Maseli

18 KO tei tau kore i tetai ke, kua ketaketa ra i tona uaorai manako; kua patoi atu aia ki te au tuatua pakari katoa ra.

2 Kare te neneva ra e mareka i te kite, kia kitea ra te manako i roto i tona uaorai ngakau.

3 Kua tae mai te tangata kino ra, kua tae katoa mai te akavaavaa, te akama e te akakino.

4 Mei te moana te tuatua o te vaa tangata; ko te punavai o te pakari ra, mei te kauvai kia ki ra.

5 Kare e meitaki kia kite atu i te mata o te tangata kino, kia akainga atu te tangata tuatua-tika i te akavaanga.

6 Na te vaa o te neneva aia i arataki ki roto i te taumāroanga; e na tona uaorai vaa i karanga atu kia taia mai.

7 Te vaa o te neneva ra, ko tona ïa mate: tona vaa te ereere e mou ei tona vaerua.

8 E kai venevene ïa te tuatua a te monomono korero ra, aere rava atura ki raro rava i te kopu ra.

9 Ko tei akatau i tana ra angaanga, e taeake ïa no te kaimoumou.

10 Te ingoa o Iehova ra, e punanga ketaketa ïa: te oro nei te aronga tuatua-tika ki reira, e kua ora iora.

11 To te tangata apinga nui ra apinga, ko tona ïa oire ketaketa, e mei te patu teitei ra ïa i tona uaorai manako anga.

12 Ko te ngakau parau ra, to te mate ra na mua, ko te akaaka ra to te akangateitei ra na mua.

13 Ko tei tuatua vave mai e kare i akakiteia atu, e neneva tona, e ka akama ïa aia.

14 E akakoromaki te vaerua tangata i tona ra mate; kia puta ra te vaerua ra e tika iaai kia akakoromaki i te reira?

15 Te rauka ra i te ngakau o te tangata akono ra te kite; e te kimi ra te taringa o te tangata pakari i te kite.

16 Na te taoonga-rima o te tangata ra e akamaka i tona ara, i tae atu ei aia ki mua i te aroaro o te aronga mana.

17 Ko tei na mua i te akakite i tana tuatua, e ana nei e te tika ra tana, te aere maira ra tei patoi iaia, ei reira aia e kiteaʼi.

18 Na te kelero e akakore i te taumāro, e na te reira e vavao i te aronga mana.

19 Te taeake ra kia riri, e tau ïa i te oire ketaketa; e to ratou taumāro anga, e tau i te tamou auri o te punanga ra.

20 E ki te kopu o te tangata i te ua o tona vaa: e pangia tona kaki i ta tona vaa e akatupu.

21 Tei te arero te mate e te ora i te vairanga: e te aronga e tau i te reira na ratou e kai.

22 Ko tei rauka iaia te vaine ra, e meitaki rai tana i rauka, e akaperepereia mai aia e Iehova.

23 E taparuparu rai ta te ao: kareka te tangata apinga, e tuatua taivaiva ïa tana.

24 Ko te tangata i takinga-meitaki ia etai ke ra, e taungaia ïa tona; te vai nei ra te oa e piri meitaki tona i to te taeake.