Zekaria

8 E KUA tae mai oki te tuatua a Iehova Sabaota ra kiaku nei, na ko maira. Te na ko mairā Iehova Sabaota ra;

2 E vareae toku ia Ziona, e vareae maata, e vareae oki toku iaia ma te riri maata rava.

3 Te na ko mairā Iehova, Kua oki au kia Ziona, e e noo au ki rotopu ia Ierusalema: e e karanga ia Ierusalema, Ko te oire tuatua-mou; e te maunga o Iehova Sabaota ra, Ko te maunga tapu ïa.

4 Te na ko mairā Iehova Sabaota ra, Tena ka noo aere te au tane ruaine, e te au vaine ruaine, i roto i te au arataa i Ierusalema, te tangata katoa ma tona tokotoko i tona rima i te rai o te ruaine.

5 Ka ki oki te au arataa o te oire ki te au tamariki tamaroa e te au tamaine, i te oire aere ua anga i to reira au arataa ra.

6 Te na ko mairā Iehova Sabaota ra, Tu ke ua rai teia i te mata o te toenga o teianei au tangata i taua au rā ra, e mea tu ke katoa ainei i toku nei mata? te tuatua mairā Iehova Sabaota ra.

7 Te na ko mairā Iehova Sabaota ra. I na, e akaora au i toku ra au tangata i te enua i te itinga, e te enua i te opunga, o te rā ra.

8 E naku ratou e arataki mai, e ei roto ia Ierusalema ratou e noo ei, e ei tangata ratou noku, e ei Atua au no ratou ma te tuatua-mou e te tuatua-tika.

9 Te na ko mairā Iehova Sabaota ra, Kia maroiroi to kotou rima, e tei akarongo i teianei au rā i teianei au tuatua i te vaa o te au peroveta, i te rā i akamouiaʼi te pange o te aere no Iehova Sabaota ra, te nao nei kia patuia.

10 I mua ake oki i te reira au rā, kare a te tangata nei e tutaki, e kare rai a te puaka e tutaki; e kare rava e au to tei aere ki vao e tei aere mai ki roto, no te enemi; e kua tono au i te tangata katoa e tamaki ki tona uaorai tangata tupu.

11 Kare ra au e riro i teianei mei tei te tuatau i muatangana ki te toenga o teianei au tangata, te tuatua mairā Iehova Sabaota ra.

12 E tupu oki te ua, e ua mai te vine i tona ua, e tuku mai te enua i tana kai, e e tuku mai oki te rangi i te au; e i te toenga o teianei au tangata, taku ïa e o atu i teia katoa nei au mea.

13 E riro oki mei ia kotou i riro ei taumaa i rotopu i te au etene ra, e te ngutuare o Iuda, e te ngutuare o Iseraela; e akaora oki au ia kotou, e ka riro kotou ei meitaki: auraka e mataku, kia maroiroi ra to kotou rima.

14 Te na ko maira oki a Iehova Sabaota ra, Mei iaku oki i manako e akautunga ia kotou, ka akakoko mai ei to kotou au metua iaku kia riri ra, te tuatua mairā Iehova Sabaota ra, e kare au i tataraara;

15 Kua manako akaou oki au i teianei au rā, e takinga-meitaki ia Ierusalema, e te ngutuare o Iuda: auraka e mataku.

16 Teia ia kotou au mea e rave; Ei tuatua-mou ta te tangata katoa e tuatua ki tona tangata tupu; e akatupu kotou i te tuatua-tau tikai e te au i to kotou na au ngutupa.

17 Auraka e manako kino i to kotou ngakau, te tangata katoa ki tona uaorai tangata tupu: e auraka e inangaroia te taputou pikikaa; e mea riri anake oki te reira naku, te tuatua mairā Iehova.

18 E kua tae mai te tuatua a Iehova Sabaota ra kiaku nei, na ko maira, Te na ko mairā Iehova Sabaota ra,

19 Te akakoreanga kai i te marama a, e te akakoreanga kai i te rima ra, e te akakoreanga kai i te itu ra, e te akakoreanga kai i te ngauru ra, ko te ka riro no te ngutuare o Iuda ei rekareka anga e ei pereperekavana anga, ei au kaingakai navenave oki: ei tuatua mou ra ta kotou e inangaro, e te au.

20 Te na ko mairā Iehova Sabaota ra, E manganui rai te tangata e tae mai, e te au tangata no te au oire e manganui:

21 E na te au tangata o tetai oire e aere ki to tetai ka karanga atu ei, E aere viviki tatou e pure ki mua i te aroaro o Iehova, e e kimi ia Iehova Sabaota ra; ko au rai tetai e aere.

22 E tae mai oki te au tangata e manganui, e te au enua ririnui rai e kimi ia Iehova Sabaota ra ki Ierusalema, e e pure ki mua i te aroaro o Iehova.

23 Te na ko mairā Iehova Sabaota ra, Ei taua au rā ra e opu mai ei nga tangata tino ngauru, no roto i te au reo katoa o te pa enua ra, i te tapa kakau o tetai ngati Iuda ta ratou e opu, ka na ko atu ei, Ka aere katoa tatou: kite akenei oki matou e tei ia kotou te Atua.