Numero

3 I TE rā i tuatua mai ei a Iehova kia Mose i te maunga ra i Sinai, teia nga tamariki a Aarona raua ko Mose ra. 2 Teia oki te ingoa o te au tamariki a Aarona ra: Ko te tama mua ra ko Nadaba ïa, e ko Abihu ïa, e ko Eleazara, e ko Itamara. 3 Ko te ingoa teia o nga tamariki a Aarona, nga taunga i akatainuia ra, tana i akataoonga ei kau taunga.

4 Mate iora rā Nadaba raua ko Abihu ki mua i te aroaro o Iehova, ia raua i apai i te ai noa ki mua i te aroaro o Iehova, i te medebara ra i Sinai, e kare a raua tamariki: kua rave iorā Eleazara raua ko Itamara i taua taoonga taunga ra ki mua i te aroaro o to raua metua ko Aarona.

5 Kua tuatua mairā Iehova kia Mose, na ko maira.

6 Arataki mai i te kopu o Levi ra, ka akakite ei ki mua i te aroaro o te taunga ra ko Aarona, kia rave ratou i te taoonga iaia ra. 7 E na ratou e akono i tana ikuiku ra, e te ikuiku a te uipaanga katoa ra, ki mua i te Are uipaanga ra, e rave i te angaanga o te puakapa ra.

8 E na ratou e tiaki i te au mea ravarai no te Are uipaanga ra, e te ikuiku a te tamariki a Iseraela, e rave i te angaanga o te puakapa ra.

9 E kave atu koe i te ngati Levi kia Aarona, e ana puke tamaraki: tei iaia anake oki ratou ra no roto i te tamariki a Iseraela ra. 10 E akataka ra koe ia Aarona e ana puke tamariki, e e akono ratou i ta ratou taoonga taunga ra: e te tangata ke kia akavaitaita mai, ka taia ïa.

11 Kua tuatua mairā Iehova kia Mose, na ko maira,

12 I na oki, ko au, kua raveia e au te ngati Levi no roto i te au tamariki a Iseraela, ei paʼu i te au tama mua ravarai tei anau ana i te kopu, i roto i te tamariki a Iseraela ra; e teianei noku uaorai te ngati Levi.

13 No te mea naku uaorai te au tama mua katoa ra; i taua rā ma oki i ta ai au i te au tama mua ravarai i te enua ra i Aiphiti, kua akataka ïa au i te au tama mua katoa a te ngati Iseraela naku, ta te tangata ra, e ta te puaka: naku ïa: ko au ko Iehova. 14 Kua tuatua mairā Iehova kia Mose i te medebara ra i Sinai, na ko maira,

15 E tatau ana koe i te tamariki a Levi ra, i te ngutuare o to ratou ai metua, i to ratou au kopu-tangata ra: te au tamaroa ra, tei tae ki te marama okotai ra, e tei maata atu, ko taau ïa e tatau.

16 Kua tatau iorā Mose ia ratou i te tuatua a Iehova ra, koia i akaueia maira.

17 Teia oki taua au tamariki tamaroa a Levi, i to ratou au ingoa, ko Geresona, e ko Kohata, e ko Merari.

18 Teia oki te ingoa o nga tamariki tamaroa a Geresona, i to ratou au kopu-tangata; ko Libeni ïa, e ko Simei. 19 E ta Kohata puke tamariki tamaroa, i to ratou au kopu-tangata; ko Amerama ïa, e ko Izehara, ko Heberona, e ko Uziela.

20 E ta Merari puke tamariki tamaroa i to ratou au kopu-tangata; ko Mahali ïa, e ko Musi. Ko nga kopu-tangata ngati Levi ïa, i te ngutuare o to ratou ai metua.

21 Na Geresona te kopu-tangata ngati Libeni ra, e te kopu-tangata ngati Simei ra: ko nga kopu-tangata ngati Geresona ïa. 22 Ko tei tatauia i roto ia ratou ra, ko te au tamaroa ravarai, tei tae ki te marama okotai e tei maata atu, taua aronga i tatauia ra, e itu ïa tausani, e rima oki anere.

23 I muri mai i te puakapa i puakapaʼi te au kopu-tangata ngati Geresona i te pae i te opunga o te rā ra.

24 E te mataiapo tutara o te au kopu-tangata ngati Geresona ra, ko Eliasapha ïa te tamaiti a Laela ra. 25 E ta te tamariki a Geresona tiaki anga i te Are uipaanga ra, ko te puakapa uaorai ïa e te Are, tona tapoki, e te paruru o te ngutupa o te Are uipaanga ra,

26 E te au paruru o te paepae, e te paruru o te ngutupa paepae, tei akapini katoa i te puakapa e te atarau, e te au taura ra, no te au peu katoa o te puakapa ra. 27 E na Kohata te kopu-tangata ngati Amerama ra, e te kopu-tangata ngati Izehara ra, e te kopu-tangata ngati Heberona ra, e te kopu-tangata ngati Uziela ra: ko nga kopu-tangata ngati Kohata ïa. 28 Ko tei tatauia i roto i te au tamaroa katoa, tei tae ki te marama okotai e tei maata atu, e varu ïa tausani, e ono oki anere, i tei akono i tei iku naia mai i te ngai-tapu.

