Angaanga

15 KUA aere maira e tokotai puke tangata mei Iudea mai, kua apii maira i te au taeake, na ko maira, Kia kore kotou e peritomeia mei te peu a Mose, kare kotou e ora.

2 E no te mea, kare e iti to Paulo ma Banaba māro anga atu e te tauetono anga atu ia ratou, kua akono atura ratou ia Paulo raua ko Banaba, e ko e tokotai puke tangata no ratou uaorai; e aere ki Ierusalema ki te au aposetolo ra, e te aronga orometua, i taua tuatua ra.

3 E aratakiia atura e te ekalesia i taua aerenga ra, aere atura ratou na Phenia, e Samaria, i te akakite anga atu i to te etene ariu anga: maata rava atura to te au taeake rekareka ia ratou,

4 E tae atura ratou ki Ierusalema, kiteia maira ratou e te ekalesia, e te au aposetolo, e te aronga orometua, kua akakite atura kia ratou i ta te Atua i rave ia raua ra.

5 Kua tu maira ra e tokotai puke tangata no te pupu Pharisea tei akarongo ra, na ko maira, E peritome ia ratou e tikaʼi, e e ako atu e akono i te ture na Mose ra.

6 Kua uipa iora te au aposetolo e te aronga orometua ra, e akaeatu i taua tuatua ra.

7 E maata rava akera te tauetono anga, kua tu aturā Petero, karanga atura kia ratou, E tāma, e te au taeake nei, kua kite kotou e kua iki te Atua i roto ia tatou nei iaku i muatangana, kia kite te etene i te evangelia i toku nei vaa kia akarongo.

8 E ko te Atua oki, tei kite i te ngakau ra, tei akatika mai ïa ia ratou, i te oronga anga mai i te Vaerua Tapu kia ratou mei tana i oronga mai kia tatou nei.

9 Kare oki i akatu ke atu ia ratou e ia tatou nei, i te tamā anga i to ratou ngakau i te akarongo.

10 E teianei, eaa kotou i timata atu ei i te Atua i te tuku anga i te zugo ki runga i te kaki o te au pipi, kare i maranga i to tatou ai tupuna ra e ia tatou katoa nei oki?

11 Kua kite ra tatou e, ka ora tatou i te aroa ua o to tatou Atu o Iesu Mesia, mei ia ratou katoa ra.

12 Kua muteki iora taua aronga maata katoa ra, kua akarongo maira ia Banaba raua ko Paulo, i te akakite anga atu i te au akairo, e te au mea umere, ta te Atua i rave ia raua ki o te etene ra.

13 E kia akaoti akera i ta raua tuatua anga, kua karanga aturā Iakobo, na ko atura, E tāma, e te au taeake, ka akarongo mai ana kiaku:

14 Te tuatua mai nei a Simeona e, kua akara aroa mai te Atua i te etene i muatangana, e rave i tetai papaki tangata i roto ia ratou ra no tona ingoa.

15 Te tau nei oki te tuatua a te au peroveta ra i te reira, koia oki tei tataia ra e,

16 “Muri akera e oki atu au, e patu akaou i te puakapa o Davida i topa ki raro ra; e te ungaunga o taua puakapa ra ka patu akaouia ïa e au, e ka tu ki runga;

17 Kia kimi te toenga o te tangata i te Atu, e te au etene katoa i tapaia i toku ingoa: te tuatua maira te Atu, ko tei akatupu i teia katoa nei au mea.”

18 Kua kite te Atua i tana angaanga tini ravarai mei muatangana mai.

19 E teianei, teia taku tuatua, auraka tatou e akamanamanata atu i te aronga e ariu ki te Atua no roto i te etene ra;

20 E tata atu ra tatou i te tuatua kia ratou ra, auraka ratou e rave i te au mea viivii a te au idolo, auraka e akaturi, auraka e kai i te mea kukumi uaia, e te toto.

21 Te vai nei oki te aronga i tuatua ia Mose i te au oire ravarai mei tupua mai, te tatauia mai nei oki aia i roto i te au sunago i te au sabati katoa nei.

22 Kua manako iora te au aposetolo, e te aronga orometua, e te ekalesia katoa, e tono i etai puke tangata ikiia i roto ia ratou uaorai ra ki Anetioka, ko Iuda, ko Barasaba tetai ingoa, e ko Sila, e puke tangata nunui ïa i roto i te au taeake ra, ko Paulo oki e Banaba:

23 E kua tata atura oki i te leta na to ratou rima i taoi, na ko atura, Ko te au aposetolo e te aronga orometua, e te au taeake nei, te akau atu nei matou i to matou aroa kia kotou ki te au taeake i roto i te etene i Anetioka, e i Suria, e i Kilikia ra.

24 Kite akenei matou e, kua repua to kotou ngakau i te tuatua a e tokotai puke tangata no ko nei atu i o matou nei, i te na ko anga atu e, E peritomeia kotou, e e akono i te ture e tikaʼi: kare oki matou i akaue atu ia ratou:

25 Akaputuputu akenei oki matou ravarai, ma te ngakau okotai, manako akenei e mea meitaki kia tono katoa atu i etai puke tangata ikiia kia kotou na, e to matou puke taeake akaperepere nei, ko Banaba e Paulo,

26 E puke tangata akaruru ïa i to raua mate no te ingoa o to tatou Atu o Iesu Mesia ra.

27 E teianei, tono atu na oki matou ia Iuda raua ko Sila, e na raua e tuatua vaa ua atu i taua tuatua ra.

28 E mea meitaki i te Vaerua Tapu e ia matou katoa nei oki, auraka rava ei teimaa ke e tukuia atu ki rungao ia kotou, mari ra ko teianei au mea tika;

29 Auraka kotou e kai i te manga i apaiia na te au idolo ra, e te toto, e te mea kukumi uaia ra, auraka oki e akaturi: kia akaruke kotou i te reira, e meitaki ïa kotou. Kia ora na kotou.

30 E tukuia atura ratou, tae atura ratou ki Anetioka, kia akaputuputuia maira te tangata katoa, kua tuku atura i te leta:

31 E oti akera i te tatauia e ratou, mareka rava atura i taua akoanga.

32 E ako ua aturā Iuda raua ko Sila i te au taeake, e akatinamou atura, e peroveta katoa oki raua.

33 E kia noo raua i reira e roa poto akera, tuku meitakiia atura raua e te au taeake ki te au aposetolo ra.

34 Ko Sila ra, manako akera aia e, e noo rai i reira.

35 Ko Paulo ra e Banaba, noo atura raua i Anetioka, e manganui rai oki te tangata, i te ako anga e te apii anga i te tuatua a te Atu.

36 E topa akera etai puke rā, kua karanga aturā Paulo kia Banaba, Ka oki taua ki te au taeake ra, i te au oire ravarai i tuatuaia e taua te tuatua a te Atu ra, kia kite taua i to ratou mouranga.

37 Kua tuatua akerā Banaba e arataki katoa ia, Ioane, ko Mareko tetai ingoa.

38 Kare rā Paulo i manako e, e tangata tau aia kia arataki katoa iaia i to ratou tere, ko tei akaruke mai ia ratou i Pamephulia ra, kare i aere katoa i taua angaanga ra.

39 Tupu atura oki te taumāro maata ia raua uaorai, e taka ke atura raua: rave aturā Banaba ia Mareko, ano atura ki Kupero.

40 Ko Paulo ra kapiti atura ïa kia Sila, e riro atura, kua oti akera i te tukuia e te au taeake ki te aroa ua o te Atua.

41 Aere atura aia na Suria, e na Kilikia, i te akatinamou anga i te au ekalesia.