Ebera

9 E TEIANEI e ture katoa to te Are muatangana no te akamori anga, e e ngai-tapu no teianei ao.

2 I akatuia oki tei muatangana pae o te Are, ko tei karangaia e, e ngai-tapu, ma te lamepa, e te kaingakai, e te kai o te aroaro, i roto ra;

3 E i roto mai i te rua o te paruru ra, ko te pae Are ïa i karangaia i te ngai-tapu rava ra;

4 Ma te kapu auro rai roto, e te aruna koreromotu i vaî takako ravaia i te auro ra, i reira oki te kapu auro i akakiia i te māna, e te rakau a Aarona i pua ra e nga papa koreromotu ra;

5 E ko runga ake i te reira, ko nga kerubi kakā ïa i te tamaru anga i te nooanga o te aroa ra; kare ra e meitaki kia tuatua ua atu i taua au mea ra i teianei.

6 E tika rava akera taua au mea ra, aere atura te kau taunga i roto i tei muatangana pae Are ra i te au rā katoa, i te rave anga i te taoonga ra.

7 Kareka te rua ra, ko te taunga maata anake ra tei tomo, okotai mataiti okotai tomo anga; eiaa ra ma te toto kore ra, ko tana ïa i apai no tana uaorai ara, e ta te tangata katoa ra.

8 Ei akakite anga mai na te Vaerua Tapu e, te vai ra te Are mua ra, kare rai i atea te arataa e o atu ei ki roto i te ngai-tapu roa ra:

9 E akatauanga te reira no teianei tuatau, e atinga e te tarangaara ra tei apaiia i roto; kare ra i meitaki roa te tangata i akamori ra i te reira, i te akonoanga o te akava-ngakau ra.

10 E kai anake nei ïa, e e au mea e inumia ra, e e au orei-anga oki, e e au peu i akonoia no te kopapa ra i tukuia mai ia ratou, e kia ae ki te tuatau e akameitaki ravaraʼi ra.

11 Ko te Mesia ra i tae maira ei taunga maata no te au mea memeitaki a muri nei, i roto i te Are maata e te meitaki rava, kare i angaia e te rima ra, kare te mea no teianei ao,

12 Kare oki ma te toto puaka-nio e te toto punua puakatoro, ma tona uaorai ra toto, i te tomo anga okotai i roto i te ngai-tapu ra, ma te ora mutu kore te rauka anga no tatou.

13 I tapu atura te tangata e mā atura te kopapa i te toto puakatoro e te toto puaka-nio, e te reu puakatoro ua i pîpîia ki runga i te aronga i viivii ra:

14 Ka tangaʼi oki i te toto o te Mesia ra, ko tei tuku iaia uaorai ma te kino kore i te Atua, i te tauturu o te Vaerua mate kore ra, e maata atu ïa te mā o to kotou akava-ngakau i te angaanga mate, kia akamori i te Atua ora ra!

15 E no reira i riro ei oki aia ei arai i te koreromotu ou nei, kia rauka te ao mutu kore i tuatuaia maira, i te aronga i kapikiia ra, i tona mate, ei oko i te ara i te koreromotu mua ra.

16 E koreromotu ra, kia mate tikai te mea e tinamou ei ra e tikaʼi.

17 E atinga tei mate e tinamou ei te koreromotu kia akatau: kare ra e mana i te ora anga o te mea e tinamou ei ra.

18 I kore ei oki te koreromotu mua ra i akatinamouia ma te toto kore.

19 Oti akera oki te au tuatua ravarai i roto i te ture i te tuatuaia e Mose i te tangata katoa ra, kua rave iora aia i te toto punua puakatoro, e te puaka-nio, e te vai, e te uruuru kutekute, e te isopa, kua pîpî atura aia i te buka e te tangata ravarai,

20 Na ko atura, “Ko te toto teia o te koreromotu ta te Atua i akatau ia kotou na.”

21 Kua pera katoa aia i te pîpî i te Are i te toto, e te au kapu katoa no te akamori anga.

22 E kare e rainga te mea i kore i tamāia i te toto i ta te ture ra; e kare e toto i akataeia ra, kare rava e matara anga o te ara.

23 E mea tika oki te au akairo o te au mea o te rangi kia tamāia i taua au atinga ra; kareka taua au mea tikai o te rangi ra, ei atinga meitaki maata ua atu i te reira.

24 Kare akenei te Mesia i tomo ki roto i nga ngai-tapu i angaia e te rima ra, i te akairo no te ngai-tapu tikai; tei te rangi mou ra, kia akakite aia iaia uaorai ki mua i te aroaro o te Atua no tatou i teianei rai:

25 Kare ra kia apai putuputu aia iaia uaorai ei atinga, mei te taunga maata e tomo ki roto i te ngai-tapu i te au mataiti katoa ma te toto ke ra; 26 Naringa oki i pera na mei muatangana mairai o teianei ao, kua manganui rai tona matenga; okotai rava ra ona akakite angaia mai i teianei, i te openga o te au tuatau nei, kia akakore aia i te ara i te akariro anga iaia uaorai ei atinga. 27 E mei te tangata nei oki, kua akonoia kia okotai ake matenga, e muri ake, ko te akavaanga ïa;

28 Koia katoa te Mesia, ka tai akenei ona apai angaia ei atinga kia apai ke aia i te ara a te tangata e manganui, e ka mama mairai aia, ko te tu rua ïa o te mama anga mai, eiaa ei tarangaara, kia ora ra te aronga i tatari atu iaia.