o te ture, te tuatua-tau, te aroa, e te akarongo: ko ta kotou ïa e akono e tikaʼi, e auraka katoa e akaruke i tera.

24 E te au arataki matapo e, te tamauku nei i te namu, e te apuku ua nei i te kamela.

25 Aue kotou, e te au tata tuatua, e te au Pharisea e, e aronga pikikaa! te tamā nei kotou i to vao i te kapu e te mereki, kareka o roto, te ki nei ïa i te noinoi apinga, e te kaki anga kore.

26 E te Pharisea matapo e! e akamata na i te tamā i te kapu e te mereki i roto, e kia mā katoa a vao.

27 Aue kotou, e te au tata tuatua, e te Pharisea e, e aronga pikikaa! te arite nei kotou i te tanumanga akateateaia nei, tei akaieie i vao ake, ko roto ra, kua ki ïa i te ivi turuma e te au mea viivii katoa.

28 Koia katoa kotou na, mei te aronga tuatua-tika kotou i vao ake i ta te tangata nei akara anga, ko roto ra, te ki nei ïa i te pikikaa e te kino.

29 Aue kotou, e te au tata tuatua, e te au Pharisea e, e aronga pikikaa! te patu nei kotou i te vairanga o te au peroveta, e te akamanea nei i te au tanumanga o te aronga tuatua-tika,

30 E te tuatua nei kotou, Naringa ko matou katoa i te tuatau o to matou ui metua ra, kare matou e akatika i ta ratou i te tainga i te au peroveta ra.

31 E tenana, ko kotou uaorai mari te kite e, ko te tamariki kotou a te aronga i ta i te au peroveta ra.

32 Ka akaki ana kotou i te arite a to kotou au metua ra.

33 E te au ovi nei, e ta te vipera anaunga! Ea kotou e oraʼi i te mate i te po?

34 E teianei, i na, te tono atu nei au i te peroveta, e te tangata pakari, e te tata tuatua, kia kotou: ka ta kotou i tetai papaki, e ka akasatauro; e ka pāpā oki i tetai papaki i roto i to kotou au sunago, e ka tuaru atu ki tera oire, ki tera oire.

35 Kia uriia mai ki runga ia kotou te toto ara kore katoa i maringi i te enua nei, mei te toto mairai o Abela tuatua-tika, e tae roa ake ki te toto o Zakaria te tamaiti a Barakia, ta kotou i ta i rotopu i te atarau e te nao ra.

36 Koia mou taku e karanga atu kia kotou nei, E uri katoaia mai taua au mea ra ki runga i teianei uki.

37 E ae oki koe, e Ierusalema e, e Ierusalema e, tei ta i te au peroveta, e tei peî oki ki te toka te aronga i tonokia atu ia koe na, manganui toku inangaro anga i te akaputuputu i to tamariki, mei te moa e akakoukou i tana anaunga i raro ake i tona peau, kare ra i tika ia kotou!

38 I na, kua vaio taneia to kotou nei are.

39 E te karanga atu nei au kia kotou, Kare kotou e kite mai iaku, e tae ua atu ki te rā e tuatuaʼi kotou e, Kia ora aia, tei aere mai ma te ingoa o te Atu.