29 Ei te pae puakapa i apatonga ra i puakapaʼi te au kopu-tangata o te tamariki a Kohata.

30 Ko te mataiapo tutara o te au kopu-tangata ngati Kohata ra, ko Elizaphana ïa te tamaiti a Uziela.

31 E ta ratou tiaki anga ko te aruna ïa, e te kaingakai, e te vairanga lamepa, e nga atarau, e te au mea o te ngai-tapu i ta ratou i rave i te taoonga ra, e te paruru, e te au mea ravarai no te reira.

32 E ko Eleazara, te tamaiti a Aarona taunga, te tutara i rungao i taua mataiapo tutara o te ngati Levi ra, ei iaia te akara ki rungao ia ratou i tei akono i tei iku naia mai i te ngai-tapu ra. 33 Na Merari te kopu-tangata ngati Mahali ra, e te kopu-tangata ngati Musi ra: ko nga kopu-tangata ngati Merari ïa.

34 Ko tei tatauia i roto ia ratou ra, ko te au tamaroa i tae ki te marama okotai e tei maata atu, e ono ia tausani, e rua oki anere.

35 E te mataiapo tutara o te au kopu-tangata o Merari ra, ko Suriela ïa te tamaiti a Abihaila: ei te pae puakapa i apatokerau ra ratou i puakapaʼi.

36 E ta te au tamariki a Merari, ko ta ratou ïa tiaki anga, ko te au tapaanga rakau o te puakapa, e te au tea, e te au pou, e te au turanga, e te au peu katoa, e te au mea ravarai no te reira;

37 E te au pou o te paepae pini ua ake, e te au turanga, e te au titi, e te au taura.

38 Kareka te puakapa ki mua ake i te puakapa, i mua tikai i te Are uipaanga, i te pae i te itinga o te rā ra, ko Mose ïa raua ko Aarona, e tana au tamariki, i te akono anga i tei iku naia mai i te ngai-tapu no te tamariki a Iseraela ra; e te tangata ke kia akavaitata maira, ka taia ïa.

39 Ko taua aronga ngati Levi katoa i tatauia, i ta Mose raua ko Aarona i tatau i te akaue a Iehova ra, i to ratou au kopu-tangata, ko te au tamaroa katoa i tae ki te marama okotai e tei maata atu, okotai takau ïa e rua ara i te tausani. 40 Kua tuatua mairā Iehova kia Mose, E tatau koe i te au tamaroa tama mua ravarai a te tamariki a Iseraela ra, ko tei tae ki te marama okotai e tei maata atu, kia kitea to ratou au ingoa i te maata anga.

41 E rave oki koe i te ngati Levi ra noku, (ko au ko Iehova,) ei paʼu ïa i te au tama mua katoa a te tamariki a Iseraela ra; e te au puaka a te ngati Levi, ei paʼu i te au anaunga mua o te au puaka katoa a te tamariki a Iseraela.

42 Kua tatau iorā Mose i te au tama mua ravarai a te tamariki a Iseraela, i ta Iehova i akaue mai kiaia ra.

43 E taua au tamaroa tama mua katoa ra, i te au ingoa i tatauia ra, i tei tae ki te marama okotai e tei maata atu, ko taua aronga i tatauia ratou ra, e rua ïa ngauru e rua ara i te tausani, e rua anere, e itu ngauru, e toru ara.

44 Kua tuatua mairā Iehova kia Mose, na ko maira,

45 Ka rave i te ngati Levi ei paʼu i te au tamaroa tama mua a te tamariki a Iseraela ra, e te au puaka a te ngati Levi ei paʼu i te au puaka na ratou; e noku te ngati Levi: ko au ko Iehova.

46 E te oko i te aronga e oko akaouia ra, i nga anere e rua e itu oki ngauru e toru ara, i te au tama mua a te tamariki a Iseraela ra, i te maata i te au ngati Levi ra; 47 Tataki rima ake sekela i te tangata okotai, ko taau ïa e rave, i te sekela o te ngai-tapu kia rave koe ra: okotai takau gera ra okotai ïa sekela:

48 E te moni e oko akaouiaʼi taua aronga i maata i o ratou ra, e apai koe i te reira kia Aarona e tana au tamariki ra.

49 Kua rave iorā Mose i taua moni oko ra no te aronga i maata i te rai i tei paʼuia e te ngati Levi ra:

50 Na te au tama mua a te tamariki a Iseraela ra taua moni tana i rave ra: okotai tausani e toru anere e ono ngauru e rima ara i te sekela, i te sekela o te ngaitapu ra: 51 Kua apai aturā Mose i te moni i taua aronga i oko akaouia ra kia Aarona e tana au tamariki, i te tuatua a Iehova ra, i ta Iehova i akaue mai kia Mose ra.