Salamo

112 ALELU Ia. E ao to te tangata i mataku ia Iehova, tei rekareka maata i tana ra au akauenga. 2 E mana oki tona uanga i te enua nei; e meitaki oki te uki a te aronga tiratiratu ra. 3 E apinga nui tei tona are, e te taongaia: e tika oki tana tuatua-tika i te vai marie anga. 4 Ei te poiri nei e iti mai ei te mārama ki te aronga tiratiratu; te takinga-meitaki, e te aroa, e te tuatua-tika. 5 E takinga-meitaki to te tangata meitaki e te oronga; e rave aia i tana au peu ra ma te akono. 6 Kare oki aia e ngaueue e tuatau ua atu; ka manakoia te aronga tuatua-tika e tuatau ua atu. 7 Kare aia e mataku i te rongo kino ra; kua mou tona ngakau i te irinaki anga ia Iehova. 8 Kua akatinamouia tona ngakau kare e mataku, e kite ua atu aia i te inga anga o tona au enemi. 9 Kua tua marie aia, kua oronga aia ki te aronga ao; e tika tana tuatua-tika i te vai marie anga; ka akateiteiia tona tara ma te paapaa ra. 10 Ka kite te tangata kino ma te aue, ka pakati aia i tona nio e ngaro atura: te irinaki anga o te aronga kino ra, ka pou ïa.