Isaia

33 E AE oki koe, e tei āru aere, e kare koe i āruia mai; e tei aō ra, e kare koe i aōia mai! kia oti taua āru anga ra, ei reira koe e āruia mai ei; kia roiroi koe i te aō aere, e aō mai ei ratou ia koe ra.

2 E Iehova e, e aroa mai koe ia matou; te tapapa nei matou ia koe; ei rima koe no ratou i te au popongi katoa nei; ei ora oki no matou i te tuatau taitaia ra.

3 Kua oro anake te tangata i te reo rikarika ra; ia koe i tu mai ki runga ra, pueurikiriki ke atura ïa te pa enua.

4 E akaputuputuia ra ta kotou apinga pou, mei te akaputuputu anga o te anue ra; mei te tāpaki e oro atu e oro mai, ko to ratou ïa oro ki runga i te reira.

5 Kua akateiteiiā Iehova; tei runga oki aia te noo anga: kua akaki aia ia Ziona i te tuatua-tau e te tuatua-tika.

6 Koia rai te mou o toou ra tuatau, ko te maata ïa o te ora, te pakari, e te kite; ko te mataku ia Iehova, ko tona ïa apinga nui.

7 I na oki to ratou Ariela! kua ngongoro ua te aue ki vao: kua maata te aue o te au karere akamoeau.

8 Kua tanea te au ara metua; kua kore e aereia e te tangata; kua akaatikau aia i te koreromotu; kua akaviivii i te au oire, e kare aia e akono ua atu i te tangata.

9 Te aue ua ra te enua; kua maeaea: kua akama Lebanona; kua mae ua: kua riro Sarona mei te medebara; e kua akataraa Basana e Karamela.

10 Te tuatua mairā Iehova, Ei teianei au e tu ei; ei teianei au e akangateiteiiaʼi: ei teianei au e akateitei ei iaku uaorai ki runga.

11 E nui kotou i te ota, e teita ta kotou e anau mai: ko to kotou uaorai riri te ai e pou ei kotou na.

12 E riro oki te au tangata mei te taʼuanga ngaika ra; mei te rakau taratara i tipuia, e pou akera i te ai.

13 E akarongo mai ana, e to te atea ke ra, i taku i rave; e aaki mai kotou, e tei vaitata nei, i toku nei mana.

14 Kua mataku te aronga ara i Ziona; kua rokoia te aronga pikikaa e te ruketekete. Koai to tatou e tika kia noo i te ai kakai ra? koai to tatou e tika kia noo i te ai mate kore?

15 Ko tei aere ma te tuatua-tika ra, e ko tei tiratiratu tana tuatua; ko tei akaviivii i te apinga i rauka i te takinga-kino; ko tei ruru i ona rima i te ou pikikaa ra; ko tei popani i ona taringa i te taiku anga toto ra; e ko tei topiri i ona mata i te kite anga i te kino ra:

16 Koia te ka noo ki te au ngai teitei ra; ko te pinanga mato ra, ko tona ïa pinanga; e orongaia mai tana kia; kare e kore tana vai.

17 E kite o mata i te ariki ma tona katoa ra manea: e kite oki ratou i te enua mamao ra.

18 E akamaaraara to ngakau i te rikarika i topa ra. Teiea te tata tuatua ra? teiea te rave i te apinga uipa ra? teiea te tatau i te au are punanga ra.

19 Kare koe e kite akaou i taua aronga taae ra, taua aronga tuatua oonu kare e tika ia koe kia akarongo ra; te reo murare kare e rongoia atu.

20 Akara koe ia Ziona, te oire no ta tatou au oroa tapu ra; kia kite o mata ia Ierusalema i te nooanga au, i te puakapa ngaueue kore: e kare tetai o tona au titi e kiriti akaouia, e kare rava tona au taura katoa ra e motu.

21 Ka riro rā Iehova tapukakā ra ei au vai taʼe no tatou i reira, ei kauvai pararauare; kare te pai ma te oe e tae na reira, kare oki te pai maata e na reira te akatere.

22 Ko Iehova oki to tatou akava; ko Iehova ta tatou tuku ture; ko Iehova to tatou ariki; nana tatou e akaora.

23 Kua mataratara toou au taura; kare oki to ratou tira e mou ia ratou; kare e rauka ia ratou kia uti i te kie: ei reira te apinga pou e mangauui i tuaiaʼi; na te pirikoki i āru ua i te apinga pou ra.

24 Kare oki to reira e karanga e, Kua maki au: te au tangata e noo i reira, kua apai keia ta ratou ara.